Smith, Joseph, Kakraba
Nkɔnhyɛnyi a ɔasan mu eyi no dɛ ɔnsan mfa Jesus Christ no nokwar Asɔr no mbra asaase no do. Wɔwoo Joseph Smith wɔ Vermont kurow a ɔwɔ America Nkabɔmu Man no mu na ɔtsenaa ase fi 1805 kesii 1844 mu.
1820 mu no, Nyame Egya na Jesus Christ yii hɔnho kyerɛɛ Joseph, na ohun dɛ asɔrasɔr a ɔwɔ asaase do no no mu biara nnyɛ nokwar (JS—Aba 1:1–20). Ekyir no ɔbɔfo Moroni bɛseraa no, ɔno a ɔkyerɛɛ sika mprɛtse no sumabew, dza nna tsetseberdo nkorɔfo a wɔwɔ America ɔman mu no hɔn abakɔsɛm wɔ do no (JS—Aba 1:29–54).
Joseph kyerɛɛ sika mprɛtse no ase na 1830 mu no ɔdze puee guado dɛ Mormon Nwoma (JS—Aba 1:66–67, 75). 1829 mu no, ne nsa kãa asɔfodzi tumdzi no fii John Onumanyi no nna Peter, James, na John hɔn hɔ (N&A 13; 27:12; 128:20; JS—Aba 1:68–70).
Dɛ mbrɛ Nyame kyerɛe no, Ebɔbira 6, 1830 mu no Joseph nye dɔm binom so kyekyeer Jesus Christ N’Asɔr a wɔdze asan aba no (N&A 20:1–4). Joseph ne banodzi ase no Asɔr no nyinii wɔ Canada, Ngyiresi Aborɔkyir, na Nkabɔmu Man no boka afamu hɔ, nkanka wɔ Ohio, Missouri, na Illinois. Beebiara a Joseph nye Ahotseweefo no kɔree kɛtsenae no wɔtseetsee hɔn. Obiradzi 27, 1844 mu no wokuum Joseph nye no nuabanyin Hyrum wɔ Carthage, Illinois, wɔ America Nkabɔmu Man no mu.
Kyerɛwsɛm a Nkɔnhyɛnyi Joseph Smith dze epue guado
Joseph kyerɛɛ sika mprɛtse no a ɔbɔfo Moroni dze maa no no mu bi ase, nkyerɛase no, dza wɔdze puee guado wɔ 1830 mu no nye Mormon Nwoma no. Onyaa nyikyerɛ pii so fii Ewuradze hɔ a ɔkyerɛkyerɛ Asɔr no ne nkyerɛkyerɛ fapem na ne nhyehyɛɛ. Nyikyerɛ yinom mu pii a wɔboaa ano no nye dza ndɛ wɔfrɛ no Nkyerɛkyerɛ na Ahyɛmudzi no. Ɔnoara so na ɔdze Bota a Ɔsom Bo Mapã no a ɔyɛ Moses, Abraham, na Matthew hɔn nkyerɛwee mu bi a wɔdze nkenyan kyerɛɛ ase no, nankasa noho abakɔsɛm na dasegye no mu bi, nye nkyerɛkyerɛ nsɛm duebaasa nye Asɔr no dza wɔgye dzi no bɔbɔɔ adze.