Ayɛdze

Ndzeyɛɛ na guado-adzeyɛ a ho tsew. Dza ɔwɔ Ayɛdze no ho nye ndzeyɛɛ a ɔwɔ sunsum mu nkyerɛase. Ayɛdze so botum egyina hɔ ama Nyankopɔn ne mbra na mbra a wɔahyehyɛ.

Dza ɔkã Ayɛdze a ɔwɔ Asɔr mu ho nye ayarfo nhyira (James 5:14–15), sacrament do nhyira (N&A 20:77, 79), nsumuhyɛ enuma (Matt. 3:16; N&A 20:72–74), mbofra nhyira (N&A 20:70), Sunsum Krɔnkrɔn ne mae (N&A 20:68; 33:15); asɔfodzi ne mae (N&A 84:6–16; 107:41–52), temple mu ayɛdze (N&A 124:39), na awar ahyɛmudzi fofor a ɔwɔ hɔ daapem mu (N&A 132:19–20).

Ayɛdze a wɔyɛ dze ma binom

Nyamesom ayɛdze a ɔtseasefo yɛ dze ma obi a oewu. Dɛm ayɛdze yinom dzi mu wɔ ber nko a hɔn a wɔreyɛ ayɛdze no ama hɔn no agye ato mu, woedzi ahyɛmu a ɔbata ho no do, na Anohoba Sunsum Krɔnkrɔn no asɔw ano. Wɔda ho yɛ dɛm ayɛdze no wɔ temple mu.