Peter

Ahyɛmu Fofor no mu no, nna dzin a nkyɛ wɔdze frɛ Peter nye Simeon anaa Simon (2 Pet. 1:1), ɔpofonyi bi a ofi Bethsaida a ɔnye ne yer tse Capernaum. Jesus saa Peter n’asew yar (Mark 1:29–31). Wɔfrɛɛ Peter nye no nuabanyin Andrew dɛ wɔmbɛyɛ Jesus Christ n’esuafo (Matt. 4:18–22; Mark 1:16–18; Luke 5:1–11). Ne Aram dzin, Cephas a ɔkyerɛ “adzehunyi” anaa “ɔbo”, Ewuradze dze maa no (John 1:40–42; JSN, John 1:42 [Ntaekyir Nwoma]). Ber a Ahyɛmu Fofor no kã Peter no honam ne mberɛwyɛ ho asɛm no, ɔkyerɛ so dɛ odzii do nyim na osian ne gyedzi a ɔwɔ no Jesus Christ mu ntsi wɔhyɛɛ no dzen.

Peter paa mu kãa dɛ Jesus nye Christ no na Nyankopɔn Ne Ba (John 6:68–69), na Ewuradze dze ahenman no ne nsaafee hyɛɛ ne nsa wɔ asaase do (Matt. 16:13–19). Nsakyeree Bepɔw no do no, Peter hun Agyenkwa no a Ɔasakyer nye Moses na Elias (Elijah) (Matt. 17:1–9).

Peter n’aber do no nna ɔno nye Ɔsomafo panyin. Agyenkwa no No wu, Owusoɛr, Ɔsorkɔ ekyir no, ɔfrɛɛ Asɔr no boaa ano na ɔhwɛe ma woyii Ɔsomafo bi hyɛɛ Judas Iscariot ananmu (Ndwuma 1:15–26). Peter na John saa obi a ɔayɛ obubuafo fi ne nã yamu yar (Ndwuma 3:1–16) na woduaa kwan nwanwa do yii no fii efiadze (Ndwuma 5:11–29; 12:1–19). Ɔnam Peter ne nkyerɛkyerɛ do na asɛmpa no dzii kan dur Amanamamfo no hɔ (Ndwuma 10–11). Ekyir no, Peter nye James na John fi sor bae dze Melchizedek Asɔfodzi no na nsaafee a ɔwɔ ho no brɛɛ Joseph Smith na Oliver Cowdery (N&A 27:12–13; 128:20).

Peter nwoma a odzi kan

Nwoma a odzi kan no wɔkyerɛwee fi “Babylon” (ɔbɛyɛ Rome) na wɔdze kɛmaa Ahotseweefo no wɔ bea a seseiara wɔfrɛ no Asia Minor aber no ara a Nero hyɛɛ ase dɛ ɔretseetsee Christianfo no.

Tsir 1 no kã Christ no dwuma a wohun no siei ahyɛse no dɛ ɔyɛ Ɔpomfo no ho asɛm. Etsir 2–3 no kyerɛ dɛ Christ nye Asɔr no no kutuwdo bo ankasa, dɛ Ahotseweefo no yɛ asɔfokuw adehye, na dɛ Christ kãa asɛmpa no kyerɛɛ esunsum a wɔda efiadze no. Etsir 4–5 no kã siantsir a wɔkã asɛmpa no kyerɛ ewufo no na siantsir a ɔwɔ dɛ elderfo no nyɛn nguankuw no ho asɛm.

Peter nwoma a otsĩa ebien

Tsir 1 no tu Ahotseweefo no fo dɛ wɔnyɛ dza ɔbɛma hɔn frɛ na mpamu no esi pi. Tsir 2 no bɔ kɔkɔ wɔ akyerɛkyerɛfo atorfo ho. Tsir 3 kã nda a odzi ekyir nye Christ Ne Mbae a Otsĩa Ebien ho asɛm.