Daniel
Daniel nwoma a ɔwɔ Ahyɛmu Dadaw no mu no mu nyimpa tsitsir; Nyame ne nkɔnhyɛnyi na nyimpa a ne gyedzi sõ.
Wonnyim n’awofo ho nsɛm biara, ɔwɔ mu dɛ ɔyɛ dɛ ɔyɛ adehye asenyi (Dan. 1:3). Wɔfaa no ndɔmmum kɔr Babylon, hɔ na wɔmaa no dzin Belteshazzar (Dan. 1:6–7). Osian nyamesom ntsi Daniel nye baasa bi so a wɔfaa hɔn ndɔmmum no poow dɛ wobedzi ɔhen n’edziban (Dan. 1:8–16).
Daniel nyaa enyim wɔ Nebuchadnezzar na Darius hɔn enyim osiandɛ ɔwɔ tum a wɔdze kyerɛ adaaso ase. (Dan. 2; 4; 6). Ɔno na ɔkenkaan nsatseaba a ɔbɛkyerɛɛw ban ho na ɔkyerɛɛ ase so no (Dan. 5). N’atamfo pamee tsiaa no, na wɔtoow no kyeen awendadze buw mu, mbom Ewuradze bɔɔ no nkwa ho ban (Dan. 6).
Daniel nwoma no
Nwoma no yɛ nkyekyɛmu ebien: etsir 1–6 no yɛ nsɛm a ɔfa Daniel na n’ayɛnkofo baasa no ho; etsir 7–12 no yɛ nkɔnhyɛ enyido-adzehu a Daniel hunii. Nwoma no kyerɛkyerɛ siantsir a ohia dɛ yedzi nokwar ma Nyame na ɔkyerɛ dɛ Ewuradze hyira anokwafo.
Nwoma no n’edwuma tsitsir a odzii nye Ɔhen Nebuchadnezzar n’adaaso ne nkyerɛase. Adaaso no mu no ɔkyerɛɛ mbrɛ Nyankopɔn n’ahenman no bɛyɛ wɔ nda a odzi ekyir no mu, ɔtse dɛ ɔbo a woetwa efi bepɔw ho. Ɔbo no bepirepirew araa ekesi dɛ ɔbɛhyɛ asaase nyina do mã (Dan. 2; hwɛ N&A 65:2 so).