Usa ka Kapunongan sa Balaang Kababayen-an

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana aron pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Si Eliza R. Snow, ikaduhang kinatibuk-ang presidente sa Relief Society, mitudlo: “Si Pablo nga Apostol sa karaan namulong kabahin sa balaang kababayen-an. Katungdanan sa matag usa kanato ang pagkahimong usa ka balaan nga babaye. Kinahanglan nga aduna kitay mas taas nga mga tumong, kon kita balaan nga kababayen-an. Kinahanglan kitang mobati nga kita gitawag sa pagpahigayon og importanting mga katungdanan. Walay bisan usa nga dili labut niini. Walay sister nga mag-inusara, ug ang iyang luna hilabihan ka hagip-ot apan ang iyang mahimo dakog ikatabang sa pag-establisar sa Gingharian sa Dios dinhi sa yuta.”¹

Mga sister, wala kita mag-inusara gani ang atong luna dili ingon ka hagip-ot. Pinaagi sa pagdawat sa gasa sa pagkaaktibo sa Relief Society, nahimo kita nga kabahin sa unsay gihulagway ni Propeta Joseph isip usa ka katilingban “nahimulag gikan sa tanang kadautan sa kalibutan—pinili, hiyasnon, ug balaan.”²

Kini nga kapunongan nagtabang kanato sa paglig-on sa atong pagtuo ug motubo sa espiritwalidad pinaagi sa paghatag kanato nga makapangulo, makaserbisyo, ug mga oportunidad sa pagtudlo. Sa atong pagserbisyo usa ka bag-o nga aspeto ang madugang sa atong kinabuhi. Molambo kita sa espiritwal, ug sa atong pagbati nga nahisakop, pagkatawo, ug ang bili sa kaugalingon molambo. Atong maamguhan nga ang tibuok katuyoan sa plano sa ebanghelyo mao ang paghatag og oportunidad alang kanato sa pagkab-ot sa kinatas-an sa atong potensyal.

Ang Relief Society nagtabang kanatong maandam sa pagdawat sa mga panalangin sa templo, sa pagtahud sa mga pakigsaad nga atong gihimo, ug manginlabut sa katuyoan sa Zion. Ang Relief Society nagtabang kanato nga molambo ang atong pagtuo ug personal nga pagkamatarung, paglig-on sa mga pamilya, ug sa pagpangita ug sa pagtabang sa mga nanginahanglan.

Ang buhat sa Relief Society balaan, ug ang paghimo og balaan nga buhat nagmugna og kabalaan diri kanato.

Silvia H. Allred, unang magtatambag sa kinatibuk-ang kapangulohan sa Relief Society.

Gikan sa mga Kasulatan

Exodo 19:5; Salmo 24:3–4; 1 Mga Taga-Tesalonica 4:7; Tito 2:3–4; Doktrina ug mga Pakigsaad 38:24; 46:33; 82:14; 87:8; Moises 7:18

Gikan sa Atong Kasaysayan

Namulong ngadto sa Female Relief Society sa Nauvoo, si Propeta Joseph Smith mihatag og gibug-aton sa kabalaan, mipasabut nga kon ang mga sister mahimo nga putli ug balaan, makahimo sila og minarkahan nga impluwensya dinhi sa kalibutan. Mipasabut siya: “Kaaghop, gugma, kaputli—kini mao ang mga butang nga mopatigbabaw kaninyo. … Kini nga Kapunongan … makabaton og gahum sa pagmando sa mga rayna diha taliwala kanila. … Ang mga hari ug mga rayna sa yuta moadto sa Zion, ug moyukbo.” Ang mga sister sa Relief Society nga nagsunod niini nga mga pakigsaad angay nga tahuron dili lang sa tawo nga mga dungganan, apan “kon kamo mopuyo sumala sa inyong mga pribilehiyo,” si Joseph misaad sa mga sister, “ang mga anghel dili mapugngan nga mahimo ninyong mga kauban.”³

Samtang ang mga sister moapil sa buhat sa pagserbisyo ug sa pagluwas sa uban, mamahimo sila nga balaan sa ilang kaugalingon. Si Lucy Mack Smith, ang inahan sa Propeta, mipaambit sa mga maayo nga makab-ot sa Relief Society: “Kinahanglan nga atong panggaon ang usag usa, mag-atiman sa usag usa, maghupay sa usag usa, ug magbaton og panudlo, nga unta kitang tanan magkauban sa langit.”⁴

Paghulagway sa litrato pinaagi ni Christina Smith