Ang Sambingay sa Punoan sa Saging

Ang mga punoan sa saging komon sa akong gipuy-an sa Sri Lanka. Humok ang lawas niini, nga dali rang hiwaon og kutsilyo, apan walay manghilabut sa punoan sa saging tungod kay naghatag kini og lami nga bunga.

Daghang katuigan na ang milabay sa dihang bata pa ko, dihay grabe nga bagyo. Pagkahuman gayud niini, migawas ko ug nakita nga ang usa sa mga punoan sa among saging napadpad; naibut ang punoan ug nangagisi ang mga dahon. Naghunahuna ko nga ang pagputol sa lawas sa natumbang punoan makalingaw, busa misulod ko sa balay ug mikuha og kutsilyo. Apan sa dihang putlon na unta nako, gipugngan ko sa akong lolo.

“Ayaw gayud hilabti ang punoan sa saging,” miingon siya.

“Apan ngano man?” nangutana ko. “Dili na kini maayo, ug kini makalingaw.”

Ang akong lolo walay gisulti apan iya ko nga gisinyasan nga mosunod kaniya. Gisultihan ko niya nga magputol og dakong lipak. Dayon gidala ko niya og balik ngadto sa dapit diin ang punoan sa saging natumba. Bisan kon wala nay kapuslanan tan-awon, miadto kami aron sa pagtrabaho sa pagpabarug niini. Sa dihang ang lawas nagbarug na, gitukuran namo kini sa lipak.

“Anton,” miingon ang akong lolo, “gusto ko nga bantayan nimo kining punoan sa saging kada adlaw ug siguroa nga magpabilin kining nagbarug. Kada adlaw kinahanglan nimo kining bisbisan ug atimanon.”

Busa kada buntag akong tan-awon ang punoan sa saging aron sa pagsiguro nga ang lawas nagbarug. Kada adlaw pun-on nako sa tubig ang balde ug mainampingong mibu-bu niini libut sa mga gamot. Makugihon ko sa paghatag sa punoan og pag-atiman nga gikinahanglan niini.

Wala madugay aduna nay puso ug, wala madugay human niana, mga saging. Sa dihang nahinog na ang bunga, si Lolo mihatag og saging ngadto sa matag sakop sa pamilya. Nagtan-aw ko nga nalipay samtang gipanitan ug gikaon nila kini. Walay mga saging nga ingon ka lami sama niadto, ug kini naghatag kanako og kalipay nga makita ang akong pamilya nga nagkaon niini.

Kana dugay na kaayo, sa wala pa ako makakaplag sa Ang Simbahan ni Jesukristo sa mga Santos sa Ulahing mga Adlaw. Apan ang mga leksyon nga akong nakat-unan samtang nag-atiman ko sa punoan sa saging nagamit sa akong kinabuhi karon. Sa akong mga calling sa Simbahan ingon man usab sa akong medikal nga trabaho, kanunay ko nga makakita og mga tawo nga anaa sa lisud nga mga kahimtang. Sama nianang punoan sa saging, kining mga tawhana mga sinalikway, nawad-an sa katahum, ug natapos na—bisan gani diha sa ilang kaugalingong panan-aw. Kon maghunahuna ko nga pasagdan sila, akong mahinumduman ang katam-is sa bunga nianang punoan sa saging ug makakaplag og kaisug sa pagtabang kanila sa pagpabarug, pagtukod kanila, pag-atiman kanila, ug pag-amuma kanila kada adlaw sama sa buhaton sa Manluluwas.

Ang mga saging nga gikaon sa akong pamilya tam-is, apan ang Basahon ni Mormon nagsaysay sa laing matang sa bunga—ang usa nga “hilabihan ka tam-is” ug “madanihon labaw sa tanan nga mga bunga” (tan-awa sa 1 Nephi 8:11–12). Kita makakaplag og hingpit nga kalipay samtang kita motabang niadtong kinsa nanlimbasug sa pagpangita sa ilang agianan lahus ngadto sa mga gabon sa kangitngit ug mogiya kanila sa pagkaon sa bunga nianang tam-is labaw sa tanan—ang bunga sa kinabuhing dayon.