Gitawag aron sa Pag-impluwensya

Sa dihang gitawag ko sa pagserbisyo isip adviser sa Mia Maid sa organisasyon sa Young Women, nagduhaduha ko kon makatuman ba ko sa calling. Wala ko magtuo nga ang batang mga babaye ganahan ba nako o makakat-on ba og bisan unsa gikan kanako, ilabi na sa dihang akong naamgohan kon unsa ka lahi ang mga butang karon alang kanila kay sa unsa kini kaniadto sa nag-edad pa ko sama nila.

Kana nga pagbati nausab pipila ka semana sa akong calling sa dihang mitambong ko og usa ka kalihokan sa Young Woman. Atol sa kalihokan ang usa ka inahan mipahayag kon unsa siya ka mapasalamaton sa programa sa Young Women tungod kay nakapalig-on kini sa iyang anak batok sa tintasyon. Ang iyang mga pulong nakatabang kanako nga masabtan kon unsa gayud ka importante ang akong tahas.

Akong naamgohan nga ang akong calling mas labaw pa kay sa pagtudlo og mga leksyon matag Dominggo ug sa pagtabang og plano sa mga kalihokan. Kini usa ka calling nga makatabang niining batan-ong mga babaye nga mangandam alang sa umaabut—sa pag-adto sa templo, pagserbisyo diha sa Simbahan, ug sa pagkahimong maayo nga mga inahan. Kinahanglan ko nga motabang kanila sa pagpangandam sa kinabuhi.

Ang mga calling sa Simbahan nagagikan sa atong mahigugmaong Langitnong Amahan. Nasayud Siya sa atong mga panginahanglan ug sa mga panginahanglan niadtong atong serbisyohan. Ang pagkasayud niana makatabang kanato nga magbaton og hugot nga pagtuo diha Kaniya ug pagsalig sa atong kaugalingon, bisan kon kita wala makasabut kon nganong gihatagan kita og piho nga buluhaton o kon kita wala mobati nga sigurado mahitungod sa atong abilidad sa pagtuman sa usa ka calling. Kita makapasalamat sa atong mga oportunidad sa pagserbisyo ug nga kita angayan nga makaangkon og calling, ug kita makakuha sa oportunidad nga makat-on kutob sa atong mahimo samtang naglambo kita diha sa ebanghelyo.