Pagtabang uban sa Matinabangon nga Kamot

Kitang tanan kinahanglan nga mapahinumdoman sa nangagi. Gikan kini sa kasaysayan nga kita makabaton og kahibalo nga makapalikay kanato sa balik-balik nga mga sayop ug pinaagi niini kita makatukod sa umaabot. …

Dad-on ko kamo pagbalik sa kinatibuk-ang komperensya niadtong Oktubre 1856. Sa Sabado nianang komperensya si Franklin D. Richards ug ang pipila sa mga kaubanan miabut sa [Walog sa Salt Lake]. Sila nagbiyahe gikan sa Winter Quarters uban sa kusgan nga mga hayop ug gaan nga mga karwahe ug nakaabut sa sakto nga panahon. Si Brother Richards diha-diha dayon nakigkita kang Presidente Young. Siya mireport nga dunay gatusan ka mga lalaki, mga babaye, ug mga bata nga nagkatag sa taas kaayo nga agianan gikan sa Scottsbluff padulong dinhi nga walog. Kadaghanan kanila nagbira og mga karomata. Sila giubanan sa duha ka mga karwahe nga gisangunan sa pagtabang kanila. Sila nakaabut na sa dapit nga katapusang kinasang-an sa North Platte River. Unahan kanila adunay usa ka agianan nga tungason hangtud sa Continental Divide nga pila pa ka milya ang gilay-on. …

Pagkabuntag [si Presidente Young] miadto sa karaang Tabernakulo nga natukod sa [Temple Square]. Siya miingon sa mga katawhan:

“… Daghan sa atong mga kaigsoonan anaa karon sa kapatagan nga may karomata, ug tingali karon daghan kanila ang anaa sa pito ka gatus ka milya gikan niining lugara, ug sila kinahanglan nga madala dinhi, kinahanglang magpadala kita og tabang ngadto kanila. …

“Kana mao ang akong tinuohan; kana mao ang giingon sa Espiritu Santo nga anaa kanako. Mao ang pagluwas sa mga tawo.

“Ako manawagan karon sa mga Bishop. Dili ako makapaabut og ugma, ni sa sunod adlaw, sa 60 ka himsog nga mga hayop nga asno ug 12 o 15 ka mga karwahe. Dili ko gusto nga magpadala og mga baka. Gusto ko himsog nga mga kabayo ug mga asno. Kini anaa dinhi nga Teritoryo, ug kinahanglan nga matapok nato kini. Usab 12 ka tonilada nga harina ug 40 ka maayong tigdrayb sa karwahe, gawas niadtong tigdrayb sa hayop.

“Sultihan ko kamo nga ang tanan ninyong pagtuo, tinuohan, ug propesyon sa tinuohan, dili gayud makaluwas og usa ka kalag ninyo sa Celestial nga Gingharian sa atong Dios, gawas kon mobuhat kamo bisag sa ingon nga mga baruganan sama sa gitudlo nako ninyo karon. Adtoa ug dad-a ngari karon kadtong mga tawo nga anaa sa kapatagan.”¹

Nianang pagkahapon, daghan kaayong pagkaon, gamit sa pangkatulog, ug sinina ang natapok sa mga babaye.

Pagkabuntag, ang mga kabayo gisinapinan ug ang mga karwahe gipang-ayo ug gipuno.

Pagkasunod buntag, Martes, 16 ka hayop nga asno mibiyahe ug mipaingon sa silangan. Sa katapusan sa Oktubre, adunay 250 ka mga hayop ang milakaw aron sa paghatag og kahupay.

Talagsaon nga mga wali ang nasangyaw gikan niini nga pulpito, akong mga kaigsoonan. Apan walay mas larino kaysa kadtong gipamulong ni Presidente Young niadtong mga sirkumstansya.

… Mga istorya sa ilang pagluwas kinahanglan nga balikon og kadaghan. Kini naghisgot sa labing mahinungdanon sa ebanghelyo ni Jesukristo. …

… Adunay daghan kanato kinsa naghilak sa kasakit ug pag-antus ug kamingaw ug kahadlok. Ang atoa mao ang dako ug sagradong responsibilidad sa pagduol ug pagtabang kanila, sa pagbayaw kanila, sa pagpakaon kanila kon sila gutumon, sa pag-amuma sa ilang mga espiritu kon sila uhawon sa kamatuoran ug pagkamatarung.

Daghan kaayong mga batan-on kinsa naglatagaw nga walay tumong ug naglakaw diha sa makadaut nga dalan sa drugas, mga gang, imoralidad, ug ang tibuok problema nga resulta niining mga butanga. Adunay mga biyuda kinsa naghandum og mahigalaong mga tingog ug ang diwa sa kabalaka nga nagpakita sa gugma. Kaniadto adunay mainiton sa tinuohan apan kansang pagtuo nagkabugnaw. Daghan kanila ang nanghinaut nga mobalik apan wala kaayo masayud kon unsaon. Sila nanginahanglan og mahigalaong mga kamot sa pagtabang kanila. Uban sa gamay nga paningkamot, daghan kanila ang makabalik pag-usab sa salo-salo sa lamesa sa Ginoo.

Akong mga kaigsoonan, maglaum ko, mag-ampo ko, nga ang matag usa kanato … mobuhat sa pagpangita niadtong nanginahanglan og tabang, niadtong nawad-an sa paglaum ug anaa sa lisud nga mga sirkumstansya, ug ibayaw sila diha sa diwa sa gugma sa paghangop sa Simbahan, diin ang lig-ong mga kamot ug mahigugmaong mga kasingkasing makapadasig kanila, makapahupay kanila, makatabang kanila, ug makapahimutang kanila sa paagi nga malipayon ug mabungahon nga kinabuhi.

Akong ibilin kaninyo akong gihigugmang mga higala, akong mga kaubanan sa trabaho niining talagsaon nga kawsa, akong pagpamatuod sa kamatuoran niining buluhaton, ang buluhaton sa Labing Gamhanan, ang buluhaton sa Manunubos sa tanang katawhan.