Kinahanglan Ba Natong Ibaligya ang Atong Gipangandoy nga Balay?

Niadtong 1998 ang Espiritu mahinamong nagdasig kanako sa pagbaligya sa among gipangandoy nga balay, nga among nakompleto ug gipuy-an mga upat pa lang ka tuig ang milabay. Sa dihang ang mas magulang namo nga mga anak nakahuman og high school ug mibalhin, naklaro nga ang among balay mas dako og lugar ug mas gasto kaysa among gikinahanglan. Bag-ohay lang ko nga nagbag-o og trabaho nga gamay ang akong sweldo nga imposibleng makapaigo sa galastuhan.

Sa dihang mitambong ko sa sesyon sa priesthood sa kinatibuk-ang komperensya niana nga Oktubre, natandog ko sa mga pulong ni Presidente Gordon B. Hinckley (1910–2008). Namulong kabahin sa among mga panalapi, iyang giingnan ang mga tighupot sa priesthood, “Miabut na ang panahon nga kinahanglan natong ipahimutang ang atong mga panimalay.” Dayon siya mipasidaan, “Adunay timailhan sa maunuson nga panahon sa unahan nga kinahanglan natong pangandaman.”

Sa wala madugay sa iyang pamulong siya miingon: “Mahimong kinahanglanon nga mangutang aron makatukod og balay, siyempre. Apan mopalit kita og balay nga kita makabayad ra ug sa ingon gaan ang pagbayad nga kanunay natong gihunahuna nga dili na gyud mahangyo o mahunong kutob sa 30 ka tuig.¹

Akong gisultihan ang akong asawa kabahin sa tambag ni Presidente Hinckley, nagdugang nga akong gibati nga kinahanglang ibaligya ang among balay. Sa akong katingala, siya miuyon.

Sa sunod nga mga bulan, kami nangandam sa pagbaligya sa among balay ug mopalit og lain. Dugay kadto, kuti kaayo nga proseso nga naglangkob og daghang pag-ampo ug pagpuasa sa pamilya. Sa katapusan, usa ka tuig ang milabay mibalhin kami sa among bag-o nga balay, nga mas barato ang matag bulan nga bayad.

Ang mga pulong ni Presidente Hinckley sa tinuoray nagpakita nga propetikanhon. Pagkasunod tuig ang U.S. stock market mitiurok samtang ang dot-com [kompanya nga nakabasi sa internet] nga mga kompanya mibarato ang bili. Sulod sa pipila ka tuig ang pag-ubos sa interest rate misunod, nga kami nakabentaha sa pagbayad sa among utang sa balay.

Karon bag-ong krisis sa ekonomiya ang anaa sa daghang mga nasud sa tibuok kalibutan. Ang mga pulong ni Presidente Hinckley tinuod gayud karon sama niadtong 1998.

Malipayon kaayo kami nga among gisunod ang tambag sa propeta ug ang aghat sa Espiritu. Wala na kami utang sa balay, ug kami nalipay nga nakakita sa among mga anak nga nagpuyo sumala sa ilang kinitaan.

Kami maghinam-hinam sa matag kinatibuk-ang komperensya alang sa mga tambag sa atong mga lider sa Simbahan. Kami nasayud nga kita mapanalanginan kon kita mosunod sa ilang direksyon.