Si Jesus Mipanalangin sa mga Bata

Si Jairo ug ang iyang asawa milingkod sa higdaanan tapad sa ilang anak nga babaye ug nabalaka. Ang ilang anak nga babaye nagkagrabe ang sakit sa matag oras nga molabay, ug sila nahadlok nga siya mamatay. Usa na lang ka butang ang ilang nahibaloan nga mabuhat aron makatabang kaniya.

Si Jairo nagdali-dali sa pag-adto sa mga kadalanan sa Capernaum aron sa pagpangita kang Jesus nga Nazareno. Si Jairo nasayud nga si Jesus nakaayo sa mga tawo. Tingali si Jesus moanhi ug moayo sa iyang anak nga babaye.

Sa ubos duol sa baybayon ang mga tawo nagpundok diin si Jesus mikanaog gikan sa usa ka sakayan. Si Jairo misuot sa pundok hangtud nga naduol siya sa Ginoo. Si Jairo miluhod ug miingon kang Jesus nga ang iyang anak nga babaye nagmasakit ug himatyon.

“Adtoa ug itapion ang imong mga kamot diha kaniya, aron mamaayo ug mabuhi siya,” mihangyo si Jairo.

Si Jesus miuyon, ug daghang mga tawo ang misunod kanila.

Usa ka mensahero ang nagdali-dali sa pagsugat kanila ug misulti kang Jairo nga ang iyang anak nga babaye patay na. Ulahi na kaayo alang kang Jesus sa pag-adto ug sa pagtabang. Si Jesus miingon kang Jairo, “Ayaw kahadlok, sumalig ka lamang.”

Sa dihang miabut na sila sa balay ni Jairo, dihay kusog kaayo nga pagbakho ug kasaba. Daghang mga tawo anaa sa balay, nagdanguy-ngoy sa kasubo.

Si Jesus misulod sa panimalay ug miingon kanila nga dili maghilak, tungod kay ang babaye wala mamatay apan natulog lamang. Gikataw-an si Jesus sa ubang mga tawo. Sila nasayud nga ang batang babaye patay na.

Dayon gipapahawa ni Jesus ang tanang mga tawo nga sabaan. Iyang gipaduol si Jairo ug ang iyang asawa, uban sa Iyang mga Apostoles nga sila si Pedro, Santiago, ug Juan, ngadto sa kwarto diin ang batang babaye naghigda.

Gikuptan ni Jesus ang kamot sa batang babaye ug miingon, “Inday, magaingon ako kanimo, bumangon ka.”

Ang batang babaye mibangon. Ang iyang mga ginikanan natingala ug nalipay. Ang ilang anak nga babaye buhi!

Dihay uban pang mga higayon diin si Jesus miayo ug mipanalangin sa mga bata. Usa ka adlaw sa Perea, daghang mga tawo ang nagpundok palibut sa Manluluwas, naminaw Kaniya nga nagtudlo. Pipila sa mga tawo midala sa ilang mga anak aron makakita kang Jesus ug aron mapanalanginan Niya.

Ang mga disipulo ni Jesus nakakita sa mga bata ug misulay sa pagbadlong kanila. Si Jesus nagkapuliki uban sa daghang mga tawo, ug ang mga bata mora og dili kaayo importante. Apan si Jesus miingon sa mga disipulo, “Paduola kanako ang gagmayng kabataan, ug ayaw ninyo sila pagpugngi, kay ang gingharian sa Dios ila sa mga sama kanila.”

Dayon gigakos ni Jesus ang matag bata. Iyang gipandungan ang ulo sa matag usa kanila ug mipanalangin kanila. Si Jesus miingon sa mga hamtong nga sila kinahanglan nga magmapainubsanon sama sa gagmayng mga bata.