Adto sa Simbahan!

Panahon sa akong junior year sa high school, nakahimamat ko og usa ka babaye nga Santos sa Ulahing mga Adlaw sa akong klase sa art. Siya adunay dakong impluwensya sa akong kinabuhi, ug nabunyagan ko sa Simbahan.

Human sa akong paggradwar sa high school, sila si Mama ug Papa nakahukom nga mobalhin gikan sa California ngadto sa Idaho, USA. Among gikaw-it ang among trailer ngadto sa among trak ug mipaingon sa amihan. Mao pa lang ang among pag-agi sa Lovelock, Nevada, sa dihang misugod ko sa pag-drive og paspas paubos sa gamayng bungtod. Tungod kay walay mga ali aron mopugong sa trailer, misugod kini sa pagbunalbunal sa isig ka kilid. Gikusog nakog tindak ang mga brake, ug ang trailer mibabag, nalabay kami sa kanal ug ang trak natuwad sa pikas ug ang trailer natuwad sa pikas.

Swerte lang kay walay naangol. Apan ang gawas ug sulod sa trailer guba kaayo. Ang kaw-it sa trailer nabawog nga morag pretzel, ang mga bintana nangabuak tanan, ug ang among mga gamit nagkatag bisan asa.

Miabut ang highway patrol ug mitawag og trak nga moguyod. Si Mama ug si Papa wala masayud unsay buhaton. Ang ilang gamayng kwarta naadto ra sa kompanya sa tigguyod. Niining higayuna gibati nako ang hilabihan ka kusog nga pagbati nga kinahanglan ko nga moadto sa simbahan pagkasunod adlaw, Dominggo. Si Papa, kinsa dili miyembro sa Simbahan, naghunahuna nga nayabag na ko. Kinahanglan namong tapukon ang among mga gamit ug ayohon ang trailer, ug tungod kay naglisud man siya og lakaw ug luya na, ako ra ang mohimo niini. Apan ang pagbati nga moadto sa simbahan nagpadayon. Mihangyo ko ni Mama nga hangyoon si Papa. Gihimo niya, ug makapahingangha nga misugot siya.

Pagka-Dominggo sa buntag nakit-an nako ang meetinghouse ug milingkod sa luyo nga lingkuranan sa chapel ingon nga mao pa gyud ang pagsugod sa sakrament miting. Nag-ampo ko nga ang Espiritu magauban sa akong pamilya niining lisud nga panahon.

Sa katapusan sa miting, usa o duha ka tawo ang mipaila-ila sa ilang kaugalingon ngari kanako, ug gipasabut nako og kadiyot kon unsay nahitabo. Dayon mibalik ko sa dapit nga among nahimutangan ug migahin sa tibuok adlaw sa pagtabang og panglimpyo sa mga butang.

Pagka-Lunes sa buntag nagsugod na usab kami sa pagpanglimpyo sa dihang sa kalit lang ang mga miyembro sa ward nga akong gitambongan nagsugod sa pagpangabut, nagtanyag og tabang. Ang tag-iya sa tindahan nga himuanan og mga bintana miingon nga iyang ilisan ang tanang mga bintana sa trailer nga walay bayad, ug ang welder mitanyag nga iyang tul-iron ang kaw-it nga libre.

Ang akong amahan gamay ra og gisulti apan makita gayud nga nahingangha, mitulo ang mga luha ni Mama sa pasalamat, ug ang akong igsoong babaye ug ako mapasalamaton kaayo alang sa tabang. Sa hapit na motapos ang adlaw, andam na kami nga mopadayon sa among biyahe paingon sa Idaho.

Isip resulta niini nga kasinatian, akong nakat-unan nga ang mga pag-aghat sa Espiritu tinuod. Nasayran usab nako nga ang atong mga pag-ampo kanunay nga tubagon pinaagi sa ubang mga tawo ug nga ang pagsalig sa Ginoo maghatag og kalinaw ug kalipay sa atong mga kasingkasing.