Usa ka Kanta ug usa ka Pag-ampo

Ni Adam C. Olson

Mga Magasin sa Simbahan

Sa dihang si Dillon wala makaabut sa taas nga nota, iyang naabut ang mas taas nga tabang nga iyang gikinahanglan.

Si Dillon adunay dakong problema: ang iyang labing maayo nga talento mao usab ang iyang labing gikahadlokan. “Ganahan kaayo ko nga moawit,” ang 16 anyos nga Tongan miingon, “apan dili sa atubangan sa mga tawo. Mahadlok kaayo ko.”

Hunahunaa ang iyang kakulba sa dihang ang Simbahan sa Tonga mipahibalo sa audition alang sa tig-awit sa pagrekord sa Tongan nga bersyon sa soundtrack sa seminary sa Daang Tugon. Siya naghinam-hinam ug nahadlok pag-ayo.

Tulo ka mga kanta sa soundtrack nanginahanglan og lalaki nga tig-awit. Pagkahuman og awit ni Dillon sa kanta nga iyang gi-audition, ang producer misurprisa kaniya pinaagi sa paghangyo kaniya sa pag-awit og laing usa sa mga kanta sa soundtrack. Bisan sa iyang kakuyaw, nahimo niya kini, ug ang producer miingon, “Atong nakit-an ang atong mag-aawit.”

Hilabihan ang iyang kahinam—ug kadismaya—si Dillon gitanyagan sa oportunidad sa pag-rekord sa tanang tulo ka kanta.

Ang Talento ni Dillon, Kahadlok ni Dillon

Si Dillon, miyembro sa Ma‘ufanga Ward, Nuku‘alofa Tonga Stake, nanghawud sa eskwelahan. Siya usa sa mga 10 porsyento sa mga estudyante nga Tongan nga napili nga motungha sa gobyerno nga eskwelahan. Ganahan usab siya sa seminary. “Iya kaming pabangunon og sayo aron siya makatambong og seminary,” miingon ang iyang inahan, si Malenita Mahe.

Apan ang pag-awit mao ang iyang ganahan pag-ayo—bisan tuod ang iyang pamilya wala masayud hangtud nga usa niana ka tuig siya gihangyo sa pag-awit og solo sa programa sa Primary.

“Si Dillon sa kanunay maulawon gayud,” miingon ang iyang inahan.

Maayo kaayo ang iyang pagkanta sa programa sa Primary nga gihangyo siya sa pagkanta sa komperensya sa Nuku‘alofa Tonga Stake. Human niana kanunay na siyang pakantahon.

Iyang gisultihan ang iyang mama, “Moabut ang adlaw nga akong gamiton ang akong talento alang sa Dios.” Human nga siya ang napili sa pagkanta sa soundtrack, siya miingon kaniya, “Ma, akong gigamit ang akong talento.”

Ang magulang nga lalaki ni Dillon, si Sione, miingon nga iyang gi-awhag si Dillon sa pagkanta. “Ganahan kaayo ko nga makabaton sa talento nga anaa kaniya,” siya miingon. “Ang tanan gusto nga iya kining ipakigbahin.”

“Ganahan kaayo ko kon siya mokanta,” miingon ang iyang igsoon nga babaye, si Pea.

“Gusto ko nga makakanta sama kaniya sa umaabut nga adlaw,” miingon ang iyang nuwebe anyos nga igsoong lalaki, si Paula.

Si Dillon mapasalamaton sa suporta sa iyang pamilya. “Gihigugma ko ang akong pamilya,” siya miingon. “Sigurado ko nga uban sa ilang tabang, mahimo nako ang akong mga kahuyang nga kalig-on.”

Pagkab-ut sa Mas Taas

Samtang si Dillon nagtrabaho uban sa sound crew sa pagrekord sa mga kanta, siya naglisud sa usa ka nota. “Dili ko makaigo niini,” siya miingon. “Nagpraktis nami sulod sa daghang oras.”

Sa katapusan, gikapoy ug nawad-an og kadasig, siya miuli nianang gabhiuna, nasayud nga pagkaugma kinahanglan niyang i-rekord ang kanta.

“Mideretso ko sa akong kwarto ug nag-ampo ngadto sa akong Langitnong Amahan sa pagtabang kanako,” siya miingon.

Ang iyaha ra gyud nga gihunahuna kon unsa kaimportante ang soundtrack ngadto sa 50,000 ka mga miyembro sa Simbahan sa Tonga, ingon man sa liboan ka mga tawo kinsa makasulti og Tongan sa tibuok kalibutan.

“Mao kadto ang usa ka gabii sa akong kinabuhi nga dili ko makatulog,” miingon siya.

Human sa pag-ampo ug gamay nga katulog niadtong gabhiuna, si Dillon misulod sa recording studio ug miigo sa nota.

“Alleluya,” siya nakahinumdom nga nagsulti. “Malipayon ko.”

Ayaw og Kahadlok

Usa sa paborito nga kasulatan ni Dillon mao ang Josue 1:9: “Magmakusganon ka ug magmaisug; ayaw pagkahadlok, ug dili ka magmaluya: kay ang Ginoo nga imong Dios magauban kanimo bisan asa ikaw paingon.”

Gisulayan kini nga saad ni Dillon, ug iyang nasayran nga kini tinuod. “Akong gihimo ang akong labing maayo. Akong gibutang ang tanan nakong paningkamot ug kasingkasing ngadto sa mga kanta aron ang mga tigpaminaw mobati sa Espiritu.”

Samtang nabuntog ni Dillon ang iyang kahadlok ug nagpalambo sa iyang mga talento, siya miila nga siya nakadawat og daghang tabang—dili lamang gikan sa iyang pamilya apan gikan usab sa iyang Langitnong Amahan.

“Nasayud ko,” siya miingon, “nga ang Dios mitubag sa akong mga pag-ampo.”