Makahatag Ka Ba Kanako og Panalangin?

Ang snow kusog kaayo samtang hinay-hinay ko sa pagdrayb patungas sa bungtod. Kon makaabut lang ko sa ibabaw, sa akong hunahuna, makauli gyud ko sa balay nga luwas [safe] ra. Apan sa dihang moliko nako, nakakita ko og usa ka naglugsong nga sakyanan nga nag-ikis-ikis nga dili makontrolar ug midiretso gayud ngari kanako. Igo ra gyud ko nga nakasyagit sa wala pa mabangga, ug dayon nawad-an ko sa panimuot.

Wala ko makabantay kon pila na ka oras ang milabay sa dihang ako misulay sa pagbuka sa akong mga mata. Ang snow mitabon sa akong nawong samtang kini misulod sa nagupok nga sa kilid sa bintana. Naningkamot ko sa paghinumdom sa importanting mga impormasyon, sama sa diin ako gikan sa wala pa ang aksidente. Nag-inusara ug nahadlok, nakahilak ko pag-ayo gikan sa tumang kasakit sa akong abaga ug dughan. Mihangyo ako sa Langitnong Amahan nga ang akong mga kadaot dili unta magrabe ug ako mamaayo ra.

Sa wala madugay gibati nako nga adunay kamot nga migunit kanako. Diha-diha dayon, ako kining gihakop. Gibuka nako ang akong mga mata ug nakakita ako og usa ka lalaki nga itom og coat ug nagkalo nga nagbarug gawas sa akong nabangga nga sakyanan. Miingon siya nga ang iyang asawa nakakita sa disgrasya gikan sa ilang balay, ug siya miadto aron sa pagsuta kon siya aduna bay matabang. Iyang gikuptan ang akong kamot ug giingnan ko nga ma-Ok ra ko.

Naningkamot ko sa pagpangutana sa tawo kon siya usa ba ka Santos sa Ulahing mga Adlaw, apan ang akong ra nga nahunghong mao nga, “Makahatag ka ba kanako og panalangin?”

Siya miingon og oo ug dayon gipasulod niya ang iyang mga kamot sa nabuak nga bintana ug gipandong kini sa akong ulo.

Wala ko makahinumdon kon unsa ang iyang gisulti. Apan ako nakahinumdom nga naghunahuna nga ako mamaayo ra tungod kay nakadawat ko og panalangin. Gibati ko ang kalinaw ug kahupay.

Sa dihang miabut ang ambulansya, wala nako makabantay sa tawo. Mga pipila ka oras ang milabay migawas ko sa ospital nga nabali ang gusok ug daghang mga bun-og ug mga samad-samad apan walay grabe nga kadaot.

Nianang buntaga nag-ampo ko nga ako mobyahe nga luwas, ug sa sinugdanan naghunahuna ko nga ang Langitnong Amahan wala motubag sa akong pag-ampo. Apan sa wala madugay nakaamgo ko nga Siya anaa ug wala ko Niya pasagdi. Ang akong pag-ampo natubag pinaagi sa usa ka andam nga tighupot sa priesthood kinsa nagpuyo duol sa dapit kon asa ako naaksidente, usa ka aksidente nga unta mas makapagrabe sa akong kahimtang.

Dili ko makaila sa nawong sa tawo kon masugatan nako siya sa dalan. Dili ko makahinumdom sa iyang tingog kon makadungog ko niya nga mosulti og hello. Apan ako mapasalamaton alang niining estranghero kinsa takus ug andam nga mopahigayon og panalangin sa priesthod sa dihang nagkinahanglan ko niini.