Mao Lamang Ang Tinuod ug Buhi nga Simbahan

Sa dihang si Jesukristo dinhi pa sa yuta, Iyang gitudlo ang kahingpitan sa Iyang doktrina, mao ang plano nga gilatid sa Langitnong Amahan alang sa mahangturong kalamboan sa Iyang mga anak. Sa wala madugay, daghan niining kamatuoran sa ebanghelyo ang nawala pinaagi sa paghiusa sa mga baruganan o mga pilosopiya sa naglabi nga kalibutan diin ang Kristyanismo gisangyaw ug pinaagi sa pagmanipular sa politikal nga mga lider. Atong gitawag kining hingpit nga pagkawala sa kamatuoran og Apostasiya.

Daghang mga denominasyon sa simbahan o mga pilosopiya nga anaa sa kalibutan karon nga naglangkub, og mas daghan o mas gamay, sa mga kamatuoran nga gipadayag sa Dios sa una, uban sa sinagulan nga mga pilosopiya o pagmanipular sa mga tawo. Kita nagtuo nga kadaghanan sa mga lider ug mga sumusunod sa relihiyon mao ang matinguhaong magtutuo kinsa nahigugma sa Dios ug nakasabut ug moserbisyo Kaniya kutob sa ilang mahimo. Kita may utang kabubut-on sa mga tawo kinsa padayong naghupot sa kahayag sa hugot nga pagtuo ug pagkat-on sulod sa daghang siglo hangtud karon. Gusto nato nga ang tanang nag-imbestigar sa atong simbahan gikan sa laing mga simbahan o mga sistema sa pagtuo nga ipadayon ang tanan nilang nahibaloan nga maayo ug moduol ug sutaon sa unsang paagi kita makadugang sa ilang panabut sa kamatuoran ug sa ilang kalipay samtang sila mosunod niini.

Tungod kay daghan kaayo ang nawala panahon sa Apostasiya, kinahanglan nga ang Ginoo mopahiuli sa kahingpitan sa Iyang doktrina. Kana nagsugod sa atong gitawag og Unang Panan-awon ni Joseph Smith.

Ang kahingpitan sa ebanghelyo ni Jesukristo nagsugod uban sa kasiguroan nga kita nagpuyo isip mga espiritu sa wala pa kita mianhi niini nga yuta. Kini nagsiguro nga kining mortal nga kinabuhi adunay katuyoan. Kini nagtudlo nga ang atong pinaka gusto mao ang mamahimong sama sa atong langitnong mga ginikanan. Ato kining buhaton pinaagi sa pagkahimong angay sa mahimayaong celestial nga kondisyon ug relasyon nga gitawag og kahimayaan o kinabuhing dayon, nga motugot kanato nga magpadayon sa mga relasyon sa atong pamilya hangtud sa kahangturan.

Ang doktrina ni Jesukristo, masabtan sa kahingpitan, mao ang plano diin kita mamahimo kon unsa gayud ang anak sa Dios. Kining walay lama ug hingpit nga kahimtang moresulta gumikan sa makanunayong pagtuman sa mga pakigsaad, mga ordinansa, ug mga aksyon; ang katingbanan sa ensakto nga mga pagpili; ug padayon nga paghinulsol. “Kini nga kinabuhi mao ang panahon alang sa mga tawo sa pagpangandam sa pagsugat sa Dios” (Alma 34:32). Kini nahimong posible pinaagi sa Pag-ula ni Jesukristo ug sa pagkamasulundon sa mga balaod ug mga ordinansa sa Iyang ebanghelyo.

Ang gipahiuli nga ebanghelyo ni Jesukristo masabtan, alang sa tanan, may gahum, ug tinuod. Human sa gikinahanglan nga kasinatian sa mortal nga kinabuhi, ang tanang anak nga mga lalaki ug mga babaye sa Dios sa katapusan mabanhaw ug moadto sa usa ka gingharian sa himaya nga mas nindot kaysa mahunahuna ni bisan kinsa nga mortal. Gawas sa pipila lamang, bisan ang pinakadautan sa katapusan moadto sa usa ka talagsaon—hinoon mas ubos—gingharian sa himaya. Kining tanan mahitabo tungod sa dakong gugma sa Dios alang sa Iyang mga anak, ug kining tanan mahimong posible tungod sa Pag-ula ug Pagkabanhaw ni Jesukristo, “kinsa naghimaya sa Amahan, ug nagtubos sa tanan nga mga binuhat sa iyang mga kamot” (D&P 76:43).

Ang ikaduha ug sigurado nga kinahanglanon nga aspeto sa “mao lamang ang tinuod ug buhi nga simbahan sa ibabaw sa tibuok yuta” mao ang katungod sa priesthood.

Klaro sa Biblia nga ang katungod sa priesthood kinahanglanon ug kini nga katungod kinahanglan nga makompirma pinaagi sa pagpandong sa mga kamot niadtong naghupot niini. Ang katungod sa priesthood dili maangkon gikan sa usa ka tinguha sa pagserbisyo o sa pagbasa sa mga kasulatan. Sa dihang ang katungod sa priesthood nawala tungod sa apostasiya, kinahanglan kining ipahiuli pinaagi niadtong mga nabanhaw na kinsa naghupot niini sa mortalidad ug gipadala aron sa pagkompirmar niini. Kana nahitabo isip kabahin sa Pagpahiuli sa ebanghelyo, ug kanang katungod sa priesthood, uban sa gikinahanglang mga yawe sa pagdirekta sa paggamit niini, anaa niining Simbahan ug wala nay lain.

Isip resulta sa atong pagbaton sa gahum sa priesthood, ang mga lider ug ang tinutugutan nga mga miyembro sa Ang Simbahan ni Jesukristo sa mga Santos sa Ulahing mga Adlaw gihatagan og gahum sa pagbuhat sa gikinahanglang mga ordinansa sa priesthood, sama sa bunyag, ang gasa sa Espiritu Santo, ug ang pagpahigayon sa sakrament.

Ang mga yawe sa priesthood, nga gihuptan sa atong pinalanggang propeta, si Presidente Thomas S. Monson, ug sa tanang ubang mga propeta ug Presidente sa Simbahan, naghatag kaniya og katungod sa pagpadayag alang sa tibuok Simbahan. Kini nga Simbahan “buhi” tungod kay kita adunay mga propeta kinsa nagpadayon sa paghatag kanato og pulong sa Ginoo nga gikinahanglan sa atong panahon.

Ang ikatulo nga rason nganong kita lamang ang tinuod nga Simbahan mao nga anaa kanato ang gipadayag nga kamatuoran kabahin sa kinaiya sa Dios ug sa atong relasyon Kaniya, ug busa kita adunay talagsaon nga pagpamatuod ni Jesukristo. Makahuluganon, ang atong pagtuo sa kinaiya sa Dios mao ang nakapalahi kanato gikan sa pormal nga tinuohan sa kadaghanang Kristiyano nga mga denominasyon.

Ang mga Artikulo sa Hugot nga Pagtuo, ang atong pormal nga deklarasyon sa pagtuo, nagsugod pinaagi sa mosunod: “Kami nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo.” Kita anaa niining pagtuo sa Dios nga Kapangulohan nga susama sa ubang Kristiyanismo, apan alang kanato kini mas lahi kaysa kadaghanan. Kita nagtuo nga kining tulo ka sakop sa Dios nga Kapangulohan tulo ka managbulag ug managlahi nga mga binuhat ug ang Dios nga Amahan dili usa ka espiritu apan usa ka mahimayaong binuhat nga adunay mahikap nga lawas, sama usab sa Iyang nabanhaw nga Anak, si Jesukristo. Bisan managbulag ang pagkatawo, Sila usa sa katuyoan.

Ang Unang Panan-awon ni Joseph Smith mipakita sa naglabaw nga mga konsepto sa kinaiya sa Dios ug sa Diosnong Kapangulohan dili tinuod ug dili makadala sa ilang mga sumusunod ngadto sa padulngan nga gitinguha sa Dios alang kanila (tan-awa sa Joseph Smith—Kasaysayan 1:17–19). Ang sunod-sunod nga pagpagawas sa modernong kasulatan mipadayag sa kaimportante niining importanting kamatuoran ug mihatag kanato sa Basahon ni Mormon. Kining bag-o nga basahon sa kasulatan mao ang ikaduha nga saksi ni Jesukristo. Kini nagpamatuod sa mga panagna sa biblia ug sa mga pagtulun-an sa kinaiya ug misyon ni Kristo. Kini mopalapad sa atong pagsabut sa Iyang ebanghelyo ug sa Iyang mga pagtulun-an atol sa Iyang yutan-ong pagpangalagad. Kini nagsangkap usab og daghang mga pagtulun-an diin kita mahimong masayud sa kamatuoran niining mga butang.

Wala kita mag-agad sa kaalam sa kalibutan o sa mga pilosopiya sa katawhan—bisan unsa pa kini ka dugay o karespetado. Ang among pagpamatuod kang Jesukristo pinasikad diha sa mga pagpadayag sa Dios ngadto sa Iyang mga propeta ug sa tagsa-tagsa kanamo. (Tan-awa sa 1 Mga Taga-Corinto 2:1–5; 2 Nephi 28:26.)

Busa unsa man ang nakapahimo sa atong pagpamatuod kabahin ni Jesukristo sa pagpanghimatuod?

Si Jesukristo Mao ang Bugtong Anak sa Dios, ang Amahan sa Kahangturan. Siya ang Tiglalang niining kalibutan. Pinaagi sa Iyang dili matupngan nga mortal nga pagpangalagad, Siya mao ang atong magtutudlo. Tungod sa Iyang Pagkabanhaw, ang tanan nga nabuhi pagabanhawon gikan sa patay. Siya mao ang Manluluwas, kansang maulaong sakripisyo mibayad sa sala ni Adan ug miabli sa pultahan alang kanato nga mapasaylo sa atong personal nga mga sala nga kita malimpyohan aron makabalik sa presensya sa Dios, atong Amahan sa Kahangturan. Kini mao ang pinakaimportante nga mensahe sa mga propeta sa tanang kapanahonan.

Ako ligdong nga mopamatuod sa akong pagpamatuod ni Jesukristo ug sa katinuod sa Iyang ebanghelyo. Siya buhi, ug ang Iyang ebanghelyo tinuod. Siya mao ang Kahayag ug Kinabuhi sa Kalibutan (tan-awa sa D&P 34:2). Siya mao ang Dalan sa imortalidad ug kinabuhing dayon (tan-awa sa Juan 14:6). Alang kanako, ang milagro sa Pag-ula ni Jesukristo dili gayud matugkad. Apan ang Espiritu Santo naghatag kanako og saksi sa pagkatinuod niini, ug ako nagmaya nga ako makagahin sa akong kinabuhi sa pagsangyaw niini.