Pagdala sa Iyang Pangalan ngari Kanako

Mga pipila ka semana sa akong misyon, misugod ko sa pagbati nga nag-inusara ug gimingaw og gamay. Ganahan kaayo ko isip usa ka misyonaryo, apan ang buluhaton hilabihan ka lisud kaysa akong gihunahuna. Gimingaw ko sa akong mga higala, akong pamilya, ug sa tanang pamilyar nga mga butang sa among balay. Usa ka buntag atol sa akong personal nga pagtuon, hilum ko nga milingkod, gipatuyok-tuyok sa akong mga kamot ang akong name tag, naghandum sa pamilyar nga mga butang. Nanghinaut ko nga makadungog lang og usa ka tawo nga motawag nako sa akong ngalan.

Samtang nagtan-aw ko sa akong name tag, nakabantay ko nga bisan tuod ang akong ngalan wala diha sa tag, akong nakita ang akong apilyedo, ngalan sa Simbahan, ug ang ngalan sa Manluluwas nga nakaimprinta niini. Sa kalit lang akong nabantayan nga adunay usa ka butang nga nakapausab sa akong panglantaw ug sa akong kinaiya. Nakaamgo ko nga isip usa ka misyonaryo wala ko dinhi aron sa pagrepresentar sa akong kaugalingon. Hinoon ako nagserbisyo aron sa pagrepresentar sa akong pamilya nga anaa sa balay ug, labing importante, ako nagrepresentar sa akong Manluluwas ug sa Iyang Simbahan. Akong gibutang ang name tag sa bulsa sa akong polo, ibabaw sa akong dughan. Samtang ako kining gibuhat, misaad ko sa akong Manluluwas nga ako hingpit nga mohatag Kaniya og luna diha sa akong kasingkasing ug hunahuna.

Wala nako mamingaw nga makadungog sa akong ngalan human niadtong buntaga. Sukad niadto ako mibuhat ug miserbisyo kutob sa akong mahimo, mapasigarbuhon nga nagsul-ob sa akong name tag matag adlaw. Sa mga higayon nga ako mosugod sa pagbati nga mawad-an sa kadasig, akong tan-awon ang akong name tag, ug kini makapahinumdom kanako sa akong responsibilidad sa pagsunod sa ehemplo ni Jesukristo.

Naningkamot ko pag-ayo sa pagdala sa Iyang ngalan ngari kanako nga mas hingpit ug mamahimong mas mahisama Kaniya. Samtang ako kining gibuhat, mas mibati ko og paghigugma sa akong mga kompanyon ug niadtong akong giserbisyohan, ang akong pagpamatuod nalig-on, ug nakakaplag ko og hingpit nga kalipay sa misyonaryo nga buhat. Nagsugod ko nga dili unahon ang akong kaugalingon ug nag-focus sa pagserbisyo sa Ginoo.

Nakauli ko sa akong misyon sulod na sa pipila ka tuig, apan ako aduna gihapoy oportunidad sa pagdala sa ngalan sa Manluluwas sa akong kaugalingon. Sa pagkatinuod, isip mga miyembro sa Simbahan, kitang tanan mipasalig nga dad-on nato ang ngalan ni Kristo matag adlaw nga Igpapahulay kon kita moambit sa sakrament. Samtang ato kining gibuhat, kita misaad sa pagrepresentar sa atong Manluluwas kutob sa atong mahimo ug maningkamot nga mas mahisama Kaniya. Sama sa gitudlo ni Haring Benjamin: “Ako manghinaut nga kamo kinahanglan modala diha kaninyo sa ngalan ni Kristo. … Kinsa kadto nga magbuhat niini makaplagan sa tuo nga kamot sa Dios, kay siya masayud sa ngalan diin siya pagatawgon pinaagi sa ngalan ni Kristo” (Mosiah 5:8–9). Pinaagi sa pagdala sa Iyang ngalan ngari kanato, matag usa kanato makakaplag og mas daghang katuyoan ug kalipay sa atong yutan-on nga mga misyon.