Ang Akong Lawas Templo sa Dios

Piyonga ang inyong mga mata ug hunahunaa ang usa ka templo. Unsa ang kolor niini? Unsa kini kadak-a? Aduna ba kini mga bintana? Aduna ba kini mga spire? Pila ka buok?

Ang tanang mga templo sa Ang Simbahan ni Jesukristo sa mga Santos sa Ulahing mga Adlaw managlahi. Ang Templo sa Salt Lake didto sa Utah adunay gray nga granite nga mga bongbong ug unom ka mga spire. Lahi kini tan-awon kay sa Templo sa Cardston Alberta didto sa Canada, nga adunay mga bongbong nga bato apan walay mga spire. Bisan kon ang matag templo managlahi tan-awon, ang tanan maanindot ug gitukod alang sa sama nga katuyoan. Kini ang mga dapit diin ang espesyal nga mga ordinansa gipahigayon nga gikinahanglan kanato aron makabalik ngadto sa Langitnong Amahan.

Ikaw sama sa templo. Ikaw lahi kay sa sa uban, apan ikaw usa usab ka balay alang sa Espiritu sa Dios—ang Espiritu Santo. Si Apostol Pablo miingon: “Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod ninyo? … Ang templo sa Dios balaan, ug kanang temploha mao kamo” (1 Mga Taga-Corinto 3:16–17). Ang imong lawas usa ka templo alang sa imong espiritu.

Ingon nga imong gitratar ang mga templo uban sa pagtahud, kinahanglan nimo nga itratar ang imong lawas uban sa pagtahud. Makahimo ka niini pinaagi sa pagsunod sa Pulong sa Kaalam (tan-awa sa D&P 89), pinaagi sa pagsinina og tarung, ug pinaagi sa pagpabiling limpyo sa imong lawas. Kinahanglan usab ka nga mopabilin sa imong kasingkasing ug hunahuna nga limpyo pinaagi sa pagbasa, pagpaminaw, ug pagtan-aw lamang og “mga butang nga makapahimuot sa Langitnong Amahan” (tan-awa sa Akong mga Sumbanan sa Ebanghelyo).

Kon ikaw limpyo sa hunahuna ug sa lawas, ikaw makadawat og dagkong mga panalangin.