Iyaha Ba Gyud Kong Gisugo Niana?

Naglingkod ug nagtutok ko nga dili makatuo samtang si Brother Jarman, usa sa sakop sa kapangulohan sa branch, nagpaabut sa akong tubag.

Tingali ang buot niyang isulti mao ang magtutudlo o magtatambag. Apan dili mao. Ang akong nadungog sakto; iya kong gitawag isip presidente sa Relief Society sa among gamay nga branch.

Naglingkod gihapon ko sa makadiyot namalandong sa akong sitwasyon. Ako 27 anyos pa lang ug wala pa maminyo. Bag-ohay lang ko nga mibalhin sa dapit ug bag-o lang nga nagsugod og trabaho isip journalist. Limitado ang akong kasinatian sa pagpangulo. Nakaserbisyo ko og pipila ka mga calling sa nangaging mga katuigan apan dili sama niini.

Sa hilum nangutana ko sa akong kaugalingon kon husto na ba ko sa pangedaron o igo na ba ang kasinatian o gani may abilidad ba sa pagserbisyo. Unsa kahay akong mahatag sa mga kababayen-an sa branch?

Miuli ko nianang gabhiuna, miluhod sa pag-ampo, ug mihangyo sa Langitnong Amahan og direksyon. Pagkahuman nako sa akong pag-ampo, diha-diha dayon nadasig ko sa pagtan-aw sa akong patriyarkal nga panalangin. Akong nabasa kining han-ay sa mga pulong: “Ikaw modawat sa buluhaton nga gisangon kanimo nga buhaton karon, bisan batan-on pa ka.”

Sa dihang nabasa nako kadtong mga pulong, nakaamgo ko nga dili kini kabahin sa akong marital status, sa akong edad, o unsa ang akong mahimo. Kabahin kini kon unsa ang kinahanglang ipabuhat kanako sa Ginoo. Gidawat nako ang calling.

Pinaagi sa akong calling nakatabang ako sa mga tawo bisan lain-laing ang among mga background. Usa ka partikular nga babaye diin ang Dios migiya kanako sa pagserbisyo mao ang babaye nga hapit na mag-30 anyos, usa ka inahan sa duha ka bata nga walay bana. Dili ra dugay para kanako nga masayud nga siya ug ako managlahi og estilo sa kinabuhi. Dili ko sigurado kon unsaon nako nga mahimo niyang higala, apan miabut ang panahon nga kami nakapalambo og panaghinigalaay.

Sa laing okasyon nakahimamat ko og dili kaayo aktibo nga babaye. Nakahinumdom ko nga misulod sa iyang panimalay sa unang higayon kauban ang mga misyonaryo ug nasayud nga siya adunay pagpamatuod; siya nagkinahanglan og gamay nga “pagdasig” aron kini magpadayon nga magdilaab. Samtang naglingkod kami sa iyang sala ug naminaw kaniya, nabati namo ang Espiritu nga kusog ug midasig kanamo sa pagpamatuod kabahin sa Pag-ula ni Jesukristo.

Sa sunod nga mga bulan siya panagsa na nga mosimba. Apan padayon ko nga gigiyahan sa Espiritu ug nagpamatuod ngadto kaniya. Siya karon aktibo ug nagserbisyo sa branch.

Kadto mao ang pipila sa mahinungdanon nga mga panghitabo sa calling, apan ang mga hagit daghan kaayo. Nanlimbasog ko nga mobati nga igo na ang akong gibuhat, sa pagbalanse sa simbahan ug trabaho, ug sa pagbuntog sa mga pagbati nga kakulang.

Sa katapusan ako nakaamgo nga kadaghanan sa akong nabuhat nahitabo pinaagi sa Espiritu. Gibuhat ni nako sukad nga na-release ko sa akong calling ug mibalhin sa laing siyudad. Apan kanunay akong namalandong kon sa unsang paagi nga kana nga calling nakaimpluwensya sa mga sister—ug kanako. Pinaagi niini akong nahibaloan, isip dili minyo nga sister, adunay mahatag sa uban samtang dungan kita nga maglambo sa ebanghelyo. Bisan tuod mibati ko nga dili angay sa posisyon, nagkugi ko pag-ayo aron matuman ang akong calling. Samtang ako kining gibuhat, nabati nako ang kamot sa Dios nga naggiya kanako ug mipasarang kanako alang sa Iyang buhat.