Himoa ang Among Balay nga Dili Makita

Sa katapusan sa Ikaduhang Gubat sa Kalibutan, sa dihang 19 anyos pa ako, ang mga tropa sa kaaway miabut aron mosakop sa among lungsod didto sa Europe. Usa ka gabii niana ang akong mga ginikanan ug ako naglingkod sa among lamesa sa dihang among nadunggan ang hilabihan nga ka saba. Mili-li kami sa among gisalipod nga mga kurtina, nga gibitay aron ang mga tigpamomba dili makakita sa among balay kon gabii, aron makakita sa mga tropa sa kaaway—nga nagsakay sa ilang mga motorsiklo, mga trak, ug mga tangke de gyera—nga misulod sa among baryo gikan sa duha ka nagkalainlaing mga direksyon. Nahadlok kaayo ko.

Ang akong papa, nga usa ka matinud-anon nga tawo kanunay, yano lang nga miingon, “Ayaw og kahadlok.” Bisan pa sa unsay anaa gayud sa gawas sa among balay, kana usa ka talagsaon nga pamahayag. Kaming tanan nasayud nga ang mga sundalo gustong mosulod sa kasilinganan aron mangawat sa mga kabalayan sa mga tawo. Si papa misugyot nga mangluhod kami kilid sa lingkuranan ug mag-ampo aron panalipdan sa Langitnong Amahan. Siya nag-ampo, “Amahan sa Langit, palihug ayaw pakit-a ang mga mata niadto nga mga sundalo. Himoa ang among balay nga dili makita aron dili nila kini makit-an.”

Human sa iyang pag-ampo, ang akong inahan nag-ampo. Dayon nag-ampo ko. Human niana, mibalik kami sa lamesa ug mabinantayong mili-li sa bintana. Gitan-aw namo ang mga sundalo nga nangguba sa matag balay sa among eskina. Ang amoa mao ang katapusang balay sa eskina. Mipadulong sila sa among balay apan miagi ra sa atubangan sa among gate ug miadto sa sunod nga eskina. Gitan-aw namo sila nga misulod sa matag balay nga among makita gikan sa among bintana.

Human sa pagpanulod sa hapit duha ka oras, adunay mipito og kusog, ug ang mga sundalo namalik sa ilang mga sakyanan. Samtang hinay-hinay sila nga mibiya, hilabihan gayud kami nga nahupay ug nangluhod pag-usab, nagpasalamat sa Langitnong Amahan alang sa Iyang kalooy ug proteksyon.

Pagkasunod adlaw akong nahibaloan gikan sa usa ka nalisang nga higala nga ang mga sundalo mihimo og makalilisang nga mga butang sa matag balay nga iyang nahibaloan. Sa dihang giingnan ko siya nga wala sila moadto sa among balay, nakuratan siya. Miingon siya nga nakakita siya nga sila mipaingon dapit sa amo ug nasayud siya nga walay balay sa among lugar nga wala nila masudli. Ang among balay mao lamang ang wala hilabti sa mga sundalo.

Nasayud ko nga ang Langitnong Amahan maminaw sa atong mga pangamuyo ug motubag niini. Usahay mora og dili gayud kita makadawat og tubag, ug mangandoy kita nga unta Siya motubag dayon. Apan ako nasayud nga sa among panimalay 65 ka tuig na ang milabay, mitubag Siya diha-diha dayon.