Gimingaw Ko nga Mobati sa Espiritu

Sa dihang ako 16 na, miapil ko sa student foreign-exchange nga programa sulod sa usa ka tuig. Migikan ko sa akong panimalay sa Ukraine ngadto sa usa ka gamayng lungsod sa Arizona, USA, diin nagpuyo ko sa usa ka pamilya nga mga Santos sa Ulahing mga Adlaw. Wala pa gayud ako makadungog mahitungod sa mga Santos sa Ulahing mga Adlaw sa una.

Ang programa sa pagbinayloay wala magtugot sa pamilya nga mosangyaw kanako, ug wala ko gitugutan nga makighimamat sa mga misyonaryo. Apan mipili ko nga motambong sa simbahan kauban sa pamilya nga akong gipuy-an ug miapil sa tanang mga kalihokan sa Simbahan.

Gibati nako ang Espiritu uban niana nga pamilya, ug gibati nako ang dakong gugma diha sa simbahan. Nianang higayuna wala ko masayud nga ang unsay akong gibati mao ang Espiritu, apan ang akong kasingkasing natandog.

Sa dihang mipauli na ko sa Ukraine, gimingaw kaayo ko niana nga pagbati. Nahinumdom ko kon unsa ang akong kinabuhi sa dihang miadto pa ko sa simbahan ug misunod sa mga pagtulun-an sa ebanghelyo. Akong naamgohan kon unsa ang nawala, apan walay simbahan ug walay mga misyonaryo sa dapit nga akong gipuy-an, busa nagtuo ko nga dili na gayud nako kana bation pag-usab.

Mga upat ka tuig ang milabay, hinoon, pipila ka mga misyonaryo ang nanuktok sa akong pultahan. Nalipay kaayo ko nga nakakita kanila. Samtang nanggawas sila aron sa pagtrabaho, naminaw sila sa Espiritu, nga migiya kanila paingon sa akong balay. Mapasalamaton kaayo ko nga sila nagmasulundon. Nabunyagan ko ug nakumpirmahan wala madugay human niana.

Sukad niadto na-sealed ko didto sa Stockholm Sweden Temple ngadto sa akong bana, usa ka returned missionary gikan sa Russia. Ug karon aduna nay templo sa Kyiv. Nagplano kami nga moadto kanunay.

Ang templo mao ang labing maanindot nga dapit sa yuta. Usa kini ka dapit diin ikaw mahimong maduol sa Langitnong Amahan. Gibati nako nga mapasalamaton kaayo nga sa sulod sa templo makadawat kita og usa sa labing mahinungdanon nga mga gasa nga ihatag ngari kanato sa atong Langitnong Amahan: nga ma-sealed isip mga pamilya alang sa kahangturan.

Mapasalamaton ko sa mga sakop niadtong pamilya nga Santos sa Ulahing mga Adlaw kinsa mitabang kanako nga mobati sa Espiritu, nag-andam kanako diha sa panaw nga modala kanako ngadto sa akong kaugalingong pamilya nga na-sealed nga manag-uban sa kahangturan.