Pagkanta didto sa Singapore

“Ang among unang katuyoan mao ang paghiusa sa mga kabatan-onan,” miingon si Kate Loreto, ang presidente sa Young Women sa stake. “Kami adunay mga kabatan-onan sa walo ka lainlaing mga ward ug naggikan sa nagkalainlaing kultural nga gigikanan. Lisud alang kanila nga makig-uban sa usag usa. Busa naghunahuna kami, unsa kaha kon maghimo kita og musikal aron masuod sila?”

Ang mga lider mipili og dinasig nga musika pinaagi sa lista sa mga M gikan ni Presidente Gordon B. Hinckley (1910–2008).¹ Kini nga musika gipili “aron ang mga kabatan-onan makapamalandong sa lyrics sa mga kanta, mobati sa Espiritu, ug mosunod sa mga sumbanan,” miingon si Connie Woo, ang kinatibuk-ang direktor sa pasundayag. “Gusto namong i-apil ang mas daghang mga kabatan-onan kutob sa mahimo,” miingon Sister Woo. Ang tanang gidaghanon, 78 ka mga kabatan-onan ang mipasundayag.

Tingali dili tanan sa mga kabatan-onan ang miapil nga may sama nga motibo sa sinugdanan, apan hapit tanan kanila padayon nga miapil sa mga praktis tungod kay nalingaw sila sa pagpakighigala, sa pagkanta, ug, labaw sa tanan, sa Espiritu.

Human napili ang tema ug na-organisar ang mga praktis, ang mga kabatan-onan gisangunan og lainlaing mga bahin diha sa pasundayag ug ngadto sa lainlaing mga komite nga haum sa ilang mga talento.

Si Ally Chan, nag-edad og 18, sa Singapore Second Ward miboluntaryo sa pagtabang sa costume committee. “Kinahanglan kaming mopili og tarung nga sinina, nga mao ang labing importante, ug kinahanglan nga dili kini mahal, pangbatan-on, ug sa samang higayon nindot tan-awon sa entablado,” miingon siya. Wala lamang siya makat-on kon unsaon paghimo og mga desisyon pinasikad sa mga sumbanan sa ebanghelyo ug sa pakigtambayayong sa uban, apan malipayon usab siya mahitungod sa unsay hitsura sa mga kabatan-onan.

Si Canden Petersen, nag-edad og 15, sa Singapore First Ward gipili nga presidente sa choir aron sa pagtabang nga masiguro nga mahimong hapsay ang matag praktis. Ang iyang mga responsibilidad naglakip sa pag-assign sa mga pag-ampo, pagtapok ug pagpundok sa mga kabatan-onan alang sa mga praktis ug mga dula, ug pagpahibalo sa pagpahiluna diha sa entablado. “Gihangyo usab ako nga patabangon ang pipila ka batan-ong mga lalaki sa pagpahimutang sa dapit ug pagpanghipus ug sa pagtan-aw sa mga kabatan-onan sa pagtuman sa ilang mga buluhaton,” miingon siya. “Gibati nako nga kini nga responsibilidad maayo alang sa mga kabatan-onan. Unta makatabang kini kanila nga makasabut nga ang Ginoo nagtawag og mga lider karon, dili lamang diha sa mga hingkod na. Sila makahimo ug kinahanglan nga mopaluyo sa ilang mga lider bisan unsay ilang edad o gidaghanon sa kasinatian.”

Si Kandace Lim, nag-edad og 18, sa Woodlands Ward mitabang pinaagi sa pagdawat sa lainlaing mga buluhaton, naglakip ang pagkasakop sa costume committee, sa choreography committee, sa photography committee, ug usab sa pagkanta og solo. Kalabut sa iyang daghang mga responsibilidad, siya miingon, “Ang akong mama ang nagdasig kanako sa pagdawat niini nga mga buluhaton. Gitudloan ko niya nga kon adunay higayon nga makaserbisyo, himoa kini. Kon imong dawaton ang buluhaton ug ihatag ang imong tanang paningkamot, ang Ginoo motabang gayud kanimo nga makasugakod sa bisan unsa nga mga kalisdanan nga mahimo nimong masinati.”

Gawas niining mga responsibilidad sa pagdumala, ang mga tigpasundayag gikinahanglan usab. Si John Lee, nag-edad og 17, sa Clementi Ward mao ang usa sa mga maisug nga tawo nga miboluntaryo para sa solo nga bahin. Ang iyang rason simple ra: “Ganahan lang ko nga mokanta! Ug nakapahimo kini kanako nga mobati nga espesyal.”

Si Ezra Tadina, nag-edad og 17, sa Woodlands Ward dili ganahan nga mokanta, busa nangita siya og paagi nga makatampo. “Gipili nako nga maapil,” miingon siya, “ug gani ako ang nag-narrate sa bahin mahitungod sa pag-apil. Gibati nako ang mensahe tungod kay nasayud ko nga kini tinuod.”

Ang mga praktis milungtad gikan sa Nobyembre 2009 hangtud Marso 2010. Sulod niining panahona, ang mga kabatan-onan magtapok sa stake center aron magpraktis matag Biyernes sa gabii, gawas kon mga holiday. Ang gitas-on sa panahon ug ang pasalig nga gikinahanglan sa mga kabatan-onan dili gamay nga sakripisyo, kon hunahunaon ang makapakapoy nga iskedyul sa usa ka tipikal nga batan-ong Singaporean.

Si Olivia Hoe, estudyante sa unang tuig sa junior college sa Bedok Ward mipili sa pag-apil tungod kay “bisan unsa pa ang ihatag nga problema sa akong kinabuhi, sa gihapon, ang ebanghelyo mao ang nagpabilin nako nga lig-ong magbarug ug motabang sa akong mga kalisdanan. Nasayud nga adunay Usa kinsa nagbantay kanako ug nahigugma kanako sa hingpit ang nakahatag kanako og dakong kahupayan, ug sa akong pagtuo mas igo na kana nga makapadayon ko matag adlaw.”

Daghan sa mga kabatan-onan ang adunay laing mga buluhaton, apan nasayud sila nga ang Ginoo nagpahimutang og usa ka dalan alang kanila. Ingon niana ang nahitabo sa 16 anyos nga si Amanda Ho sa Singapore Second Ward. “Aduna koy praktis og sayaw, nga kadungan sa pipila sa mga praktis alang niini nga musikal, apan sa milagrosong paagi ang eskwelahan miusab sa iskedyul sa praktis, mao nga nakaapil ko sa mga praktis sa musikal,” mipasabut siya.

Human sa mga bulan sa pagpraktis, ang pasundayag sa katapusan andam na nga ipahigayon. Salamat sa kamadasigon sa mga batan-on sa pagpahibalo, sobra sa 700 ka mga tawo ang mitambong aron motan-aw kanila sa tulo ka mga pasundayag. Samtang ang mga kabatan-onan mipakigbahin sa ilang mensahe pinaagi sa mga kanta, sayaw, instrumental nga musika, ug sa ilang kaugalingong mga pagpamatuod, daghan sa mga tumatan-aw ang natandog.

Ang grupo gihagit usab sa pagdapit og mga higala nga dili miyembro aron sa pagtan-aw sa ilang pasundayag ug sa paghimo niini nga usa ka oportunidad sa pagsangyaw. Si Michael Lee, nag-edad og 18, mitinuod niini nga hagit. “Midapit ko og unom ka mga higala nga moadto, ug tulo sa akong mga kauban sa eskwelahan ug usa ka magtutudlo sa eskwelahan ang miadto,” miingon siya. Ang ilang mga pasundayag naghatag og labing nindot nga pagbati sa iyang magtutudlo. “Miingon siya nga nindot kaayo kadto nga kasinatian. Gani nangayo siya og kopya sa Alang sa Kalig-on sa mga Kabatan-onan nga booklet. Miingon siya nga iyang gibati ang kadasig pinaagi sa daghang malaumong mga kasingkasing sa mga kabatan-onan.”

Ang unang katuyoan sa mga lider nga mahiusa ang mga kabatan-onan natuman gayud. “Samtang naglingkod ko didto ug nagtan-aw sa matag usa kanila panahon sa pasundayag, ang akong kasingkasing napuno sa kalipay,” miingon si Sister Woo. “Dili kini mahitungod kon unsa sila kanindot tan-awon, unsa sila ka maayong mokanta ug motukar, o unsa ka maayo ang ilang pagkasulti sa mga narration. Dili kini mahitungod kon asa nga eskwelahan o nasud sila naggikan. Sila nagkahiusa.”

Ang musikal nakatabang sa kadaghanan nga makaangkon og mas lig-on nga pagpamatuod. Ang uban nag-ingon nga ilang gi-hum ang tuno ug gikanta ang lyrics sa mga kanta bisan asa man sila, ug ang mensahe sa mga kanta nakatabang kanila nga makasugakod sa ilang inadlaw-adlaw nga mga hagit. Daghan kanila ang nahimong dili lamang maayong mga higala apan espirituhanon nga mga suporta kinsa makabayaw sa matag usa kon maglisud sa pagpadayon. Makatabang sila sa usag usa sa pagpabilin diha sa pig-ot nga dalan ug sa pagtubo sa espirituhanong paagi.