Pagkahimong Moderno nga mga Pioneer

“Wala akoy mga kaliwat nga kauban sa ikadisinuybe nga siglo nga mga pioneer. Hinoon, sukad sa unang adlaw sa akong pagkamiyembro sa Simbahan, gibati nako ang suod kaayo nga relasyon niadtong nag-unang mga pioneer nga mitabok sa mga kapatagan. Sila akong espirituhanong mga katigulangan, ingon man usab sa matag usa ug sa matag miyembro sa Simbahan, dili igsapayan ang ilang nasyonalidad, pinulongan, o kultura. …

“Samtang ang mensahe sa gipahiuli nga ebanghelyo ni Jesukristo karon gihangop na sa tibuok kalibutan, kita mao ang mga pioneer sa atong kaugalingon nga dapit ug kahimtang.”

“Kay ikaw man ang una sa inyong pamilya nga midawat sa ebanghelyo, ikaw nahimong unang henerasyon, usa ka pinili nga henerasyon diin ang mga henerasyon sa nangagi, karon, ug sa umaabut mapanalanginan. …

“… Sa Simbahan daghan kitang mabasa ug masulti kabahin sa mga pioneer sa unang kasaysayan sa Simbahan. Sila ang unang henerasyon nga mga miyembro sama kaninyo. …

“Ang ilang kabilin ma-inyo isip isigka miyembro sa unang henerasyon. Pagmatinud-anon, serbisyohi ang inyong isig ka tawo, panalangini ang inyong pamilya, ug paghimo og hustong mga pagpili. Kamo ang unang henerasyon, usa ka pinili nga henerasyon aron panalanginan ang nangagi, karon, ug umaabut nga mga henerasyon.”

“Kitang tanan gikinahanglan nga motapos sa buluhaton nga gisugdan pinaagi sa mga Santos nga pioneer sobra sa 175 ka tuig na ang milabay ug gidala sa sunod-sunod nga mga dekada pinaagi sa matinud-anong mga Santos sa matag henerasyon. Kita kinahanglang motuo sama nga sila mituo. Kita kinahanglang motrabaho sama nga sila mitrabaho. Kita kinahanglang moalagad sama nga sila mialagad. Ug kita kinahanglan nga mobuntog sama nga sila mibuntog. …

“… Ang Ginoo wala magsugo kanato sa pagpuno og kariton; Siya misugo kanato sa pagpalig-on sa atong pagtuo. Siya wala magsugo kanato sa paglakaw tabok sa usa ka kontinente; Siya nagsugo kanato sa paglakaw tabok sa dalan sa pagbisita sa atong silingan. Siya wala magsugo kanato sa paghatag sa tanan natong gipanag-iya nga mga butang nga kalibutanon aron sa pagtukod og usa ka templo; Siya nagsugo kanato sa paghatag sa atong mga kapanguhaan ug atong panahon bisan pa sa mga kalisud sa pagpuyo sa modernong panahon aron sa pagpadayon sa pagtukod og mga templo ug dayon kanunayng motambong sa natukod na nga mga templo. Siya wala magsugo kanato nga magpakamatay isip usa ka martir; Siya nagsugo kanato sa pagpuyo og kinabuhi sa usa ka disipulo.

“Kini ang pinakanindot nga panahon nga mabuhi, mga kaigsoonan, ug magdepende lamang kini kanato sa pagdala sa mabungahong tradisyon sa maunungong pasalig nga mahimong nailang timaan nga kinaiya sa nangaging mga henerasyon sa mga Santos sa Ulahing mga Adlaw.”