Unsaon man nako sa pagtubag kon ang akong mga higala moingon nga walay tawo nga makakita sa Dios?

Si Alma mitudlo nga ang matag aspeto sa kinaiyahan nagpamatuod nga adunay makagagahum nga Tiglalang tungod sa dili matugkad nga mga kakuti ug kahan-ay niini (tan-awa sa Alma 30:44). Usa kini ka dakong oportunidad alang kaninyo sa pagpamatuod ngadto sa inyong mga higala nga kamo makabati sa Iyang presensya diha sa inyong kinabuhi matag adlaw pinaagi sa Espiritu Santo. Mahimo usab ninyong ipasabut nga kita dili kinahanglang makakita sa Dios aron lamang motuo nga anaa Siya. Mao nga kita adunay hugot nga pagtuo. Kon kita makakita Kaniya, wala nay dakong paningkamot nga gikinahanglan aron motuo ug mosunod Kaniya sa tibuok natong kinabuhi. Aduna unyay panahon nga kita makakita Kaniya sa sunod nga kinabuhi. Hangtud nga moabut kana, ang inyong pagtuo igo na aron makakita sa Iyang kamot sa espirituhanong paagi diha sa inyong kinabuhi.

Ang kauban nako sa kwarto kausa nangutana kanako kon unsaon nako pagtuo sa butang nga wala nako makita. Mitubag ko nga kini tungod kay akong mabati ang Espiritu Santo, kinsa nagpamatuod nga ang Dios nakaila kanako, ug kini nakadugang sa akong pagtuo ug nakahatag og kalinaw sa akong kalag. Dili ko makakita Kaniya, apan nasayud ko nga Siya nahigugma kanako tungod kay ako adunay hugot nga pagtuo ug akong gibati ang Iyang Espiritu.

Diyutay lang ang mga tawo nga nakakita gayud sa Dios samtang dinhi pa sila sa yuta, apan kitang tanan naapektuhan. Nakita nato ang tanan nga Iyang gilalang, tanang mga panalangin nga Iyang gihatag, ug kitang tanan makabati sa Iyang gugma. Bation gayud nako kini kon ako mohatag sa akong pagpamatuod. Basta atong ablihan ang atong mga mata ug ang atong mga kasingkasing, kita makakita sa Dios diha sa atong palibut, ingon man usab diha sa usag usa, sa Iyang mga anak.

Sa dihang ang akong mga kauban sa eskwelahan nangutana kon nganong mituo ko sa Dios nga wala man ko makakita Kaniya sukad, gipasabut nako nga kita wala makakita sa Dios tungod kay dili pa panahon nato nga makakita Kaniya. Human kita mabanhaw, moadto kita sa Iyang atubangan aron pagahukman (tan-awa sa D&P 137:9). Dayon ako mipakigbahin sa akong pagpamatuod ug mipasabut nga ang pagbaton og hugot nga pagtuo nangahulugan nga motuo ug molaum. Kon sila adunay hugot nga pagtuo, makakita sila sa Dios sama sa akong pagkakita Kaniya—sa mga mata sa akong kasingkasing.

Usa ka adlaw ang akong kompanyon ug ako nagtudlo sa usa ka magtiayon, ug gisultihan namo sila nga ang Amahan ug ang Anak nagpakita ni Joseph Smith agig tubag sa iyang pag-ampo. Ang lalaki miingon nga walay tawo nga makakita sa Dios. Diha-diha dayon ang alarm sa akong relo mitingog, nagpahibalo kanamo nga kinahanglan na kaming mopauli. Mibiya kami sa ilang panimalay nga wala matubag kana nga pamahayag.

Pagkasunod adlaw nagbasa ko og kasulatan diha sa Biblia nga nag-ingon, “Kon adunay usa ka manalagna sa taliwala ninyo, ako ang Ginoo magapakita kaniya sa usa ka panan-awon” (Numeros 12:6). Nasayud ko nga kini nga kasulatan makatabang niini nga brother nga motuo.

Ang panahon sa sunod nga pagbisita miabut, ug naghisgut kami kalabut sa mga propeta. Gipakita nako kaniya kini nga kasulatan, ug nausab ang iyang panagway. Ang iyang mga mata napuno sa mga luha, ug siya miingon, “Tinuod kini. Adunay mga tawo nga andam nga makakita sa Dios.” Dayon nagtudlo kami kaniya mahitungod sa mga propeta sa Basahon ni Mormon kinsa nakakita sa Dios, ug nasayud siya nga kini tinuod.

Kasagaran kita dili makakita sa Dios, apan inyong mabati ang Iyang Espiritu. Gusto Siya nga kamo makaila Kaniya pinaagi sa pagbasa sa mga kasulatan ug pagbaton og hugot nga pagtuo Kaniya. Kon kamo adunay hugot nga pagtuo Kaniya, dili kamo kinahanglang makakita Kaniya aron lamang makaila kon si kinsa Siya ug nga Siya anaa. Ang mga propeta, sama nila ni Moises ug Joseph Smith, kinsa nakakita gayud sa Dios kinahanglan pa nga mausab aron makakita Kaniya.

Usa nako ka higala kausa nangutana nako niini nga pangutana, ug nangutana ko kaniya kon diin siya nakakuha niini nga ideya. Giingnan ko niya nga usa ka tawo ang mipakita niya niini diha sa Biblia. Dayon akong nahinumduman ang Juan 1:18, nga nag-ingon nga walay tawo nga makakita sa Ginoo. Tungod sa tabang sa seminary, nahinumduman nako ang uban nga mga kasulatan diha sa Biblia nga nag-ingon nga ang mga tawo sama nila ni Moises ug Jacob, nga napuno sa Espiritu Santo, nakakita sa Dios. Ug busa akong natubag ang akong higala sa masaligong paagi ug mihatag sa akong pagpamatuod.