Duha ka mga Pioneer taliwala sa Duha ka Siglo

Pinalanggang Ebenezer, wala ka makaila kanako; wala pa kita magkita.

Niadtong Nobyembre 17, 1830, natawo ka sa Dunblane, Perthshire, Scotland, ngadto kang Andrew Bryce ug Janet Adams Bryce. Ilaha kang gipanganlan og Ebenezer.

Usa ka gatus ug kwarenta y tres ka mga tuig ang milabay, natawo ako sa Hualien, Taiwan. Ilaha kong gipanganlan og Ji-Jen Hung.

Ikaw nagsugod sa pagtrabaho sa ayohanan ug himoanan og barko pagka-10 anyos. Sa wala madugay ikaw nahimong usa ka apprentice ug hilabihan ka hanas sa imong buluhaton.

Pagka kwatro anyos nagsugod ko sa pagmemorya sa times tables ug sa mga simbolo sa phonetic sa Chinese. Dili kadto sayon, apan akong nahimo.

Sa tingpamulak sa 1848, nainteresado ka sa Ang Simbahan ni Jesukristo sa mga Santos sa Ulahing mga Adlaw, bisan ang imong amahan, pamilya, ug mga higala wala mopakigbahin sa imong kahinam. Ilang gibuhat ang tanang posible aron sa pagpugos kanimo sa pagbiya sa Simbahan. Gani gitrangkahan sa imong amahan ang imong mga sinina diha sa kabinet aron dili ka makatambong sa imong mga miting sa Dominggo. Apan ang imong hugot nga pagtuo makanunayon. Bisan pa sa pagsulay ikaw nanlimbasog.

Niadtong Disyembre 4, 1986, duha ka Amerikano nga mga misyonaryo sa Ang Simbahan ni Jesukristo sa mga Santos sa Ulahing mga Adlaw mituktok sa pultahan sa balay sa akong amahan. Bisan tuod si Papa mitugot sa mga misyonaryo nga mobisita kanunay, siya wala gayud mainteresado sa mensahe. Pipila ka bulan ang milabay iyang gidiborsyo si Mama ug nagminyo pag-usab.

Sa dihang si Papa mipahibalo sa mga misyonaryo sa makaguol nga balita sa among nagkatibulaag nga pamilya, giingnan usab niya sila nga dili na mobalik.

Ang mga misyonaryo mibilin og usa ka kopya sa Basahon ni Mormon nga adunay address sa labing duol nga simbahan nga gisulat sa sulod nga pahina ug miingon, “Kami inyong mga higala sa kanunay. Kon adunay usa ka butang nga among mahimo alang sa inyong pamilya, anhi kamo niini nga address, ug inyo kaming makita dinhi.”

Ang pagpanamalit sa mga misyonaryo niadtong gabhiuna sakit kaayo, kay ako mibati og usa ka butang nga bililhon sa ilang mensahe.

Ang akong ina-ina mibalhin sa balay. Siya ug si Papa nahimong madaug-daugon, ang kinabuhi nahimong lisud, ug ako nahimong usa ka matahapon nga tin-edyer.

Usa ka gabii, sa dihang dili na nako maagwanta ang ilang mapintas nga tinagdan ngari kanako, nagdali-dali ako sa paggawas sa pultahan tungod sa kahadlok ug mitago sa umahan, nag-inusara, nagsubo pag-ayo, ug nawagtangan sa paglaum. Gusto kong molayas, apan wala akoy kapaingnan.

Diha-diha akong nahinumduman ang gisulti sa mga elder atol sa ilang katapusang pagbisita. “Unang buhaton inigka-ugma, akong pangitaon ang akong mga higala!” Giingnan nako ang akong kaugalingon, mibati og may kalinaw sa kinahiladman sa unang higayon sulod sa daghang mga katuigan.

Pagkaugma sayo sa buntag misakay ko sa akong bisikleta ug miadto sa lungsod para moadto sa simbahan, apan ang mga elder kinsa mibisita sa akong pamilya mga pipila na katuig ang milabay miuli na. Sa dihang mosurender na unta ko, duha ka mahigalaong babaye uban sa ilang pamilyar nga itom nga mga name tag nga nag-coat miduol kanako ug mipaila-ila sa ilang kaugalingon.

Pinalanggang Ebenezer, bisan pa sa pagsupak sa imong amahan, nabunyagan ka niadtong Abril 1848, ang bugtong kinabig sa inyong pamilya.

Usa ka bulan ang milabay human nga akong nahimamat ang mga sister missionary, nabunyagan ko, niadtong Nobyembre 1988, ang unang kinabig sa akong pamilya.

Apan si Papa ug ang Ina-ina milisud-lisud kanako sa pagsimba.

Usa ka adlaw miuli ko sa balay gikan sa usa ka kalihokan sa Young Women, gipriso ko ni Papa, gibalikas ko, gilabnot ang akong mga kasulatan, ug gigisi-gisi kini. Mga gisi-gisi nga puting papel ang nanglupad ug nangapalid sa hangin, hinay-hinay nga nangahulog sa salog, diin ang akong mga luha mitulo usab.

Mora kini og usa ka urum nga dili nako makamata.

Sa dihang 21 anyos nako, mipahayag ko og dako nga tinguha nga moserbisyo og full-time nga misyon. Si Papa mitubag nga dili nako ilhon nga anak. Sa Bisperas sa Bag-ong Tuig sa Chinese, kon ang kadaghanan sa mga tawo mouli ngadto sa ilang mga hinigugma, ako gipapahawa sa among panimalay.

Pinalanggang Ebenezer, sa dihang ang pagpanglutos gikan sa imong pamilya ug mga higala dili na maagwanta, mihukom ka nga molalin gikan sa Scotland ngadto sa Amerika aron motipon sa mga Santos sa Ulahing mga Adlaw ug motabok sa mga kapatagan sa Utah. Ang imong amahan naglagot og maayo. Siya misugo kanimo nga magpabilin, apan ikaw usa ka determinado nga batan-ong lalaki. Sa adlaw nga misakay ka sa barko mao ang katapusang adlaw nga imo siyang nakita.

Ang kinabuhi sa 17 anyos nga milalin dili sayon alang kanimo, Ebenezer, apan imong nahimo. Ang imong mga kahanas sa pagpamanday, millwright, ug pagpamanday sa barko dali-daling nagamit. Ikaw gitawag sa pagtukod og chapel sa Pine Valley, Utah. Bisan tuod wala pa ka kasulay sa pagtukod og chapel sa una, wala ka magduha-duha sa pagdawat sa calling. Karon kana nga building mao ang labing karaan nga chapel sa Santos sa Ulahing mga Adlaw nga gigamit gihapon.

Sa wala madugay imong nadiskobrehan ang natural nga amphitheater nga karon nakapangalan kanimo, Bryce Canyon National Park.

Niadtong Hunyo 4, 1994, mireport ko sa Taiwan Taichung Mission isip usa ka full-time nga misyonaryo. Gitaud nako ang itom nga name tag sa akong coat, sama sa mga elder kinsa mibisita sa akong pamilya sa dugay nang mga katuigan. Nagmapainubsanon ako. Napasidunggan ako. Napanalanginan ako.

Human sa akong misyon milalin ko sa Utah, diin akong natagboan ang akong bana. Kami naminyo sa templo alang sa karon ug hangtud sa kahangturan. Pinaagi sa katigulangan sa akong bana, nasumpay ko kanimo.

Pinalanggang Ebenezer, wala ka makaila kanako. Wala pa kita magkita. Apan nakadungog ko og daghang mga istorya kabahin nimo. Ang imong tiil wala mohunong sa paglakaw. Ang imong mga kamot wala mohunong sa pagtrabaho. Ang imong kasingkasing wala mohunong sa pagtuo. Wala ka mohunong sa pagserbisyo. Human sa tanang katuigan, ang imong ehemplo sa pagkamatinud-anon nakapabayaw gihapon kanako. Salamat, pinalanggang Ebenezer. Salamat!