សារលិខិតគណៈប្រធានទីមួយ
អំណោយដ៏មហិមារបស់ព្រះ
ដោយប្រធាន រ័សុល អិម ណិលសុន
ដកស្រង់ចេញពី « Thanks Be to God » Liahona ខែ ឧសភា ឆ្នាំ ២០១២ ទំព័រ ៧៧–៨០ ។
ថ្ងៃមួយស៊ីស្ទើរណិលសុន និងខ្ញុំបានឃើញត្រីនៅតំបន់ត្រូពិចមួយចំនួននៅអាងចិញ្ចឹមត្រី ។ ត្រីទាំងនោះមានពណ៌ស្រស់ឆើតឆាយ ហើយមានរាង និងទំហំខុសៗគ្នា ហែលយ៉ាងលឿនចុះឡើង ។ ខ្ញុំបានសួរកម្មករនៅក្បែរនោះថា « តើនរណាឲ្យចំណីត្រីដ៏ស្រស់ស្អាតទាំងនោះ ? »
នាងបានឆ្លើយថា « គឺខ្ញុំ » ។
បន្ទាប់មក ខ្ញុំសួរថា « តើត្រីទាំងនេះធ្លាប់អរគុណអ្នកទេ ? »
នាងបានឆ្លើយថា « មិនទាន់ទេ ! » ។
មនុស្សមួយចំនួនគឺដូចជាត្រីនោះអញ្ចឹងដែរ ។ ពួកវាពុំដឹងពីសេចក្តីស្រឡាញ់របស់ព្រះ និងសេចក្តីល្អរបស់ទ្រង់ដល់ពួកវាឡើយ ។ តើវាកាន់តែប្រសើរយ៉ាងណាទៅ បើមនុស្សទាំងអស់អាចដឹងពីសេចក្ដីស្រឡាញ់នៃព្រះកាន់តែច្រើន ហើយបង្ហាញការដឹងគុណដល់ទ្រង់នោះ ។
សូមមានអំណរគុណចំពោះព្រះយេស៊ូវគ្រីស្ទ ។
ព្រះបានបញ្ជូនព្រះរាជបុត្រារបស់ទ្រង់ព្រះយេស៊ូវគ្រីស្ទដើម្បីមកជួយយើង ។ ទ្រង់បានធ្វើបែបនោះដោយសារទ្រង់ស្រឡាញ់យើងខ្លាំងណាស់ ។
ព្រះយេស៊ូវបានយាងមកដើម្បី ប្រោសលោះ យើង ។
ដោយសារ ដង្វាយធួន របសទ្រង់ នោះយើងអាចរស់ឡើងវិញបន្ទាប់ពីយើងស្លាប់ ។
ដោយសារដង្វាយធួនរបស់ទ្រង់ នោះយើងអាចត្រឡប់ទៅរស់នៅជាមួយនឹងព្រះវរបិតាសួគ៌វិញជារៀងរហូត ។
ព្រះយេស៊ូវបានពន្យល់ថា ៖
« ខ្ញុំជាសេចក្តីរស់ឡើងវិញ ហើយជាជីវិត ៖ អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញ ៖ ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ » ( យ៉ូហាន ១១:២៥–២៦ ) ។
នេះហើយគឺជាសារលិខិតដ៏អស្ចារ្យនៃបុណ្យអ៊ីស្ទើរ !
ព្រះយេស៊ូវគឺជាព្រះអង្គសង្រ្គោះរបស់ខ្ញុំ
ព្រះយេស៊ូវបានមានព្រះជន្មរស់ឡើងវិញនៅព្រឹកបុណ្យអ៊ីស្ទើរ ។ សូមអានប្រយោគនានាដើម្បីរកមើលនូវអ្វីដែលទ្រង់បានធ្វើសម្រាប់ពួកយើង ។ សូមផាត់ពណ៌នៅក្នុងកាំរស្មីព្រះអាទិត្យ បន្ទាប់ពីអ្នកអានប្រយោគនីមួយៗ ។ បន្ទាប់មក សូមផាត់ពណ៌រូបភាពទាំងអស់ ។
-
ព្រះយេស៊ូវគ្រីស្ទបានរងទុក្ខនៅក្នុងសួនច្បារគែតសេម៉ានី និងនៅលើឈើឆ្កាង ដើម្បីសង្គ្រោះយើងពីអំពើបាបរបស់យើង ។
-
ព្រះយេស៊ូវបានសុគត ហើយបានមានព្រះជន្មរស់ឡើងវិញដើម្បីសង្គ្រោះយើងពីសេចក្តីស្លាប់ ។
-
ព្រះយេស៊ូវបានប្រទានសាក្រាម៉ង់ដើម្បីជួយយើងឲ្យចងចាំដល់ទ្រង់ ។
-
ព្រះយេស៊ូវបានបង្រៀនយើងឲ្យអភ័យទោសដល់មនុស្សដទៃ ។
-
ព្រះយេស៊ូវបានបង្ហាញយើងអំពីរបៀបមានសន្តានចិត្តល្អ ។
-
ដោយសារព្រះយេស៊ូវគ្រីស្ទ នោះយើងទាំងអស់គ្នានឹងរស់ឡើងវិញបន្ទាប់ពីយើងស្លាប់ ។