សួស្ដីមកពី ប្រទេសអេស្តូនី !
ពួកយើងឈ្មោះ ម៉ាហ្គោ និង ប៉ោឡូ ។ ឆ្នាំនេះយើងធ្វើដំណើរជុំវិញពិភពលោកដើម្បីរៀនអំពីបុត្រាបុត្រីរបស់ព្រះ ។ សូមចូលរួមជាមួយពួកយើង ពេលយើងទៅលេងប្រទេសអេស្តូនី !
ប្រទេសអេស្តូនីស្ថិតនៅក្នុងទ្វីបអឺរ៉ុបភាគខាងជើង ។ ប្រទេសនេះមានកោះជាង ២០០០ កោះ ។ ប្រជាជនចំនួនប្រមាណជា ១.៣ លាននាក់ រស់នៅក្នុងប្រទេសអេស្តូនី ។
នេះគឺជារបៀបនិយាយថា « សួស្តី » ជាភាសាអេស្តូនី Tere!ហើយនេះជារបៀបដែលអ្នកហៅឈ្មោះសាសនាចក្រ ៖ Viimse Aja Pühade Jeesuse Kristuse Kirik
នេះជាទីក្រុងថាលីន រដ្ឋធានីប្រទេសអេស្តូនី ។ វាមានអាយុកាលប្រហែលជា ៨០០ ឆ្នាំហើយ ។ ប្រទេសអេស្តូនីមានកន្លែងធម្មជាតិជាច្រើន ដូចជាព្រៃឈើ និងវាលល្បាប់ ។ តាមពិតទៅ ជាងពាក់កណ្តាលនៃប្រទេសអេស្តូនីគឺគ្របដណ្ដប់ដោយព្រៃឈើ ។ ប្រជាជនជាច្រើននាក់នៅក្នុងប្រទេសអេស្តូនី ចូលចិត្តចំណាយពេលវេលានៅក្នុងធម្មជាតិ ។
តើនៅប្រទេសអេស្តូនីគេបរិភោគអ្វីសម្រាប់អាហារពេលល្ងាច ? ប្រហែលជាសាច់ជ្រូក ឬផ្អកត្រីជាមួយដំឡូងបារាំង ស្ពៃក្តោប គ្រីមជូរ និងនំបុ័ងខ្មៅ ។ នោះគេហៅថា នំសាំងវិចស្ព្រាត ។
តើអ្នកចូលចិត្តច្រៀងនៅក្នុងថ្នាក់អង្គការបឋមសិក្សាទេ ? រៀងរាល់ប្រាំឆ្នាំម្តង ប្រជាជនអេស្តូនីជួបជុំគ្នានៅក្នុងពិធីបុណ្យដ៏ធំមួយ ដើម្បីសាទរដល់ប្រទេសរបស់គេជាមួយនឹងការច្រៀង និងការរាំ ។
សាសនាចក្រនៅក្នុងប្រទេសអេស្តូនីតូច ប៉ុន្តែមានភាពរឹងមាំ ។ មានសមាជិកសាសនាចក្រប្រមាណជាមួយពាន់នាក់ ។ ព្រះវិហារបរិសុទ្ធដែលនៅជិតពួកគេបំផុតនោះគឺនៅ ហែលស៊ីនគី ហ្វាំងឡង់ ។
សូមជួបជាមួយបងប្អូនស្រីពីរនាក់មកពីប្រទេសអេស្តូនី !
នាយប់មួយ ពេលខ្ញុំចង់ចូលដេក ខ្ញុំបានបាត់តុកត្តាខ្លាឃ្មុំរបស់ខ្ញុំ ។ ខ្ញុំបានរកមើលវា ប៉ុន្តែខ្ញុំរកមិនឃើញទេ ។ ខ្ញុំបានអធិស្ឋាន ។ បន្ទាប់មក ខ្ញុំបានរកឃើញតុកត្តាខ្លាឃ្មុំរបស់ខ្ញុំវិញ ហើយខ្ញុំមានសុបិនល្អ ។
បាយអែនកា ជេ អាយុ ៧ ឆ្នាំ
គ្រួសារយើងចូលចិត្តបម្រើមនុស្សដទៃ ។ ការបម្រើជួយយើងឲ្យទទួលអារម្មណ៍ពីព្រះវិញ្ញាណបរិសុទ្ធ ដែលបានប្រទានអារម្មណ៍ដ៏កក់ក្តៅនៃភាពសុខសាន្តដល់យើង ។ ប្អូនស្រីរបស់ខ្ញុំ និងខ្ញុំបានធ្វើអំណោយឲ្យមនុស្សដទៃ ដោយសារយើងចង់ឲ្យពួកគេទទួលអារម្មណ៍នៃក្តីស្រឡាញ់ ។
ភីប៊ី ជេ អាយុ ១០ ឆ្នាំ
សូមអរគុណសម្រាប់មកការទស្សនាប្រទេសអេស្តូនីជាមួយពួកយើង ។ ជួបគ្នាពេលក្រោយទៀត !