Ngaahi Faingataʻaʻia Fakaesinó

Naʻe akonaki e Palōfita ko Siosefa Sāmitá “ko e kau maʻu ʻatamai mo e laumālie kotoa pē kuo fekauʻi mai ʻe he ʻOtuá ki māmani ʻoku nau tuʻu ke fakalakalaka” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 241). ʻOku ʻi māmani e kotoa ʻo e fānau ʻa e ʻOtuá ke ʻoange e faingamālie ke ako mo moʻui ʻaki e ongoongolelei ʻo Sīsū Kalaisí.

ʻOku maʻu foki ʻe he kāingalotu ʻo e Siasí ʻoku ʻi ai honau ngaahi faikehekehe pe faingataʻaʻia fakaesino ʻokú ne uesia ʻenau ngaahi ngāué, ha ngaahi faingamālie ke ngāue fakaetauhi, akoʻi, tokoni, mo tataki. ʻOku fie maʻu e tokoni ʻa e tokotaha kotoa pē ʻi he puleʻanga ʻo e ʻEikí. Pea ʻe lava ke fai ia ʻe ha taha pē ʻokú ne maʻu e holi ke fai ha ngaahi fuakava toputapu kapau ʻokú ne moʻui taau mo fakahaaʻi ha tuʻunga fakapotopoto ʻo e fua fatongiá mo e haʻisia ki he fatongiá.

ʻOku ʻafioʻi mo ʻofa ʻa e Tamai Hēvaní ki he kotoa ʻo ʻEne fānaú, pea ʻokú Ne ʻafioʻi e ngaahi faingataʻa ʻoku tau aʻusiá. Hangē ko ia ne akoʻi ʻi he Sione 9:1–7, ʻoku ʻikai ko ha tautea ʻa e faingataʻa fakaesinó—ʻoku ʻikai pehē ki he fakafoʻituituí pe ki he ongomātuʻá. Naʻe akoʻi ʻe Palesiteni Lāsolo M. Nalesoni ʻo pehē: “ʻOku ʻikai fie maʻu e sino haohaoá kae toki aʻusia ai e ikuʻanga fakalangi ʻo ha taha. Ko hono moʻoní, ko ha niʻihi ʻo e ngaahi laumālie lelei tahá ʻoku faʻofale ia ʻi ha ngaahi sino ngāvaivai mo ʻikai haohaoa. ʻOku faʻa fakatupulaki e ivi fakalaumālie leleí ʻe ha kakai ʻoku nau faingataʻaʻia fakaesino, koeʻuhí ko ʻenau mohu faingataʻaʻiá” (“Fakafetaʻi ki he ʻOtuá,” konifelenisi lahi ʻo ʻEpeleli 2012).

ʻOku totonu ke tau anga fakaʻapaʻapa ki he kakai faingataʻaʻia fakaesino kotoa pē pea fekumi ki ha ngaahi founga ke tokoniʻi kinautolu mo honau ngaahi fāmilí ʻaki e ʻofa faka-Kalaisí—pea ke poupouʻi kinautolu ʻi heʻenau tokoniʻi e niʻihi kehé.

Vakai ki he disability.ChurchofJesusChrist.org ki ha fakamatala lahi ange, ʻo kau ai e ngaahi fakakaukau ki he founga ke tokoniʻi e niʻihi fakafoʻituitui ʻoku nau faingataʻaʻia fakaesinó mo honau ngaahi fāmilí, ngaahi tuʻutuʻuni mo e fakahinohino, ngaahi akonaki ʻo e ongoongoleleí, mo ha ngaahi maʻuʻanga tokoni lahi ange.

Ngaahi Pōpoaki Lahi Angé

Teaching Strategies for Children with Disabilities