Faingataʻá

ʻOku aʻusia ʻe he kakai kotoa pē ʻa e faingataʻá lolotonga ʻenau moʻuí, ko ha konga ia ʻo e palani ʻo e huhuʻi ʻa e Tamai Hēvaní. ʻOku hoko e ngaahi ʻahiʻahí, taʻefiemālié, mamahí, fokoutuá, mo e loto-mamahí ko ha konga faingataʻa ʻo e moʻuí, ka ʻi he tokoni ʻa e ʻEikí, ʻe lava ke tataki ia ki ha tupulaki, sivi, mo e fakalakalaka fakalaumālie.

ʻOku fakafalala lahi e lavameʻa mo e fiefia ʻa e tokotaha takitaha ʻi he taimí ni mo e taʻengatá, ki heʻene tali e ngaahi faingataʻa ʻo e moʻuí.

ʻOku lahi e ngaahi tupuʻanga ʻo e ʻahiʻahí. ʻE lava ke hoko mai e ngaahi faingataʻá ko ha nunuʻa ʻo e hikisia mo e talangataʻa ʻa ha tokotaha. ʻE lava ke fakaʻehiʻehi mei he ngaahi faingataʻa ko ʻení ʻo fakafou ʻi he moʻui angatonú. ʻE lava ke hoko mai ha ngaahi faingataʻa kehe ia ko ha konga fakanatula pē ia ʻo e moʻuí ʻi ha ngaahi taimi lolotonga e moʻui angatonu ʻa e kakaí. Hangē ko ʻení, ʻe lava ke aʻusia ʻe he kakaí ha ngaahi faingataʻa ʻi he ngaahi taimi ʻo e mahamahakí pe ongoʻi taʻepaú pe ʻi he pekia ha taha ʻoku nau ʻofa ai. ʻOku hoko mai ʻa e ʻahiʻahí he taimi ʻe niʻihi koeʻuhí ko e ngaahi fili taʻe fakapotopoto, lea mo e tōʻonga fakamamahi ʻa ha niʻihi kehe. ʻE lava foki ke fou mai ʻa e mamahí ʻi ha Tamai Hēvani ʻofa ko ha aʻusia ke ako mei ai.

ʻOku lāunga pea ʻita ha kakai ʻe niʻihi ʻi heʻenau fehangahangai mo e faingataʻá. ʻOku nau fai ha ngaahi fehuʻi hangē ko e “Ko e hā ʻoku hoko ai ʻeni kiate aú? Ko e hā ʻoku ou foua ai eni he taimi ní? Ko e hā e meʻa kuó u fai ke hoko ai ʻení?” Ka ʻoku maʻu ʻe he ngaahi fehuʻi ko ʻení e mālohi ke puleʻi ʻenau ngaahi fakakaukaú. ʻE lava ʻe he ngaahi fehuʻi peheé ʻo fakafeʻātungiaʻi ʻenau vīsoné, fakamoleki honau iví, pea toʻo meiate kinautolu e ngaahi aʻusia ʻoku finangalo e ʻEikí ke nau maʻú. ʻOku totonu ke ʻoua ʻe tali ʻe he kakaí ʻi he founga ko ʻení, ka nau fakakaukau ke fai e ngaahi fehuʻi hangē ko e, “Ko e hā ʻaʻaku ʻe faí? Ko e hā te u ako mei he aʻusia ko ʻení? Ko e hā ʻeku meʻa ʻoku totonu ke liliú? Ko hai ʻoku totonu ke u tokoniʻí? ʻE founga fēfē haʻaku manatuʻi hoku ngaahi tāpuaki lahí ʻi he ngaahi taimi ʻo e faingataʻá?”

ʻOku fie maʻu ha ngaahi tali kehekehe ki he ngaahi faʻahinga kehekehe ʻo e faingataʻá. Hangē ko ʻení, mahalo naʻa fie maʻu pē ke faʻa kātaki mo faivelenga ʻa kinautolu ʻoku fokoutua ʻi ha mahakí. ʻOku totonu ke ngāue ʻa kinautolu ʻoku nau mamahi koeʻuhi ko e ngaahi lea pe tōʻonga ʻa e niʻihi kehé ke fakamolemoleʻi kinautolu ne fakaʻitaʻi kinautolú. ʻOku totonu ke kumi tokoni ʻa kinautolu ne ngaohikoviá ʻi he taimi pē ko iá. Kapau ʻoku hoko mai ha ngaahi faingataʻa ki ha tokotaha koeʻuhi ko e talangataʻá, ʻoku totonu ke ne fakatonutonu hono ʻulungāngá pea fekumi loto-fakatōkilalo ki ha fakamolemole.

Neongo ʻe kehekehe pē ha niʻihi ʻo e ngaahi tali ki he faingataʻá, ka ʻoku totonu ke tatau ha tali ʻe taha—falala ki he Tamai Hēvaní mo Sīsū Kalaisi. Naʻe akoʻi ʻe he palōfita ko ʻAlamaá ʻo pehē, “ʻIlonga ʻa kinautolu ʻe falala ki he ʻOtuá ʻe tokoniʻi ʻa kinautolu ʻi honau ngaahi ʻahiʻahiʻí, mo honau ngaahi tuʻutāmakí, mo honau ngaahi mamahí” ( ʻAlamā 36:3).

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange