Fakatōtamá

Ko e moʻui ʻa e tangatá ko ha meʻafoaki toputapu ia mei he ʻOtuá. ʻOku fehangahangai ʻa e fili ke fakatōtama koeʻuhí ko e fiemālie fakataautaha pe fakasōsialé pea mo e finangalo mo e ngaahi fekau ʻa e ʻOtuá. Ko e kāingalotu ko ia ʻo e Siasí ʻoku nau loto, fakahoko, poupouʻi, totongi, pe fokotuʻutuʻu ke fakahoko e ngaahi fakatōtama peheé, ʻe lava ke mole honau mēmipasipi ʻi he Siasí.

Kuo hoko e fakatōtamá ko ha tōʻonga angamaheni ʻi he sosaieti ʻo e ʻaho ní ʻo taukapoʻi ʻaki ha ngaahi fakakikihi kākā. Kuo fakahaaʻi ʻe he kau palōfita ʻi he ngaahi ʻaho kimui ní ʻoku kovi ʻa e fakatōtamá, ʻo ʻuhinga ki he folofola ko ia ʻa e ʻEikí, “ʻOua naʻá ke … fakapō pe fai ha faʻahinga meʻa pehē” (Tokāteline mo e Ngaahi Fuakava 59:6). ʻOku mahino ʻenau akonaki ʻi he meʻá ni: Kuo pau ke ʻoua naʻa tali, fakahoko, poupouʻi, totongi, pe fokotuʻutuʻu ʻe he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fakatōtama. ʻE malava ke fai ha fakatonutonu faka-Siasi ki he kāingalotu ʻo e Siasí ʻoku nau poupouʻi ʻa e fakatōtamá ʻi ha faʻahinga founga pē.

Kuo ʻosi pehē ʻe he kau taki ʻo e Siasí ʻoku ʻi ai ha ngaahi tūkunga makehe ʻe lava ke fakatonuhiaʻi ʻaki hano fakahoko ʻo ha fakatōtama, hangē ko e feitama tupu mei ha hia fakamalaʻia pe tohotoho, pe taimi ʻoku pehē ai ʻe ha maʻu mafai fakafaitoʻo falalaʻanga ʻoku tuʻu ʻi ha tuʻunga fakatuʻutāmaki e moʻui pe moʻui lelei ʻa e faʻeé, pe ko hano ʻiloʻi ʻe ha maʻu mafai falalaʻanga ʻi he malaʻe fakafaitoʻó ʻoku palopalema lahi e sino ʻo e pēpeé pea ʻikai lava ke moʻui ʻa e pēpeé hili hono fāʻeleʻi maí. Ka neongo ʻa e ngaahi tūkunga ko ʻení, ʻoku ʻikai ke fakatonuhiaʻi noa pē ʻe kinautolu ia hano fai ha fakatōtama. ʻOku totonu ke toki fakakaukau ʻe kinautolu ʻoku fehangahangai mo e ngaahi tūkunga ko ʻení ke toki fai ha fakatōtama hili haʻanau talanoa ki ai mo ʻenau kau taki faka-Siasi ʻi honau feituʻú pea mo maʻu e fakapapau ʻoku fakafou mai ʻi he lotu fakamātoató.

ʻI he taimi ʻoku fakatupu ai ha fānau tuʻutāmaki, ko e founga lelei tahá ko e mali ʻa e faʻē mo e tamai ʻa e fānaú pea ngāue ke fokotuʻu ha vā fetuʻutaki fakafāmili ʻoku taʻengatá. Kapau ʻoku ngalingali he ʻikai ola lelei ʻa e nofomalí, ʻoku totonu ke tuku atu ʻa e fānaú ke ohi, ʻo lelei tahá ke fakafou ia ʻi he Ngaahi Ngāue Tokoni ʻa e Siasí maʻá e Fāmilí.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé