Nofotuʻí

Ko e nofotuʻí ko ha vahaʻa taimi ia ʻo e taʻu ʻe 1,000. Ko e taimi ʻoku tau talanoa ai ki he “Nofotuʻí,” ʻoku tau ʻuhinga ki he taʻu ʻe 1,000 hili e Hāʻele ʻAnga Ua Mai ʻa e Fakamoʻuí (vakai Fakahā 20:4; Tokāteline mo e Ngaahi Fuakava 29:11). Lolotonga e Nofotuʻí, “ko Kalaisi pē ʻe pule ʻi he māmaní” (Ngaahi Tefito ʻo e Tui 1:10).

ʻE hoko ʻa e Nofotuʻí ko ha taimi ia ʻo e angatonu mo e melino ʻi he māmaní. Kuo ʻosi fakahā ʻe he ʻEikí “ʻi he ʻaho ko iá ʻe ngata ʻa e tāufehiʻa ʻa e tangatá, mo e tāufehiʻa ʻa e fanga manú, ʻio, ʻa e tāufehiʻa ʻa e kakano kotoa pē” (Tokāteline mo e Ngaahi Fuakava 101:26; vakai foki ʻĪsaia 11:6–9). Pea ʻe “haʻi ʻa Sētane, ke ʻoua naʻa ʻi ai hano nofoʻanga ʻi he loto ʻo e fānau ʻa e tangatá” (Tokāteline mo e Ngaahi Fuakava 45:55; vakai foki Fakahā 20:1–3).

ʻI he lolotonga ʻo e Nofotuʻí, ʻe lelei mo angatonu ʻa e kakai kotoa ʻi he funga ʻo e māmaní, ka ʻe ʻi ai hanau tokolahi ʻe teʻeki ai ke nau maʻu ʻa e kakato ʻo e ongoongoleleí. ʻI heʻene peheé, ʻe fakahoko leva ʻe he kāingalotu ʻo e Siasí ʻa e ngāue fakafaifekaú.

ʻE toe kau foki mo e kāingalotu ʻo e Siasí ʻi he ngāue fakatemipalé ʻi he lolotonga ʻo e Nofotuʻí. ʻE hoko atu ʻa e kāingalotú ʻi hono langa ʻo e ngaahi temipalé mo maʻu ʻa e ngaahi ouaú, ʻo fakafofongaʻi honau kāinga kuo pekiá. ʻI he fakahinohino mei he fakahaá, te nau teuteu ʻa e ngaahi lekooti ʻo ʻenau ngaahi kuí ʻo aʻu kia ʻĀtama mo ʻIvi.

ʻE hokohoko ai pē ʻa e māʻoniʻoní mo e melinó kae ʻoua kuo ngata ʻa e taʻu ʻe 1,000, pea ʻe toki “vete ange [ʻa Sētane] ʻo kiʻi fuofuoloa siʻi, koeʻuhí ke ne tānaki fakataha mai ʻa ʻene ngaahi kau taú.” ʻE tauʻi ʻe he ngaahi konga kau ʻa Sētané ʻa e kau tau ʻo e langí, ʻa ia ʻe taki mai ʻe Maikeli, pe ko ʻĀtama. ʻE ikunaʻi ai ʻa Sētane mo hono kau muimuí pea kapusi ki tuʻa ʻo taʻengata. (Vakai Tokāteline mo e Ngaahi Fuakava 88:111–15.)

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé