Hē mei he Moʻoní

ʻI he taimi ʻoku tafoki ai ha niʻihi fakafoʻituitui pe falukunga kakai mei he ngaahi tefitoʻi moʻoni ʻo e ongoongoleleí, ʻoku nau ʻi ha tuʻunga leva ʻo e hē mei he moʻoní. Ko e sīpinga ʻe taha ʻo e Hē Fakaʻaufuli mei he Moʻoní, ʻa ia naʻe hoko hili hono fokotuʻu ʻe he Fakamoʻuí ʻa Hono Siasí. Hili e pekia ʻa e Fakamoʻuí pea mo ʻEne kau ʻAposetoló, naʻe hanga ʻe he tangatá ʻo fakakeheʻi ʻa e ngaahi tefitoʻi moʻoni ʻo e ongoongoleleí pea nau fai ha ngaahi liliu taʻe fakamafaiʻi ki he ngaahi fokotuʻutuʻu ʻo e Siasí pea mo e ngaahi ouau ʻo e lakanga fakataulaʻeikí. Koeʻuhí ko e lahi ko ʻeni e mafola ʻa e hē mei he moʻoní, naʻe ʻave ai ʻe he ʻEikí ʻa e mafai ʻo e lakanga fakataulaʻeikí mei he māmaní. Naʻe hoko ai pē ʻa e hē ko ʻeni mei he moʻoní ʻo aʻu ki he taimi naʻe hā ai ʻa e Tamai Hēvaní mo Hono ʻAlo ʻOfaʻangá kia Siosefa Sāmita ʻi he 1820 pea fakahoko ai hono Fakafoki Mai ʻo e kakato ʻo e ongoongoleleí.

ʻOku tui ʻa e Kau Māʻoniʻoni ʻi he Ngaahi ʻAho Kimui Ní, naʻe fakafoki mai ki he māmaní ʻa e mafai ke ngāue ʻi he huafa ʻo e ʻOtuá, ʻo fakafou ʻi he lakanga fakataulaʻeiki naʻe foaki kia Siosefa Sāmita ʻi he ngāue fakaetauhi ʻa e ʻāngeló. Ko e tui faka-Kalisitiane ʻeni kuo “fakafoki maí” kae ʻikai ko e “fakafoʻou.” ʻOku tokoni ʻa ʻenau tui ki ha tui faka-Kalisitiane kuo fakafoki maí ke fakamatalaʻi ʻa e ʻuhinga ne ului ai ʻa e Kāingalotu papi ului tokolahi, mei he 1830 tupú ki he ʻahó ni, mei he ngaahi siasi faka-Kalisitiane kehé. Naʻe ʻikai fakakaukau ʻa e kau ului ko ʻení ʻoku nau mavahe mei he tui faka-Kalisitiané; ʻoku nau houngaʻia pē ke ʻilo, pea hoko ko ha konga, ʻo e Siasi ʻo Sīsū Kalaisi kuo fakafoki maí, ʻa ia ʻoku nau tui ʻokú ne ʻomi ha Siasi faka-Kalisitiane ʻoku kakato mo mahu ange ʻi he fakalaumālie, fakaefokotuʻutuʻu, mo fakatokāteline.

Lolotonga e Hē Fakaʻaufuli mei he Moʻoní, naʻe ʻikai toe maʻu ʻe he kakaí ha fakahinohino fakalangi mei he kau palōfita moʻuí. Naʻe lahi ha ngaahi siasi ne fokotuʻu, ka naʻe ʻikai ke nau maʻu e mālohi ʻo e lakanga fakataulaʻeikí ke tataki e kakaí ke nau ʻiloʻi moʻoni ʻa e ʻOtua ko e Tamaí pea mo Sīsū Kalaisi. Naʻe fakakeheʻi pea mole ha ngaahi konga ia ʻo e folofola māʻoniʻoní, pea naʻe ʻikai maʻu ʻe ha taha ʻa e mafai ke foaki e meʻafoaki ʻo e Laumālie Māʻoniʻoní pe fakahoko e ngaahi ouau kehe ʻo e lakanga fakataulaʻeikí.

ʻOku tau lolotonga moʻui ʻi ha kuonga kuo toe fakafoki mai ai e ongoongolelei ʻo Sīsū Kalaisí. He ʻikai ke ikunaʻi ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻe ha hē lahi mei he moʻoní ʻo hangē ko e Siasi he ngaahi kuohilí. ʻOku akoʻi mai ʻe he folofolá he ʻikai ʻaupito ke toe fakaʻauha e Siasí (vakai, Tokāteline mo e Ngaahi Fuakava 138:44; vakai foki, Taniela 2:44).

Neongo he ʻikai ke ʻi ai ha hē mei he moʻoní, ka kuo pau ke tau takitaha fakaʻehiʻehi mei he hē fakafoʻituitui mei he moʻoní ʻaki hono tauhi e ngaahi fuakavá, talangofua ki he ngaahi fekaú, muimui ki he kau taki ʻo e Siasí, maʻu ʻa e sākalamēnití, mo hokohoko fakamālohia ʻetau fakamoʻoní ʻo fakafou ʻi hono ako fakaʻaho ʻo e folofolá, lotu, mo e ngāue tokoni.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé