Tīkoní

Ko e lakanga fakataulaʻeikí ko e mālohi mo e mafai ia ʻo e ʻOtuá. ʻE lava ke foaki ki he kau talavou moʻui tāú ʻa e Lakanga Taulaʻeiki Faka-ʻĒloné ʻo kamata ʻi Sānuali ʻo e taʻu ʻoku hoko ai honau taʻu 12. ʻI he taimi ko iá, ʻoku toe fakanofo foki kinautolu ki he lakanga ʻo e tīkoní—ko ha lakanga ʻoku angamaheni ke nau maʻu ʻo aʻu ki he taʻu ʻoku hoko ai honau taʻu 14.

ʻOku fokotuʻutuʻu ʻa e kau tīkoní ki ha ngaahi kōlomu ʻi honau uōtí mo e koló. ʻOku tokangaʻi e kōlomu tīkoni takitaha ʻe ha tīkoni kuo vaheʻi ko e palesiteni pea ʻokú ne maʻu e ngaahi kī lakanga fakataulaʻeiki ke tataki e kōlomu ko iá (vakai, Tohi Tuʻutuʻuni Fika 2: Ko Hono Puleʻi ʻo e Siasí, 8.3.2; Tokāteline mo e ngaahi Fuakava 107:85).

Ko e kau pīsopelikí ʻa e kau palesitenisī ʻo e Lakanga Taulaʻeiki Faka-ʻĒloné (vakai, Tokāteline mo e Ngaahi Fuakava 107:15). ʻOku feongoongoi e tokoni ua ʻi he kau pīsopelikí mo e kōlomu ʻo e kau tīkoní pea ʻokú ne akoʻi kinautolu ki he ngaahi fatongia ʻo honau lakangá.

ʻOku kau eni ʻi he ngaahi fatongia ʻo ha tīkoni (vakai, Tohi Tuʻutuʻuni Fika 2, 8.1.1.1):

• ʻOkú ne tufa ʻa e sākalamēnití.

• ʻOku “fokotuʻu [ia] ke leʻohi ʻa e siasí” (Tokāteline mo e ngaahi Fuakava 84:111). Kuo pau ke ne “fakatokanga, fakamatala, naʻinaʻi, mo akonaki pea fakaafeʻi ʻa e kakai kotoa pē ke nau haʻu kia Kalaisi” (Tokāteline mo e Ngaahi Fuakava 20:59). ʻOku kau ʻi he fatongia ko ʻení ʻa e fakafeohi ki he kau mēmipa ʻo e kōlomú mo e kau talavou kehé, fakamanatu ki he kāingalotú ʻa e ngaahi fakatahaʻanga ʻa e Siasí, lea ʻi he ngaahi fakatahaʻangá, vahevahe e ongoongoleleí, mo e vahevahe ʻo e fakamoʻoní.

• ʻOkú ne tokoni ki he pīsopé ʻi hono “fakahoko ʻo e ngaahi meʻa fakatuʻasinó” (Tokāteline mo e Ngaahi Fuakava 107:68). ʻE lava ke kau ʻi he fatongia ko ʻení ʻa hono tānaki ʻo e foaki ʻaukaí, tokangaʻi ʻo e masivá mo e faingataʻaʻiá, tokangaʻi ʻo e ngaahi ʻapisiasí mo hono kelekelé, pea hoko ko ha talafekau ki he pīsopé ʻi he ngaahi fakatahaʻanga ʻa e Siasí.

• ʻOkú ne tokoni ki he pīsopé ʻi ha ngaahi founga kehe ʻoku fenāpasi mo e lakanga ʻo e tīkoní. ʻOkú ne toe tokoni foki ki he kau akonakí “ʻi [honau] ngaahi fatongia [kotoa] ʻi he siasí … ʻo kapau ʻe fie maʻu” (Tokāteline mo e Ngaahi Fuakava 20:57).

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé

“Ngaahi Kī Toputapu ʻo e Lakanga Taulaʻeiki Faka-ʻĒloné”

“Ko Ha Palesiteni Kōlomu (Vaʻe ʻo Teitoní)”