Ngāue Tokoní

Lolotonga ʻa e ngāue fakafaifekau ʻa Sīsū Kalaisi ʻi he māmaní, naʻá Ne fakaʻaongaʻi Hono taimí ki he ngāue tokoni mo hono tokoniʻi ʻo e niʻihi kehé. ʻOku fakahoko pehē mo e kau ākonga moʻoni ʻa Sīsū Kalaisí. Naʻe folofola ʻa e Fakamoʻuí, “ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu” (Sione 13:35).

Ko kinautolu ‘oku papitaisó ʻoku nau fuakava ke toʻo kiate kinautolu ʻa e huafa ʻo Sīsū Kalaisí. Naʻe fakamatalaʻi ʻe he palōfita ko ʻAlamaá ʻa e fuakavá ni ki ha kulupu ʻo e kau ului foʻou naʻa nau fie papitaiso. Naʻá ne vakai naʻe kau ʻi heʻenau loto-holi ke “hū ki he lotoʻā sipi ʻo e ʻOtuá” ha loto-fiemālie ke fakahoko ha tokoni ʻoku ʻaongá—ke “fefuaʻaki ʻa [e] kavengá, koeʻuhí ke nau maʻamaʻa,” ke “tangi fakataha mo kinautolu ʻoku tangí,” pea ke “fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9).

Ko e Fakamoʻuí ʻa e sīpinga lelei taha ʻo e ngāue tokoní. Neongo naʻá Ne haʻu ki he māmaní ko e ʻAlo ʻo e ʻOtuá, ka naʻá Ne ngāue tokoni loto-fakatōkilalo kiate kinautolu kotoa pē naʻa nau feohí. Naʻá Ne folofola, “ʻOku ou ʻiate kimoutolu ʻo hangē ko ia ʻoku tauhí” (Luke 22:27).

Naʻe ngāue ʻaki ʻe he Fakamoʻuí ha talanoa fakatātā ke akoʻi ʻa e mahuʻinga ʻo e ngāue tokoní. Naʻá Ne fakahā ʻi he talanoa fakatātaá ʻo kau ki Heʻene toe foki mai ki he māmaní ʻi Hono nāunaú pea mo hono fakamavaheʻi ʻo e kau māʻoniʻoní mei he kau faiangahalá. ʻOkú Ne folofola ki he kau māʻoniʻoní ʻi he talanoa fakatātaá ni: “Haʻu ʻa kimoutolu kuo monūʻia ʻi heʻeku Tamaí, ʻo maʻu ʻa e puleʻanga kuo teu moʻomoutolu talu mei he kamataʻanga ʻo māmaní: He naʻá ku fiekaia, pea naʻa mou foaki ʻa e meʻakai kiate au: naʻá ku fieinua, pea naʻa mou foaki ʻa e inu kiate au: ko e muli au, pea naʻa mou fakaafeʻi au: telefua, pea naʻa mou fakakofuʻi au: naʻá ku mahaki, pea naʻa mou ʻaʻahi mai kiate au: naʻá ku ʻi he fale fakapōpulá, pea naʻa mou haʻu kiate au” (Mātiu 25:34–36).

ʻE fehuʻi ʻe he kau māʻoniʻoní, ʻa ia ʻoku nau puputuʻu ʻi he meʻa ko ʻení ʻo pehē: “ʻEiki, naʻa mau mamata kiate koe ʻanefē ʻokú ke fiekaia, pea mau fafangaʻi koe? pea fieinua, pea mau foaki ʻa e inu kiate koe? Naʻa mau mamata kiate koe ʻanefē ko e muli, pea mau fakaafeʻi koe? pe telefua, pea mau fakakofuʻi koe? Pea naʻa mau mamata kiate koe ʻanefē ʻokú ke mahaki, pe ʻi he fale fakapōpulá, pea mau ʻalu atu kiate koe?” (Mātiu 25:37–39).

ʻOku tali ange leva ʻe he ʻEikí, “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).

‘Oku taʻefakangatangata ʻa e ngaahi faingamālie ke ngāue tokoni ki he niʻihi kehé. ʻE lava ʻe he ngaahi lea mo e ngāue angaʻofá ʻo hiki hake ʻa e ngaahi kavenga mafasiá pea fakafiefiaʻi e lotó. Ko hono vahevahe ʻo e ongoongoleleí ko ha ngāue tokoni maʻongoʻonga ia ʻoku taʻengata hono ngaahi nunuʻá. Ko e meʻa mahuʻinga moʻoni ki he fiefiá ko e ngāue ki he fiefia ʻa e niʻihi kehé.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange