Hisitōlia Fakafāmilí

Ko e hisitōlia fakafāmilí ko e fekumi ia ke ʻiloʻi mo ako lahi ange ʻo kau ki he kau mēmipa hotau fāmilí mo hono tānaki mo fakatolonga ha fakamatala kau kiate kinautolu. Ko hono fakahoko foki ia ʻo e ngaahi ouau fakamoʻuí maʻa kinautolu ʻi he ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní.

Ko e ngaahi fāmilí ʻa e uho ʻo e palani ʻo e fiefia ʻa e Tamai Hēvaní. Kuó ne teuteu ha hala ke hokohoko atu ai e ngaahi vā fetuʻutaki fakafāmilí ʻi ʻitāniti. ʻI heʻetau kau ko ia ʻi he ngāue fakatemipalé mo e hisitōlia fakafāmilí, ʻoku tau ʻilo lahi ange ai ʻo kau kiate kitautolu mo ʻetau ngaahi kuí. Te tau lava ʻo fehokotaki mo ʻetau ngaahi kuí ʻaki hono fakahoko ʻo e ngaahi ouau mahuʻingá maʻa kinautolu ʻi he ngaahi temipalé. ‘I heʻetau tokoni ki he kau mēmipa hotau fāmilí kuo pekiá ke nau fakalakalaka ʻi he hala ʻo e fuakavá, te tau lava ai ʻo fakamālohia ʻa e ivi tākiekina ʻo e Laumālié ʻi heʻetau moʻuí mo fakaloloto ʻa ʻetau ngaahi fakamoʻoni ki he palani ʻo e fakamoʻuí.

‘E lava foki ʻe he hisitōlia fakafāmilí ʻo fakamālohia hotau vā fetuʻutaki mo e kau mēmipa hotau fāmilí ʻoku kei moʻuí. ‘I heʻetau vahevahe ʻa e ngaahi meʻa ʻoku tau ʻiló, ngaahi talanoá, taá, mo e ngaahi manatu melie kehé, ʻoku tau fokotuʻu ai ha ngaahi haʻi fakafāmili mo fakamālohia ʻa e ʻofá ʻi he vā ʻo e kau mēmipa hotau fāmilí. ‘I he ʻuhinga ko ʻení, ʻoku mahulu hake ai ʻa e hisitōlia fakafāmilí ʻi he fakatotolo pē ki ha ngaahi hingoa, ʻaho, mo e feituʻú.

ʻOku tuku mai ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngāue taʻetotongi, FamilySearch, ʻa ia ʻokú ne tokoniʻi ʻa e kakaí ke fakafehokotaki mo honau ngaahi fāmilí. ‘Oku tuku mai ʻe he tokoni fakaemāmanilahi ko ʻení ʻa e ngaahi meʻa ngāue, ngaahi ngāue, mo e tekinolosia ke tokoni ki he kakai kotoa pē ke nau ʻiloʻi, tānaki, mo fehokotaki mo honau ngaahi fāmilí—ʻi he kuohilí, lolotongá, mo e kahaʻú.

Ako ʻo lahi ange ki he founga te ke lava ai ʻo kamata ʻi hoʻo hisitōlia fakafāmilí mo e founga ʻe lava ke faitāpuekina ai hoʻo moʻuí.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange