ʻOfa Faka-Kalaisí

Ko e ʻofa faka-Kalaisí ko e ʻofa haohaoa ia ʻa Kalaisí. Ko e ʻofa ia ʻoku maʻu ʻe Kalaisi maʻá e fānau ʻa e tangatá pea ʻoku totonu ke fevahevaheʻaki ia ʻe he fānau ʻa e tangatá. Ko e ʻofa māʻolunga, fakaʻeiʻeiki mo mālohi tahá ia pea ko e fakafiefia taha ia ki he laumālié (vakai, 1 Nīfai 11:23).

Ko e ʻofa faka-Kalaisí ʻa e “ʻofa haohaoa ʻa Kalaisí,” pe “ʻofa ʻoku lauikuongá” (Molonai 7:47; 8:17). Naʻe akoʻi ʻe he palōfita ko Molomoná: “ʻOku kātaki fuoloa ʻa e manavaʻofá, pea ʻoku ʻofa ia, pea ʻoku ʻikai meheka, pea ʻoku ʻikai fakafuofuolahi, ʻoku ʻikai kumi ʻene meʻa ʻaʻana, ʻoku ʻikai ʻitangofua, ʻoku ʻikai fakakaukau kovi, pea ʻoku ʻikai fiefia ʻi he angahalá ka ʻoku fiefia ʻi he moʻoní, ʻokú ne kātaki ʻi he meʻa kotoa pē, ʻoku tui ki he meʻa kotoa pē, ʻoku ʻamanaki ki he meʻa kotoa pē, ʻoku kātekina ʻa e meʻa kotoa pē” (Molonai 7:45; vakai foki, 1 Kolinitō 13:4–7).

Ko Sīsū Kalaisi ʻa e sīpinga haohaoa ʻo e ʻofa faka-Kalaisí. ʻI Heʻene ngāue ʻi māmaní, naʻá Ne “feʻaluʻaki ʻo fai lelei” maʻu pē, ʻo akoʻi ʻa e ongoongoleleí mo fakahaaʻi ʻa e manavaʻofá ki he masivá, faingataʻaʻiá, mo e mamahí (vakai, Mātiu 4:23; Maʻake 6:6; Ngāue 10:38). Ko ʻEne fakafōtunga fungani taha ʻo e ʻofa faka-Kalaisí ko ʻEne Fakalelei taʻefakangatangatá. Naʻá Ne folofola ʻo pehē, “ʻOku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhí ko hono kāingá” (Sione 15:13). Ko e ngāue maʻongoʻonga taha ʻeni ʻo e kātaki fuoloa, angaʻofa, mo e taʻesiokita ʻe faifaiange pea tau ʻilo ki aí.

ʻOku finangalo ʻa e Fakamoʻuí ke maʻu ʻe he kakai kotoa pē ʻa ʻEne ʻofá pea vahevahe ia mo e niʻihi kehé. Naʻá Ne folofola ki Heʻene kau ākongá: “ʻOku ou tuku ʻa e fekau foʻou kiate kimoutolu, Koeʻuhí ke mou feʻofaʻaki kiate kimoutolu; pea hangē ko ʻeku ʻofa kiate kimoutolú, ke mou feʻofaʻaki kiate kimoutolu. ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu” (Sione 13:34–35). ʻI he ngaahi vā fetuʻutaki ʻa e kau mēmipa ʻo e fāmilí mo e niʻihi kehé, ʻoku vakai ʻa e kau muimui ʻa Kalaisí ki he Fakamoʻuí ko honau faʻifaʻitakiʻanga pea faifeinga ke ʻofa ʻo hangē ko ʻEne ʻofá, ʻo ʻikai hōloa, [kae] faʻa kātaki, mo ʻaloʻofa.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé