Loto ʻapasiá

Ko e ʻapasiá ko ha fakaʻapaʻapa mo ha ʻofa lahi ia. Ko ha ʻulungaanga ʻapasia ia ki he ʻOtuá kau ai hono fakaʻapaʻapaʻi Iá, fakahā e fakamālō kiate Iá, mo e talangofua ki Heʻene ngaahi fekaú.

ʻI hono fakahā ʻe he kakaí ʻa e ʻapasia ki he ʻOtuá, ʻoku nau fakahā foki ʻa e ʻapasia mo e houngaʻia ki Heʻene ngaahi tāpuakí, ngaahi fekaú, kau palōfitá, ko Hono Siasí, ngaahi ouaú, ko ʻEne lakanga fakataulaʻeikí, mo ʻEne palani ki Heʻene fānaú. ‘Oku kau ʻi he loto-ʻapasiá ʻa e fakaʻapaʻapaʻi kitá mo e maʻa fakatāutahá. ‘Oku iku ia ki he moihū totonú mo e ʻulungaanga totonú.

ʻOku kau ʻi he tōʻonga ʻapasiá ʻa e lotú, ako folofolá, ʻaukaí, mo hono totongi ʻo e vahehongofulú mo e ngaahi foakí. ‘Oku kau ai ʻa e ngaahi fakakaukau ʻoku leleí, tui ʻo e teunga tāú, mo hono fakaʻaongaʻi e lea ʻoku maʻa mo leleí. ‘Oku hāsino e lahi ʻo e loto-ʻapasia ʻa ha taha ʻi he hiva mo e fakafiefia kehe ʻokú ne filí, ʻi he anga ʻene lea kau ki he ngaahi meʻa toputapú, mo e anga ʻene teuteú mo e fakafōtunga ʻi heʻene ʻalu ki he lotú mo e moihū ʻi he temipalé. ʻOku kau foki ʻi he loto-ʻapasiá hono fakahoko ʻo e ngaahi fili māʻoniʻoní ʻo aʻu pē ki he taimi ʻoku ʻikai mamata mai ai ha tahá. ‘Oku iku e loto-ʻapasia ki he ʻEikí ki hono tokoniʻi ʻo e kakai kehé mo e angaʻofa mo fakaʻapaʻapaʻi kinautolú.

‘Oku iku e loto-ʻapasiá ki ha liliu fakalongolongo ʻi he moʻuí. ʻE lilingi lahi ange hifo ʻe he ʻEikí Hono Laumālié kiate kinautolu ʻoku loto-ʻapasiá. ‘Oku siʻi ange ʻenau faingataʻaʻiá mo e puputuʻú. ‘Oku nau lava ʻo maʻu ʻa e fakahā ke tokoni ke nau fakaleleiʻi ʻa e ngaahi palopalema fakataautaha mo fakafāmilí.

Hangē pē ko hono ʻomi ʻe he loto-ʻapasiá ha tokotaha ke ofi ange ki he ʻOtuá, ʻoku fenāpasi e taʻeʻapasiá mo e ngaahi taumuʻa ʻa e filí. ‘E ʻahiʻahiʻi ʻe Sētane ʻa e kakaí ke nau muimui ki he ākenga ʻa e māmaní ki he longoaʻa lahi angé, fakafiefia fakataimí, mo e fakakikihí, pea siʻi ange ʻa e mapuleʻi kitá mo e ngeia fakalongolongó.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange