Fakamoʻoní

Ko e fakamoʻoní ko ha fakamoʻoni fakalaumālie ia ʻoku fai mai ʻe he Laumālie Māʻoniʻoní. Ko e fakavaʻe ʻo ha fakamoʻoní ko e ʻiloʻi ko ia ʻoku moʻui ʻa e Tamai Hēvaní mo ʻofa ʻi Heʻene fānaú; ʻoku moʻui ʻa Sīsū Kalaisi, ko e ʻAlo Ia ʻo e ʻOtuá, pea naʻá Ne fakahoko e Fakalelei taʻefakangatangatá; ko e Siosefa Sāmita ʻa e palōfita ʻa e ʻOtuá ne uiuiʻi ke fakafoki mai e ongoongoleleí; ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e Siasi moʻoni ʻo e Fakamoʻuí ʻi he māmaní; pea ʻoku tataki ʻa e Siasí ʻe ha palōfita moʻui ʻi he ʻahó ni. ʻI he fakavaʻé ni, ʻoku tupulaki ha fakamoʻoni ke fakakau ki ai e ngaahi tefitoʻi moʻoni kotoa ʻo e ongoongoleleí.

‘Oku maʻu ʻe he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e faingamālie toputapu mo e fatongia ke maʻu ʻenau ngaahi fakamoʻoni pē ʻanautolu. ʻI hono maʻu ha fakamoʻoní, ʻoku ʻi ai ha fatongia ʻo e mēmipa takitaha ke tanumaki ia ʻi he kotoa ʻo e moʻuí. ʻOku fakatefito lahi e fiefia ʻi he moʻui ní pea mo hono kotoa ʻo e nofo taʻengatá ʻi he “toʻa [ʻa e niʻihi fakafoʻituituí] ʻi he fakamoʻoni ʻo Sīsuú” (Tokāteline mo e Ngaahi Fuakava 76:79; vakai foki, Tokāteline mo e Ngaahi Fuakava 76:51, 74, 101). ‘Oku tupulaki ʻa e fakamoʻoní ʻi hono fakaʻaongaʻi ʻo e ngaahi tefitoʻi moʻoni ko ʻení:

‘Oku kamata ʻa e fekumi ki ha fakamoʻoní ʻaki ha holi māʻoniʻoni fakamātoato. Naʻe akonaki ʻa ʻAlamā ki ha falukunga kakai ne teʻeki ke nau maʻu ha fakamoʻoni ki he ongoongoleleí ʻo pehē: “Kapau te mou ʻā hake ʻo fakaake homou ʻatamaí, ʻo ʻahiʻahiʻi ʻa ʻeku ngaahi leá, pea ngāue ʻaki ha kihiʻi konga siʻi ʻo e tuí, ʻio, kapau foki ʻoku ʻikai te mou lava ʻo fai ha meʻa lahi ange ʻi he holi pē ke tuí, tuku ʻa e holí ni ke ngāue ʻiate kimoutolu, kae ʻoua ke mou tui ʻi he anga te mou lava ai ʻo fakaʻatā ha potu ki ha konga ʻo ʻeku ngaahi leá” (ʻAlamā 32:27).

‘Oku maʻu ʻa e fakamoʻoní mei he ivi tākiekina fakalongolongo ʻo e Laumālie Māʻoniʻoní. ʻE lava ke fakaofo mo liliu moʻui ʻa e ngaahi ola ʻo ha fakamoʻoní, ka ʻoku faʻa maʻu e meʻaʻofa ʻo e fakamoʻoní ko ha fakapapau fakalongolongo, ʻo ʻikai fakaʻaliʻali fakaofo ai ʻa e mālohi ʻo e ʻOtuá. Naʻa mo ʻAlamā ʻa ia ne ʻaʻahi kiate ia ha ʻāngelo peá ne mamata ki he ʻOtuá ʻoku ʻafio ʻi Hono taloní, naʻe fie maʻu ke ne ʻaukai mo lotu kae lava ke ne maʻu ha fakamoʻoni ʻo fakafou ʻi he mālohi ʻo e Laumālie Māʻoniʻoní (vakai, ʻAlamā 5:45–46; 36:8, 22).

‘Oku tupulaki māmālie ʻa e fakamoʻoní ʻo fakafou ʻi he ngaahi meʻa ʻoku aʻusiá. ʻOku ʻikai ha taha te ne maʻu fakaʻangataha ha fakamoʻoni kakato. ‘Oku tupulaki ia ʻi he fakahaaʻi ʻe he niʻihi fakafoʻituituí ʻa e loto-fiemālie ke ngāue ʻi he Siasí pea ke ako, lotu, mo akó. ‘Oku tupulaki ia ʻi he talangofua ʻa e niʻihi fakafoʻituituí ki he ngaahi fekau ʻa e ʻOtuá. ‘Oku tupulaki ʻa e fakamoʻoní ʻi hono vahevahé.

Ko e konga ʻo e tupulaki ha fakamoʻoni ʻoku hoko ia he taimi ʻoku vahevahe aí. ‘I he Siasí ʻoku faʻa vahevahe ʻa e fakamoʻoní ʻi he ngaahi houalotu ʻaukaí mo e fakamoʻoní, ʻi he ngaahi kalasi ʻa e Siasí, pea ʻi he ngaahi fepōtalanoaʻaki mo e kau mēmipa ʻo e fāmilí mo e kaungāmeʻá.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Ange