Tauhi Fānaú

ʻI he “Ko e Fāmilí: Ko ha Fanongonongo ki Māmani,” naʻe fakahā ai ʻe he kau taki ʻo e Siasí, “ʻOku maʻu ʻe he mātuʻá ha fatongia toputapu ke ohi hake ʻa ʻenau fānaú ʻi he ʻofa mo e māʻoniʻoni, mo tokonaki maʻa ʻenau ngaahi fiemaʻu fakatuʻasinó mo fakalaumālié, pea hinoiʻi kinautolu ke nau feʻofoʻofani mo fetauhiʻaki, ke tauhi ʻa e ngaahi fekau ʻa e ʻOtuá pea hoko ko ha kau tangataʻi fonua tauhi lao ʻi he feituʻu pē ʻoku nau nofo aí.”

ʻOku ʻomi ʻe he tauhi fānau leleí ha faingamālie lahi ki he fiefiá neongo ʻe fuʻu faingataʻa ʻi ha taimi. ʻE lava ke aʻusia ʻe he mātuʻá ʻa e fiefia lahi ʻi hono fokotuʻu ha ʻātakai mālohi mo ʻofa ʻi ʻapi pea mo akoʻi ʻa e ngaahi tefitoʻi moʻoni ʻo e ongoongoleleí, ʻa ia ʻe lava ʻo tokoni ai ki he fānaú ke nau tataki ha moʻui ʻoku angatonu, fiefia, mo ʻaonga. (Vakai, 3 Sione 1:4.)

Kuo fekauʻi ʻe he ʻEikí ʻa e ngaahi mātuʻá ke nau “akonakiʻi hake ʻa [ʻenau] fānaú ʻi he māmá mo e moʻoní” (Tokāteline mo e Ngaahi Fuakava 93:40). ʻOku kau heni hono akoʻi ke mahino kiate kinautolu ʻa e ngaahi tokāteline ʻo e tui kia Sīsū Kalaisí, fakatomalá, papitaisó, pea mo e meʻa-foaki ʻo e Laumālie Māʻoniʻoní (vakai, Tokāteline mo e Ngaahi Fuakava 68:25) pea mo ʻofa ki heʻenau Tamai Hēvaní mo Sīsū Kalaisi. ʻOku totonu ke ʻuluaki fakahoko ʻa e akonaki ko ʻení ʻi ʻapi, ʻi hono fakaʻaongaʻi e ngaahi kalasi mo e polokalama ʻo e Siasí ke poupouʻi ʻaki e ngaahi ngāue ʻa e mātuʻá.

ʻE lava ke akoʻi ʻe he mātuʻá ʻenau fānaú lolotonga e efiafi fakafāmili ʻi ʻapí mo ha ngaahi fakataha fakafāmili kehe, hangē ko e lotu fakafāmilí mo e ako folofolá pe ʻi he taimi maʻu meʻatokoní. ʻOku hoko foki ʻa e ngaahi faingamālie akoʻí ʻi he ngaahi momeniti taʻeʻamanekiná ʻi he taimi ʻoku ngāue mo vaʻinga fakataha ai ʻa e mātuʻá mo e fānaú. Neongo pe ko e hā ʻa e tūkungá, ka ʻe tataki ʻe he ʻEikí ʻa e mātuʻá ʻi he taimi te nau fekumi ai ʻi he faʻa lotu ke ohi hake ʻenau fānaú ʻi he ʻofa mo e māʻoniʻoni.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé