Fakataha Alēlea ʻi he Langí

ʻI he maama fakalaumālié, naʻe ui ai ʻe he Tamai Hēvaní ha Fakataha Alēlea Lahi ke fakahaaʻi ai ʻa ʻEne palani ki heʻetau fakalakalaká (vakai, Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 239, 591). Ne tau ako ai kapau te tau muimui ki Heʻene palaní, te tau hoko ʻo hangē ko Iá. Te tau toetuʻu; te tau maʻu ʻa e mālohi kotoa pē ʻi he langí pea ʻi māmani; te tau hoko ko ha ongomātuʻa fakalangi pea maʻu mo ha fānau fakalaumālie ʻo hangē pē ko Iá (vakai, Tokāteline mo e Ngaahi Fuakava 132:19–20).

Naʻa tau ako te Ne ʻomi ha māmani maʻatautolu ʻa ia ʻe siviʻi ai kitautolu (vakai, ʻĒpalahame 3:24–26). ʻE ʻufiʻufi ʻe ha veili ʻa ʻetau ngaahi manatú, pea ʻe ngalo ʻiate kitautolu ʻa hotau ʻapi fakalangí. Naʻe mahuʻinga ʻeni kae lava ke tau fakaʻaongaʻi ʻetau tauʻatāina ke fili ʻa e leleí pe koví ʻo ʻikai ha kaunga ki ai ʻa e manatu ki heʻetau nofo fakataha mo ʻetau Tamai Hēvaní. … Te Ne tokoniʻi kitautolu ke tau fakatokangaʻi ʻa e moʻoní ʻi he taimi te tau toe fanongo ai ki ai ʻi he māmaní (vakai, Sione 18:37).

ʻI he Fakataha Alēlea Lahí ne tau ʻilo foki ai ʻa e taumuʻa ki heʻetau fakalakalaká: ke maʻu ha fiefia kakato. Ka neongo ia, naʻa tau ʻilo foki ʻe kākaaʻi ha niʻihi, fili ha ngaahi hala kehe, pea hē mei honau halá. Ne tau ʻilo ai te tau foua kotoa ha ngaahi faingataʻa ʻi heʻetau moʻuí: ʻa e puké, siva e ʻamanakí, faingataʻaʻiá, mamahí, mo e maté. Ka naʻe mahino kiate kitautolu ʻe hoko e ngaahi meʻá ni ke tau maʻu ai ʻa e potó pea ʻe ʻaonga ia kiate kitautolu (vakai, Tokāteline mo e Ngaahi Fuakava 122:7). Kapau te tau fakaʻatā e ngaahi faingataʻa ko ʻení, te ne hanga ʻo fakahaohaoaʻi kitautolu kae ʻikai ko hano fakafihiʻi kitautolu (vakai, Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 18–19).

ʻI he fakataha alēlea ko ʻení ne tau ʻilo foki ai, te tau faiangahala kotoa, tukukehe pē ʻa e fānau īkí, koeʻuhí ko hotau vaivaí (vakai, Tokāteline mo e Ngaahi Fuakava 29:46–47). Ne tau ʻiloʻi ʻe ʻomi ha Fakamoʻui maʻatautolu koeʻuhi ke tau lava ʻo ikunaʻi ʻa ʻetau ngaahi angahalá pea mo e maté, ʻaki ʻa e toetuʻú. Naʻa tau ʻilo kapau te tau tui kiate Ia, talangofua ki Heʻene folofolá pea muimui ki Heʻene sīpingá, ʻe hakeakiʻi kitautolu pea te tau hoko ʻo hangē ko ʻetau Tamai Hēvaní. Te tau maʻu ʻa e fiefia kakato.

Lekooti e Ngaahi Ongo ʻOkú ke Maʻú

Ngaahi Pōpoaki Lahi Angé