Maama ʻa Kalaisí

Ko e Maama ʻa Kalaisí ʻa e ivi fakalangi, mālohi, pe tākiekina mei he ʻOtuá ʻo fou mai ʻia Kalaisi pea ʻokú ne foaki ʻa e moʻui mo e maama ki he ngaahi meʻa kotoa pē. ʻOku tākiekina ʻe he Maama ʻa Kalaisí ʻa e kakaí ki he leleí mo teuteuʻi kinautolu ke nau maʻu ʻa e Laumālie Māʻoniʻoní. Ko hano fakahaaʻi ʻe taha ʻo e Maama ʻa Kalaisí ʻa e meʻa ʻoku tau ui ko ha konisēnisí.

Vakai Fakalūkufuá

Ko e Maama ʻa Kalaisí ʻa e ivi fakalangi, mālohi, pe tākiekina mei he ʻOtuá ʻo fou mai ʻia Kalaisi pea ʻokú ne foaki moʻui mo e maama ki he ngaahi meʻa kotoa pē. ʻOku tākiekina ʻe he Maama ʻa Kalaisí ʻa e kakaí ki he leleí mo teuteuʻi kinautolu ke nau maʻu ʻa e Laumālie Māʻoniʻoní. Ko hano fakahaaʻi ʻe taha ʻo e Maama ʻa Kalaisí ʻa e meʻa ʻoku tau ui ko ha konisēnisí.

Ko e Maama ʻa Kalaisí “ʻoku ʻalu atu mei he ʻao ʻo e ʻOtuá, ke fakafonu ʻa hono fuʻu lahi fau ʻo e ʻataá.” Ko ia ʻa e “maama ʻa ia ʻoku ʻi he ngaahi meʻa kotoa pē, ʻa ia ʻoku foaki ʻa e moʻui ki he ngaahi meʻa kotoa pē, ʻa ia ko e fono ʻoku puleʻi ʻaki ʻa e ngaahi meʻa kotoa pē” (Tokāteline mo e Ngaahi Fuakava 88:12–13; vakai foki, Tokāteline mo e Ngaahi Fuakava 88:6–11). Ko e mālohí ni ʻoku hoko ia ko ha fakaivia ki he leleí, ʻi he moʻui ʻa e kakai kotoa pē (vakai, Sione 1:9; Tokāteline mo e Ngaahi Fuakava 93:2). ʻOku ui ʻi he folofolá he taimi ʻe niʻihi ʻa e Maama ʻa Kalaisí ko e Laumālie ʻo e ʻEikí, Laumālie ʻo e ʻOtuá, Laumālie ʻo Kalaisí, pe ko e Maama ʻo e Moʻuí.

ʻOku ʻikai totonu ke fetoʻoaki ʻa e Maama ʻa Kalaisí mo e Laumālie Māʻoniʻoní. ʻOku ʻikai ko ha taha ʻeni ia ʻo hangē ko e Laumālie Māʻoniʻoní. ʻOku hanga ʻe hono mālohí ʻo taki ʻa e kakaí ke nau ʻilo ʻa e ongoongolelei moʻoní, papitaiso, pea maʻu ʻa e meʻa-foaki ʻo e Laumālie Māʻoniʻoní (vakai, Sione 12:46; ʻAlamā 26:14–15).

Ko e konisēnisí ko ha sino hā mai ia ʻo e Maama ʻa Kalaisí, ʻokú ne fakafaingofuaʻi kitautolu ke tau ʻilo ʻa e leleí mei he koví. Naʻe akoʻi ʻe he palōfita ko Molomoná: “ʻOku foaki ʻa e Laumālie ʻo Kalaisí ki he tangata kotoa pē, koeʻuhi ke ne ʻiloʻi ʻa e leleí mei he koví; ko ia, ʻoku ou fakahā kiate kimoutolu ʻa e founga ke fakamāú; he ko e meʻa kotoa pē ʻoku fakaafeʻi ke faileleí, pea ʻoku fakalotoʻi ke tui kia Kalaisí, ʻoku ʻomai ia ʻi he mālohi mo e foaki ʻa Kalaisí; ko ia te mou faʻa ʻiloʻi ai ʻi ha ʻilo haohaoa ʻoku tupu ia mei he ʻOtuá. … Pea ko ʻeni, ʻe hoku kāinga, ko e meʻa ʻi hoʻomou ʻiloʻi ʻa e maama ʻa ia te mou faʻa fakamāuʻi ʻakí, pea ko e maama ko iá ʻa e maama ʻa Kalaisí, tokanga ke ʻoua naʻa mou fakamaau taʻetotonu; he ko e anga ko ia ʻoku mou fakamaau ʻakí ʻe fakamāuʻi ai foki mo kimoutolu” (Molonai 7:16, 18).

Lekooti e Ngaahi Ongo ʻOkú ke Maʻú