Ke Tau Fiefia

ʻE hoku ngaahi tokoua, meʻa mohu tāpuekina moʻoni ko kitautolu! ʻOku ʻikai ngata pē ʻi he ʻetau mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka ʻoku tau toe mēmipa foki ʻi he Fineʻofá— “ko e kautaha ʻa e ʻEikí maʻá e houʻeiki fafiné.”¹ Ko e Fineʻofá ko e fakamoʻoni ia ʻoku ʻofeina ʻe he ʻOtuá Hono ngaahi ʻofefiné.

ʻIkai ʻoku vekeveke homou lotó ʻi hoʻomou manatu ki he hisitōlia ʻo e Fineʻofá mo hotau kamataʻanga fiefiá? ʻI he fuofua fakataha ʻa e Fineʻofá ʻi he ʻaho 17 ʻo Māʻasi, 1842 naʻe fakahā ai ʻe he Palōfita ko Siosefa Sāmitá naʻe ʻikai ke “haohaoa hono fokotuʻu ʻo e Siasí, kae ʻoua kuo fokotuʻu e houʻeiki fafiné.”² Naʻá ne fokotuʻu ʻa e houʻeiki fafiné “ʻi he malumalu ʻo e lakanga fakataulaʻeikí ʻi he sipinga ʻo e lakanga fakataulaʻeikí.”³ Ko e houʻeiki fafine ko ia ne kau mai ki he ʻuluaki Fineʻofá, ko ha kakai fefine tokosiʻi mo faivelenga, ʻo tatau mo e kau Fineʻofa ʻo e ʻaho ní. Naʻe kau ai ha kau finemui, kakai fefine matuʻotuʻa, kakai fefine ne nau ako lelei, mo ha kakai fefine naʻe ʻikai ke ʻi ai hanau tuʻunga fakaako. Naʻe ʻi ai ha kau fafine ne ʻosi mali, ngaahi faʻē mo ha niʻihi teʻeki mali. Naʻe ʻi ai ha kau fafine tuʻumālie mo ha niʻihi ne fuʻu masiva ʻaupito. Naʻa nau feʻofoʻofani mo loto fiengāue pea nau ʻofa ki he ʻEikí. ʻE toe mahino pea tākiekina lelei ange kitautolu he ʻahó ni ʻo kapau te tau manatuʻi e ngaahi ngāue naʻe fai ‘e he kau Fineʻofa ‘i he kuohilí.

ʻI he ʻuluaki fakataha ʻa e kau Fineʻofá, naʻe kole ange ai ʻe he Palōfita ko Siosefa Sāmitá ki he kau fafiné ke nau tokoni ki he Kau Takí “ʻi hono vakaiʻi e fie maʻu ʻa e kau masivá—fekumi ki ha niʻihi ke fai ki ai ha tokoni ʻofa, pea tokangaʻi ʻenau ngaahi fie maʻú.”⁴ Naʻá ne akonaki foki ki he kau fafiné ke nau “ ngāue ʻo fakatatau ki he ongoʻi manavaʻofa kuo tōkaki ʻe he ʻOtuá ʻi honau lotó.”⁵

Naʻe lotoʻaki ʻe he kau fafiné ʻa e tukupā ko ʻení pea kuo hoko ai ia ko ha kautaha mateaki ʻi hono tokoniʻi ʻo e masivá mo e faingataʻaʻiá. Naʻe pehe ʻe ʻEma Sāmita, “Te tau fai ha ngāue ʻoku makehe ange. ʻI he taimi ʻe toka ai ha vaka he vaitafé, mo ha kau Māmonga tokolahi ʻi lotó, te tau lau ia ko ha ui tokoni. ʻOku tau mateuteu ki ha ngaahi tūkunga fakatuʻupakē pehē mo ha ui fie maʻu tokoni.”⁶

ʻI he kamata mai ʻa e Siasí naʻe tokoni ai e kau fineʻofá ʻi heʻenau ʻalu mei he ʻapi ki he ʻapi. Naʻa nau fakahoko e meʻa ʻoku tau ui ko e faiako ʻaʻahí, pea naʻe fononga pehē holo ʻa e kau fineʻofá ʻo tokoni ki he kakai kotoa pē— ʻo tokangaʻi mo tokonaki maʻa ʻenau ngaahi fie maʻú, pea fakapapauʻi ʻoku ʻi ai hanau meʻakai, vala, nāunau fale, ngāue maʻuʻanga moʻui, nofoʻanga, pea mo ʻoange ʻa e tokoni naʻe fie maʻú. Kapau naʻe ʻi ai ha kiʻi koloa ʻa ha fefine ke vahevahe, naʻá ne ʻoange ia ki he kau faiako ʻaʻahí. Kapau naʻe ʻi ai haʻane fie maʻu, naʻe ʻomi ia ʻe he kau fafiné.⁷

Tau moʻuiʻaki muʻa ʻa e Fineʻofá ʻo hangē ko e akonaki ʻa Palesiteni Poiti K. Pēká: “ʻOku hanga ʻe he ngāue tokoni ʻi he Fineʻofá ʻo fakamālohia mo fakatapui ʻa e fefine takitaha… . ʻI he taimi ʻokú ke moʻuiʻaki ai ʻa e Fineʻofá, ʻo fokotuʻutuʻu mo ngāueʻi ia pea kau atu ki aí, ʻokú ke poupou ai ki he taumuʻa te ne faitāpuekina e fefine kotoa pē ʻe aʻu atu ki ai hono mālohí.”⁸

Hangē ko hono fakamatalaʻi ʻe ʻEma ʻa e vaka ne toka he vaitafé pea mo e kakai fie maʻu tokoní, ʻe lava ke tau fakatatau ia ki hotau kuongá ni ʻi he taimi ʻoku tau mamata ai ʻoku puke hotau kaungāʻapí, fie maʻu ke fakahinohinoʻi ha kiʻi tamasiʻi, fie maʻu ʻe ha talavou pe finemui hano kaungāmeʻa, pe ko ha fāmili kuo mole ʻenau paʻanga hū maí pea ʻoku nau fie maʻu ke tokoniʻi kinautolu ke nau moʻui pē ʻiate kinautolu. ʻOku tau fanongo ʻi he ngaahi faingataʻa, matangi mālohi pe mamahi fakatāutaha ʻoku aʻusia ʻe hotau ngaahi tokoua he feituʻu kotoa pē. ʻOku ʻikai fie maʻu ia ke tau felēleaki holo ʻo kumi ha meʻa pe ngāue ke tau fai.

Manatuʻi, ko e taimi lahi ko e tokoní ʻoku fie maʻu ke fai ia ʻi hotau ngaahi ʻapí, kaungāʻapí pe ʻi hotau ngaahi koló. Meimei ko e fie maʻu vivili tahá ko ha kiʻi lea fakalotolahi, ko ha kiʻi tohi fakamālō, telefoni, fofonga malimali, ngāue ʻaonga pea mo ha meʻa ke fakamanatu ʻaki e ʻofa ʻa e ʻOtuá ʻiate kitautolú. ʻOku lahi fau ha ngaahi founga ke tau hiki hake mo faitāpuekina ai e niʻihi kehé.

Ko e Fineʻofá ʻoku ʻikai ko ha kalasi pē ia ʻoku fai he Sāpaté. ʻOku ʻikai ko ha feituʻu pē ia ʻoku tau ʻalu ki ai ʻo kapau ʻoku ʻikai ke tau faiako ʻi he houalotu ʻa e Palaimelí pe Kau Finemuí. Ko e kautaha ia ʻa e ʻEikí maʻá e houʻeiki fafiné. Ko ʻetau kau ki he Fineʻofá ko ha konga ia ʻo hotau tukufakaholo mo e tāpuaki nāunauʻia ʻi heʻetau hoko ko e kakai fefine ʻi he Siasi ʻo e ʻEikí.

ʻI he ngaahi fuofua fakatahaʻanga ʻa e Fineʻofá, naʻe akonaki ai ʻa Siosefa Sāmita ki he kau fafiné ke nau feakoʻiʻaki ʻa e ongoongolelei ʻo Sīsū Kalaisí. Naʻá ne pehē, “ʻOku ʻikai ko e taumuʻa ʻo e kautahá ni ke tokoniʻi pē ʻa e masivá, ka ke fakahaofi foki ʻa e ngaahi laumālié.”⁹ Naʻá ne toe hoko atu ʻo pehē, “ʻOku ou maʻu ʻa e kií maʻamoutolu ʻi he taimí ni ʻi he huafa ʻo e ʻOtuá, pea ʻe fiefia ʻa e kautahá ni, pea ʻe tafe hifo atu mei ai ʻa e ʻiló mo e potó.”¹⁰ ʻOku ou manako he lea ko ʻení. ʻOkú ne fakamanatu mai ke u fiefia ʻi he ngaahi tāpuaki ʻa e ʻOtuá maʻá e houʻeiki fafine ʻo e Siasí ni.

Kuo fekumi maʻu pē ʻa e kau Fineʻofá ke nau ako pea mo nau tupulaki. ʻOku tau ʻiloʻi foki ko e “nāunau ʻo e ʻOtuá ko e ʻatamai potó.”¹¹

ʻI ha fakahā naʻe fai kia ʻEma he 1830 ʻo fakafou mai he Palōfita ko Siosefá, naʻe fakahā ai ʻe he ʻEikí ʻoku totonu ke ne “fakamatalaʻi ʻa e ngaahi folofolá pea … ekinaki ki he siasí, ʻo fakatatau ki he meʻa ʻe foaki kiate koe ʻe hoku Laumālié.”¹² Naʻe ʻikai ngata pē hono ʻomai kia ʻEma e fekau ko ʻení, ka naʻe toe fakamahino mai ʻe Siosefa ʻoku totonu ke fekumi e kau fafine kotoa pē ki he meʻafoakí ni.¹³ Naʻe akoʻi ʻe he houʻeiki fafiné ʻa e ongoongolelei ʻo Sīsū Kalaisí pea nau muimui ki he Fakamoʻuí ʻi heʻenau leá mo e ngāué. Naʻe fetauhiʻaki e kau fafiné ʻi he folofola lelei ʻa e ʻOtuá.¹⁴

Kuo ʻi ai ha kau fafine kuo nau pehē ʻoku nau ilifia ke akoʻi ha kalasi pe lea ki ha falukunga kakai. Tuku muʻa ke u fakapapauʻi atu mei he taukei kuó u maʻú, ʻe lava ke fakatupu manavasiʻi ʻeni. Tau manatu muʻa ki he lea ʻa ʻĪlisa R. Sinou ki hono fakafotu naʻe ui ke lea ki ha falukunga kakai. ʻI he tuʻu hake hono fakafotú, naʻe ʻikai lava ke ne lea koeʻuhí ko ʻene ilifiá. Faifai pē peá ne tangutu ki lalo. Naʻe ekinaki ʻofa mo anga vaivai ange ʻa ʻĪlisa, “ʻOua te ke tokanga ki ai, ka ʻo ka toe kole atu ke ke fai ha lea, feinga pē ke ke leaʻaki ha meʻa.”¹⁵

Te tau lava ʻo lea ʻaki ha meʻa ʻi heʻetau teuteuʻi kitautolu ʻo fakatatau mo e fakahinohino ʻa e ʻEikí. Naʻá Ne folofola mai ke tau “malangaʻaki ʻeku ongoongoleleí ʻi he Laumālié,” pea ko e tokotaha ko ia ʻoku malangá mo ia ʻoku fanongó ʻe “femahinoʻaki ʻa kinaua pea ʻoku fakamāmaʻi ʻa kinaua fakatouʻosi peá na fiefia fakataha.”¹⁶ ʻI heʻetau teuteu fakamātoato ʻo fakaʻaongaʻi ʻa e folofolá mo e nāunau ʻa e Siasí kuo fakangofuá pea mo kole tokoni ki he ʻEikí, te Ne ʻomi kiate kitautolu ʻa e “meʻafoaki taʻefakamatalaʻi ʻo e Laumālie Māʻoniʻoní,”¹⁷ pea te tau ʻiloʻi ʻa e meʻa ke tau leaʻakí ke lava ʻo fakamāmaʻi mo langaki hake ʻa e tokotaha kotoa pē.

ʻI he fakataha fakaʻofoʻofa ʻa e Fineʻofá naʻe fakahokó, naʻe hiki ʻe ʻĪlisa R. Sinou ʻi he minití ʻo pehē naʻe “meimei tuʻu ki ʻolunga e tokotaha kotoa pē ai ʻo lea, pea naʻe hangē ʻa e laumālie ʻo e ʻEikí ko ha vaitafe fakamaʻá, ʻo ne fakafoʻou ʻa e loto kotoa pē.”¹⁸ ʻOku mau fakatauange pē ʻoku ongoʻi ʻe hotau kau fafiné he ʻahó ni ʻoku fafangaʻi, fakamāmaʻi mo langaki hake kinautolu ʻi he taimi kotoa pē ʻoku nau ʻalu ai ki he lēsoni he Sāpaté, fakahoko ʻenau faiako ʻaʻahí, kau atu ki ha ʻekitivitī pe fai ha ngāue tokoni.

Ngaahi tokoua, ʻoku toe fakautuutu ange he taimí ni ʻetau fie maʻu e houʻeiki fafiné ke nau fakalakalaka mo mālohi. ʻOku tau fie maʻu ha kau fafine ʻoku nau fakahaaʻi ʻa e moʻoní ʻi he ivi lahi, tui mo e lototoʻa. ʻOku tau fie maʻu ke tā ʻe he kau fafiné ʻa e “sīpinga ʻo e anga māʻoniʻoní. ʻOku tau fie maʻu ke femoʻuekina e kau fafiné ʻi he ngaahi ngāue leleí.”¹⁹ ʻOku fie maʻu ke hoko ʻetau moʻuí ko ha fakamoʻoni ʻo ʻetau ʻofa ki heʻetau Tamai Hēvaní mo hotau Fakamoʻui ko Sīsū Kalaisí, pea ke tau fai ʻa Hona finangaló. ʻOku fie maʻu ke tau “haofakiʻi” ʻa e meʻa kotoa pē ʻoku fungani ʻi hotau lotó”²⁰ ke tau lava ʻi heʻetau hoko ko e ngaahi ʻofefine ʻo e ʻOtuá, ʻo fai hotau fatongia ʻi hono langa hake e puleʻanga ʻo e ʻOtuá. Te tau maʻu ha tokoni ke fai ʻeni. Hangē ko ia ne tala ʻe Siosefá, “Kapau te mou moʻuiʻaki homou ngaahi faingamālié, he ʻikai taʻofi ʻe he kau ʻāngeló ʻenau kau fakataha mo kimoutolú.”²¹

Tau fefuaʻaki muʻa ʻetau ngaahi kavengá, ʻo tangi fakataha mo kinautolu ʻoku tangí, fakafiemālieʻi ʻa kinautolu ʻoku fie maʻu e fakafiemālié pea mo tauhi e ngaahi fuakava kuo tau faí.²²

ʻOku tau monūʻia fau. ʻOku hoko ʻa e Fakamoʻuí ko e ʻulu ki he Siasí ni. ʻOku tataki kitautolu ʻe ha kau palōfita, kau tangata kikite mo ha kau maʻu fakahā ʻoku moʻui. ʻOku tau maʻu ʻa e ngaahi tohi folofola māʻoniʻoní ke tau lau, ako mo maʻu ai e ngaahi talí ʻi heʻetau moʻui fakaʻahó. ʻOku tau maʻu e ngaahi temipale māʻoniʻoní ʻi he funga ʻo e māmaní ʻa ia ʻe lava ke tau maʻu ai e ngaahi ouau ʻoku fie maʻu ke ne tokoniʻi kitautolu ke tau toe foki hake ki heʻetau Tamai Hēvaní. Pea ʻoku tau maʻu foki e niʻihi kehé ke tau fetokoniʻaki.

ʻOku ou mamata ki he “ ʻīmisi ʻo e ʻOtuá ʻoku tongitongi [ʻi he] fofonga”²³ ʻo kimoutolu ko e kau fafine lelei, ʻi heʻeku folaua ha ngaahi feituʻu lahi ʻo e māmaní. ʻOku ou fanongoa hoʻomou ngaahi ngāue leleí mo hoʻomou ngāue mateakí. ʻOku ou mamata ki he Maama ʻo Kalaisí ʻoku malama mei homou fofongá.

Hangē ko e fakalotolahi ne fai ʻe ʻEmá, ʻoku ou ʻiloʻi ʻe lava ke tau fai ha ngāue makehe ʻaupito he ʻahó ni. ʻE lava ke tau hoko ko ha kau tau angatonu ʻo e houʻeiki fafiné, ʻoku tau teunga tau ʻaki ʻa e ʻofá, manavaʻofá, angaleleí, ngāue tokoní pea mo e tuí. ʻE lava ke tau hoko ko ha kau tau maʻongoʻonga maʻá e leleí ʻi he māmani ko ʻení. Pea te tau hangē leva ko e fakamatala ʻa Palesiteni Pēká: “ʻE lava ke fakatatau ʻa e Fineʻofá ki ha fale hūfangaʻanga—ko ha feituʻu ʻo e haoʻanga mo e maluʻanga… . Te mou malu ai ʻi loto. ʻOkú ne ʻākilotoa e fefine takitaha ʻo hangē ha holisi malú.”²⁴ Kuo pau ke tau maʻu ʻa e feituʻu ʻo e haoʻanga mo e maluʻanga ko ʻení!

ʻIkai ʻoku mou loto vēkeveke ke kau atu ki he Fineʻofá? ʻI heʻetau manatua e ngāue ne fai ʻe he kau fafine fakaʻeiʻeiki ko ʻení ʻi he kuohilí, ʻe takiekina ai kitautolu he ʻahó ni pea ʻi he kahaʻú foki.

ʻOku ou fakamoʻoni ʻoku moʻui mo ʻofa mai ʻa e ʻOtuá ko ʻetau Tamai Hēvaní pea mo Hono ʻAlo ko Sīsū Kalaisí. ʻOku ou fakamoʻoni ʻoku tataki kitautolu ʻe ha palōfita ʻa e ʻOtuá. ʻOku ou fakamoʻoni ʻi heʻetau tauhi ʻetau ngaahi fuakavá, ʻe faitāpuekina lahi ai ʻa kitautolu. ʻI he huafa ʻo Sīsū Kalaisí, ʻēmeni.