I Dëgjova Fëmijët
Xhoi Kromër, Kaliforni, SHBA
Depresioni klinik ishte diçka me të cilën kurrë nuk dëshiroja të ndeshesha përsëri. Por pasi kisha qenë e çliruar prej tij për 12 vjet, ai u kthye.
Isha e frikësuar dhe e shqetësuar. E pyeta Atin Qiellor dhe u luta për forcën që t’ia dilja mbanë sprovës sime. Gjithashtu iu përgjërova Atij që depresioni im nuk do të zgjaste pesë vjet, siç kishte zgjatur herën e fundit.
Bashkëshorti im dhe unë kemi tre fëmijë, dy djem dhe një vajzë, të cilët na kanë bekuar me 13 nipër e mbesa. Duke e ditur dëshpërimin që po hasja, bija ime e organizoi familjen për një ditë agjërimi e lutjeje. Të gjithë nipërit e mbesat, mosha nga 1 deri në 10 vjeç, donin të luteshin për gjyshen dhe tre që ishin pagëzuar, donin të agjëronin. Ishte një ngushëllim i madh të dija se bashkëshorti im, fëmijët e mi dhe nipërit e mbesat e mia do të agjëronin e luteshin për hirin tim.
Të nesërmen, kur u zgjova nga një dremitje, ndjenja e depresionit nuk dukej dhe aq e fuqishme. Të nesërmen u largua edhe më shumë. Pas ditës së pestë, depresioni im u largua tërësisht. Atë mbrëmje, ndërsa po mendoja thellë rreth mënyrës se si kishte ndodhur kjo mrekulli, një zë ma preku qenien time dhe më tha: “I dëgjova fëmijët”. Ati Qiellor i kishte dëgjuar ata në pafajësinë e tyre dhe iu ishte përgjigjur lutjeve të tyre të përulësisë, besimit dhe dashurisë.
Shpëtimtari na mësoi:
“Në qoftë se nuk ktheheni dhe nuk bëheni si fëmijët e vegjël, ju nuk do të hyni fare në mbretërinë e qiejve.
Kush, pra, do të përulet si ky fëmijë i vogël, do të jetë më i madhi në mbretërinë e qiejve” (Mateu 18:3–4).
Kam pasur letërkëmbim me nipërit dhe mbesat e mia dhe i kam falënderuar për agjërimin dhe lutjen për hirin tim. U thashë atyre se sa shumë i dua. U thashë se Ati Qiellor i kishte dëgjuar ata dhe iu përgjigj lutjeve të tyre.
Ndërsa nipërit dhe mbesat e mia rriten në ungjill, shpresoj që ata do ta kujtojnë kohën kur Ati Qiellor i tha gjyshes së tyre: “I dëgjova fëmijët”. Dhe shpresoj që ajo përvojë do ta forcojë dëshminë e tyre dhe do t’i ndihmojë të qëndrojnë të fortë në ungjill.