Pagserbisyo diha sa Simbahan
Patatas alang sa Magtutudlo
Ang tagsulat nagpuyo sa Utah, USA.
Akong nakat-unan nga dili kinahanglan nga ako mohatag og mahinungdanong timailhan sa serbisyo matag higayon. Ang usa ka gamay nga timailhan sa gugma sama ra ka nindot.
Litrato pinaagi sa Feng Yu/iStock/Thinkstock
Isip usa ka magtutudlo sa elementarya nga sobra na sa 25 ka tuig, ako nakadawat og daghang makapaikag nga mga butang gikan sa akong batan-ong mga estudyante. Binata nga mga sulat, gidrowing nga mga litrato ug mga butang nga hinimo mga komon nga mga gasa. Sa miaging tuig, hinoon, mao ang unang higayon sukad nga ako nakadawat og patatas.
“Patatas alang sa magtutudlo,” ang batan-ong si Emma mapagarbuhong miingon sa iyang pagduol sa akong lamesa, “tungod kay ako walay mansanas.” Kasarangan ang gidak-on sa patatas, gilimpyohan, ug nindot alang sa usa ka patatas. Nagpasalamat ako kaniya ug gibutang kini sa akong lamesa. Akong nakita ang dakong asul nga mga mata ni Emma nga mosanag uban sa garbo sa matag higayon nga siya motan-aw niini sa tibuok adlaw.
Human sa klase, sa dihang nagtrabaho pa ko, dili nako kapugngan nga mopahiyom sa patatas. Ang mga bata yano kaayong makakita sa mga butang, ug nianang komon nga patatas, si Emma mitudlo kanako og usa ka butang nga importante. Gibilin nako kini sa akong lamesa sulod sa usa ka semana tungod kay kini nagsilbi nga usa ka pahinumdom ngari nako.
Isip usa ka visiting teacher ug usa ka sister sa akong ward, gusto kong moserbisyo sa uban, pero naghulat ko pirme sa usa ka “mansanas” sa dili pa ako motabang. Kon ako nagkapuliki ug dili makahimo og dugang nga pagkaon o kon ako gusto nga mohatag og espesyal nga bulak apan dili makaadto sa tindahan sa bulak, akong ibaliwala ang hunghong sa ligdong, hinay nga tingog sa Espiritu kabahin sa usa ka tawo nga nagkinahanglan sa akong pagserbisyo.
“Naa koy buhaton karong katapusan sa semana, kon duna koy panahon,” akong kombinseron ang akong kaugalingon. “Walay tawo nga nagkinahanglan kanako karon.”
Apan unsa kaha kon adunay nagkinahanglan gayud kanako? Unsa kaha kon wala nako gibaliwala ang aghat sa pagbisita sa usa ka tigulang nga silingan o sa batan-ong biyuda nga bag-ong namatyan og bana? Nakatabang o nakaserbisyo kaha ako, bisan pa sa unsay akong ikatanyag niadto—“patatas”?
Akong nakat-unan ang usa ka talagsaong leksyon gikan ni Emma nga gipaningkamutan nako nga buhaton. Kon wala koy mansanas, mohatag ko og patatas, ug buhaton ko kini karon. Dili ko maghulat nga makaluto og pagkaon o makahimo og espesyal nga lemon cream pie; mopalit hinoon ko og usa ka kahon nga sopas. Sa kasagaran dili ko makaadto sa tindahan sa mga bulak, apan ako makahapit aron makaistorya bisan walay bulak. Ang usa ka hinimo nga kard nindot na, apan mao usab ang pagtawag sa diha sa telepono. Dili kinahanglan nga ako mohatag og mahinungdanong timailhan sa serbisyo matag higayon. Usa ka gamay nga timailhan sa gugma sama ra ka nindot.
Anaa nako ang patatas karon sa amoa, apan dili gayud nako kini kan-on. Nagsilbi kini nga tigpahinumdom kanunay sa pagserbisyo kon ako maaghat. Ako mohatag sa unsay akong mahimo karon kay sa maghulat pa unya. Ang usa ka patatas alang sa magtutudlo mao gayud ang labing nindot nga regalo.