Atong mga Panimalay, Atong mga Pamilya
Ang Dalan ngadto sa Mahangturong Pamilya
Ang mga tagsulat gikan sa Alaska, USA, ug nagserbisyo og misyon sa Tonga.
Sa dihang sila nakabig, ang mga ‘Akau‘ola determinado nga makaadto sa templo.
Paghulagway pinaagi ni James L. Johnson; litrato sa maayong kabubut-on sa mga tagsulat
Usa ka Dominggo sa buntag, human nga nakig-inom og makahubog ug kava uban sa mga higala sa hapit tibuok gabii, si Siope ‘Akau‘ola sa Tonga padulong nang mopauli sa balay sa dihang nakakita siya og pamilya nga nagsul-ob sa ilang sinina nga pangsimba. Sila nangatawa ug nag-istoryahanay samtang sila nanglakaw. Si Siope naghunahuna unsay nakapalipay nila pag-ayo, busa iya silang gisundan aron masuta kon asa sila padulong.
Nakakita si Siope nga ang pamilya misulod sa usa ka Simbahan sa mga Santos sa Ulahing mga Adlaw. Siya nagtan-aw diha sa may bintana samtang miabut ang uban. Ang kalipay misanag sa ilang mga nawong samtang tupad nga naglingkod ang mga pamilya ug nanganta og mga himno.
Nakahunahuna si Siope sa iyang asawa, si Liu. Ang ilang gugma sa dihang bag-o pa silang naminyo nagkahanap. Gusto ni Siope nga mabalik kadto nga gugma. Nagdali-dali siya sa pag-uli ug misulti sa iyang asawa nga nakakita siya og paagi aron matabangan ilang pamilya nga molampos: kinahanglan sila nga magpamiyembro sa Simbahan.
Niana gyung adlawa si Siope miadto sa balay sa bishop diha sa iyang barangay. Ang bishop nakaila ni Siope, nakakita na niya nga hubog sa may kadalanan. Samtang sila nag-istoryahanay, nakita ni Siope diha sa nawong sa bishop ang pagduha-duha, apan hugot gyud iyang desisyon; siya maisugong misulti sa bishop nga gusto niyang magpabunyag. Ang bishop mihunong og kadiyot, mipasulod ni Siope, ug misugod sa pagtudlo kaniya sa ebanghelyo ni Jesukristo.
Si Liu nagduha-duha sa sinugdanan apan nakakita sa hinay-hinayng kausaban sa iyang bana. Si Siope misugod paggahin og mas daghang panahon uban sa ilang mga anak ug mas nagpakita og gugma sa iyang asawa ug pamilya pinaagi sa iyang mga lihok. Busa si Liu misugod sa pagpaminaw sa mga leksyon sa misyonaryo, ug sa wala madugay silang duha nabunyagan.
Samtang nagkaduol na ang usa ka tuig nga anibersaryo sa ilang mga bunyag, ang pamilyang ‘Akau‘ola namalandong sa talagsaong mga panalangin sa templo. Si Siope miingon, “Kon ang mga panalangin sa templo mas dako pa kaysa atong nadawat sa pagpabunyag, hunahunaa kon unsa gyud ka talagsaon ang mga panalangin sa templo.” Bisan pa sa ilang tinguha nga mabugkos, ang templo sa Tonga gipanindotan niining higayuna, busa kinahanglan nilang magpaabut og usa ka tuig o mogasto og mahal nga biyahe ngadto sa New Zealand o Fiji aron makaadto sa templo.
Ang pamilya naghunahuna og maayo ug nag-ampo unsay buhaton. Sa katapusan mihukom sila nga mag-loan og gamayng kantidad. Samtang nagpaabut nga maaprubahan, ang bangko nga nagproseso sa ilang loan nasunog. Ang tanang loan madelatar hangtud sunod nga tuig.
Si Siope ug Liu nawad-an og kadasig. Sila kaubang naglingkod sa ilang gamay nga sala ug nag-ampo og milagro. Samtang sila nag-ampo ug nagtinambagay sa usag usa, ang tubag miabut: “Akong nahanduraw ang van sa pamilya nga nagpahiyom ngari namo ug nasayud nga mao kini ang tubag sa among pag-ampo,” miingon si Siope. Ilang nabaligya ang van pagkasunod adlaw ug nakapalit og mga tiket sa eroplano padulong sa Fiji para sa ilang pamilya nga may lima ka sakop.
Sila miabut ngadto sa Nadi, Fiji, uban sa tulo ka gikapoy nga mga anak ug taas pa nga biyahe ngadto sa templo sa Suva. Si Liu miingon, “Akong nakat-unan nga kon mas maningkamot kita nga mas maduol ngadto sa balay sa Ginoo si Satanas mas maningkamot nga motintal nato nga moundang na sa wala pa nato makab-ot ang panalangin.”
Samtang naglingkod diha sa airport naghunahuna kon unsay sunod buhaton, usa ka babaye mitabang nila sa pag-andam og katulgan ug kasakyan padulong sa Suva pagkasunod adlaw nga mas barato kaysa sagad nga presyo. Mibati sila nga ang Dios mipadala og anghel aron sa pagtabang nila.
Miabut sila sa templo pagkasunod adlaw. “Sa among pagsulod sa templo mibati ko og kalinaw ug kakalma sa akong kasingkasing,” miingon si Liu. “Wala pa ko sukad makakita sa akong kinabuhi og ingon kalimpyo ug kaputi sama sa templo. Nakahunahuna ko: Kon ang templo usa ka balay nga hinimo sa tawo ug kini nindot kaayo, nan unsa kaha kanindot ang balay sa Langitnong Amahan nga gisaad kanato!”
Ang ilang mga kasinatian sa templo nakapausab sa kinabuhi sa pamilya. Si Liu miingon, “Sa tibuok panahon nga anaa mi sa Fiji, akong nabati ang gugma sa Langitnong Amahan para kanamo. Kon kita mopili sa pagsunod Kaniya, dili gyud ta Niya pasagdan.”
Talagsaong mga panalangin padayon nga miabut ngadto sa pamilyang ‘Akau‘ola sa ilang pag-uli. Sila si Siope ug Liu nakadawat og eskolarship sa kolehiyo, nakaangkon og degree sa pagtudlo, ug gidawat nga magtudlo sa Liahona High School.
Samtang nagtudlo, ilang nahibaloan kon kinsang mga bataa ang nagkinahanglan og kapuy-an. Usahay magtinagsa, kasagaran magtinagurha ug magtinagutlo, ang mga bata nga manuktok diha sa pultahan nilang Siope ug Liu. Ug dawaton sila ni Siope ug Liu. Ang ilang gamay nga panimalay karon adunay 20 ka mga tawo. Sila adunay lima pa ka “sinagup” nga mga bata kinsa nahilayo kanila tungod kay nag-eskwela sa kolehiyo o nagserbisyo og misyon.
Sila si Siope ug Liu nasayud nga kining mga bataa motubo ug molambo kon sila mobati nga gihigugma ug mahan-ay ang ilang kinabuhi. Kadtong mga dili miyembro sa Simbahan midawat sa ebanghelyo ug sa karon adunay naglambo nga tinguha sa pagserbisyo og misyon. Gitawag ni Siope ug Liu ang tanang anaa sa ilang pag-amuma nga ilang mga anak, ug ang tanang mga bata motawag nila ni Liu ug Siope og Mama ug Papa. Ang mga ‘Akau‘ola nasayud nga sila napanalanginan pag-ayo ug malipayon sa pagpakigbahin niini ngadto sa uban.