Usa ka Lakang Matag Higayon

Ang pagdawat og espirituhanong giya usa ka importante nga lakang sa pagserbisyo sa Ginoo, ug si Davide C., 15, nasayud nga kini dili mahitabo kon sa iyang bahin dili siya maningkamot. “Kinahanglan ko nga mahimong instrumento sa mga kamot sa Dios,” siya miingon. “Kinahanglan ko nga andam nga modawat ug mosunod sa mga aghat sa Espiritu. Sa pagbuhat niana, kinahanglan nakong palibutan kanunay akong kaugalingon sa mga butang sa Ginoo.”

Si Davide ug ang iyang pamilya mga kinabig sa Simbahan. Gani sa wala pa siya mabunyagi, si Davide nasayud na kon unsa kaimportante ang pagtuon sa mga kasulatan. Ang iyang igsoon nga lalaki mao ang una nga nabunyagan, ug dayon iyang mga ginikanan. Si Davide nasayud nga siya nagkinahanglan og iyang kaugalingong pagpamatuod. Samtang nagtuon siya sa Basahon ni Mormon, iyang nabati ang Espiritu. Ang maayong pagbati nga iyang gibati nakatabang niya nga modesisyon nga magpasakop sa Simbahan.

Paglabay sa upat ka tuig, si Davide nagsalig gihapon sa giya sa Espiritu. “Kinahanglang ta nga magmakanunayon. Dili mahimong magpaluya-luya sa atong pagtuon sa kasulatan ug pag-ampo,” miingon siya.

Si Marco D., 17, mipasabut og maayo sa kaimportante sa pagsunod sa mga sugo, ilabi na sa balaod sa kaputli. “Ang yawa motintal kanato sa tanang paagi, naningkamot nga kita makasala,” miingon si Marco. “Ang mga higala mahimo usab nga bati nga impluwensya.” Pipila ka tuig na ang milabay kinahanglang ilisan ni Marco ang mga higala nga iyang kuyugan tungod kay siya nakamatikod sa negatibong mga impluwensya nga nahimo niini ngadto sa iyang mga pagpili. “Kinahanglang mangita ko og mga higala kinsa modawat nako kon kinsa ko ug dili sa unsay gilauman sa kalibutan nga mamahimo ko.”

Usahay sa atong pagtungas sa bukid, madagma ta. Kon mahitabo kini, “pakigkita sa bishop ug dayag nga makigsulti kaniya,” awhag ni Marco. “Ang bishop atong igsoon. Kita makasalig kaniya.”

Ang iyang paningkamot nga magmasulundon ug magpabiling putli naghatag ni Marco og mga oportunidad sa pagserbisyo sa Dios karon, ug kini usab nag-andam kaniya nga mahimong takus sa pagserbisyo og full-time nga misyon sa umaabut.

Si Manuel M., 17, miila nga dili kanunay sayon ang pagserbisyo sa Dios. “Kanunay kita nga sulayan,” miingon si Manuel. “Usahay mas gusto natong mobuhat og laing butang. Usahay mas gusto nakong matulog, motan-aw og dula sa football, o mag-standby uban sa akong mga higala. Apan ang akong inahan kanunay nagtudlo nako nga kinahanglan ta nga mopili nga moserbisyo sa Ginoo. OK ra nga mobuhat sa ubang mga butang, apan ang pagserbisyo sa Ginoo kinahanglang maoy atong prayoridad.”

Si Miriam D., 14, nasayud nga ang bugtong paagi aron sa pagsiguro nga ang pagtuon sa kasulatan ug pag-ampo mahitabo matag adlaw mao ang paggahin og partikular nga oras nga buhaton kini. “Mibati ko nga daghan ko og mabuhat kon mogahin ko og panahon,” miingon si Miriam. “Gawas pa, kon kita mas mogahin og panahon sa Ginoo, kita dili kaayo matintal—kini mas makapalig-on nato.”

Para kang Sabrina D., 15, ang pagserbisyo uban sa tibuok niyang kasingkasing, gahum, hunahuna, ug kusog nagpasabut sa pagserbisyo uban sa buona volontà. Nagpasabut kini sa pagbuhat sa mga butang nga adunay andam ug malipayong kinaiya.

Si Alessio I., 12, miuyon: “Walay kahulugan ang pagbuhat niini kon tungod lang ang bishop o inyong ginikanan nagsugo lang kaninyo. Dili ka angay mobati nga obligado. Ang Ginoo gusto nga kita moserbisyo uban sa husto nga mga rason.”

Unsaon nato nga mas buona volontà samtang kita moserbisyo? “Ang pagbasa sa kasulatan nakatabang nako, tungod kay nagtudlo kini nato nga ang pagserbisyo mao ang angay nga buhaton,” miingon si Sabrina.

Ang pagtuon ug maayong pagsabut sa Pag-ula makatabang usab kanato nga mas andam ug malipayon sa pagserbisyo. Si Elvisa D., 17, miingon, “Sama sa Langitnong Amahan nga mipadala sa Iyang Anak, kinsa misakripisyo sa tanan alang kanato, kita kinahanglang andam sa pagpahinungod sa tanan natong mahimo sa pagserbisyo sa Ginoo.”

Sila si Sister Giulia, 16, ug si Veronica D., 14, nasayud nga importante nga motutok sa uban. “Ang pagserbisyo makatabang nga malahi ang atong panglantaw sa mga tawo. Kon moserbisyo mo og usa ka tawo, kamong duha mapanalanginan,” miingon si Giulia.

Si Veronica miingon, “Kausa gusto gyud nako nga mopakigbahin sa ebanghelyo, apan mibati ko nga dili andam. Nahadlok ko. Apan sa dihang nagtutok ko sa mga tawo nga akong giserbisyuhan, mibati ko nga mas masaligon tungod kay nasayud ko ang Ginoo motabang nako.”

Sila si Giulia ug Veronica nakaserbisyo sa ilang higala nga si Virginia sa usa ka makapausab sa kinabuhi nga paagi. Misugod sila sa pagdapit kaniya sa pag-apil sa mga kalihokan sa Simbahan uban kanila. Midapit usab sila sa pamilya ni Virginia sa pag-apil sa kalihokan sa ilang pamilya. Sa wala madugay ang pamilya ni Virginia misugod sa pakighimamat sa mga misyonaryo. Paglabay sa usa ka tuig, si Virginia ug ang iyang manghud nga babaye nabunyagan.

Karon nga miyembro na siya sa Simbahan, si Virginia nangita og mga paagi nga makaserbisyo sa mga tawo nga naglibut kaniya. Gusto gyud niya nga ipakigbahin ang ebanghelyo ngadto sa tanan. Usahay ang iyang mga higala sa eskwelahan mobugal-bugal kaniya sa iyang bag-ong mga gituohan, busa nag-ampo siya aron masayud kon kinsa iyang istoryahan. Usa ka adlaw ang Espiritu midasig kaniya nga makig-istorya sa usa ka babaye nga iyang kaila. “Ako siyang gihatagan og kopya sa Basahon ni Mormon ug midapit kaniya nga mosimba uban nako. Mitunga siya! Ug karon nagbasa siya sa Basahon ni Mormon.”

Si Samuele D., 14, nangita og mga oportunidad sa paglig-on sa mga miyembro sa iyang korum: “Naningkamot ko nga tabangan ang ubang mga lalaki sa akong korum pinaagi sa pagdasig nila diha sa klase. Usahay mobati sila nga naulaw o gikulbaan nga moapil.” Si Samuele miingon nga ang pagtabang sa uban nga mobati nga masaligon usa ka paagi nga siya makaserbisyo sa Dios ug maandam para sa umaabut nga mga responsibilidad.

Busa, unsa man ang inyong buhaton? Si Alessio I. miingon, “Dili nako kinahanglang magpaabut nga mahamtong aron makahimo og kalainan. Kinahanglan lang nga ako kining buhaton karon.”

Kini nga mga lakang makatabang usab ninyo samtang kamo makaamgo nga kamo mahinungdanon nga bahin sa buhat sa Ginoo. Himoa kini usa ka lakang matag higayon. Kamo makahimo og importanting kalainan samtang nagkat-on mo sa pagbuhat sa tanan sa inyong pagserbisyo sa Ginoo.