Paghatag sa Labing Maayo nga Gasa
Ang tagsulat nagpuyo sa Texas, USA.
Gihatagan nako ang akong higala sa pinakamaayong regalo sa adlawng natawhan nga sukad iyang nadawat.
Paghulagway pinaagi ni Taia Morley
Sa dihang nag-edad ko og 13 anyos, ang propeta mihangyo sa mga miyembro sa Simbahan sa pagbasa sa Basahon ni Mormon sulod sa lima ka bulan, sa katapusan nianang tuiga, ug misaad og mga panalangin sa pagbuhat sa ingon. Usa ka adlaw samtang nagbasa ko diha sa bus, usa ka batan-ong babaye nga ginganlan og Cynthia milingkod tupad nako ug nangutana kon unsa kining libroha. Miingon ko nga kini mao ang Basahon ni Mormon ug nga kini usa ka espesyal nga libro. Miingon ko nga gusto nakong humanon kini sa pagbasa sa dili pa matapos ang tuig aron makadawat ko og mga panalangin.
Nagsugod siya sa pagpangutana og dugang, ug miingon ko niya nga makaadto siya sa akong balay aron kami makahisgot og dugang kabahin niini. Iyang gidawat ang akong imbitasyon, ug migahin mi og daghang mga oras sa misunod nga mga adlaw sa paghisgot mahitungod sa Basahon ni Mormon ug sa Simbahan.
Pagkasunod Lunes, giimbitar nako siya sa family home evening, diin ako siyang gipaila-ila ngadto sa mga misyonaryo. Misugod sila sa pagtudlo kaniya sa mga leksyon, ug misugod siya sa pagsimba ug sa pagtambong sa tanang mga kalihokan sa kabatan-onan ug sa ubang mga miting sa Simbahan.
Nakahukom siya nga gusto niyang magpabunyag, ug uban sa pagtugot sa iyang mga ginikanan, siya gibunyagan sa iyang adlaw nga natawhan nianang tuiga. Miingon siya nga kini mao ang labing nindot nga regalo nga iyang nadawat sukad. Ang iyang inahan ug mga igsoon mitambong sa bunyag. Mihangyo siya nako sa pagkanta sa “Ang Espiritu sa Dios” (Mga Himno ug mga Awit sa mga Bata, nu. 28), ug mihangyo siya sa akong amahan sa pagpahigayon sa bunyag. Human sa iyang pagkawas sa tubig, kami nagginaksanay ug nanghilak. Dili gayud nako makalimtan kadtong adlawa tungod kay akong gibati ang talagsaong kalipay.
Usa ka tuig ang milabay ang akong pamilya mibalhin. Lisud kaayo kadto tungod kay si Cynthia ug ako nahimong suod nga mga higala ug mga sister diha sa ebanghelyo.
Bisan tuod og kami wala na magpuyo duol sa usag usa, suod gihapon kami nga mga higala. Kanunay kaming mag-istorya sa telepono, ug karong bag-o lang mitawag siya aron sa pagsulti nako nga ang iyang mama naminaw na sa mga leksyon sa misyonaryo. Kini nakapalipay nako tungod kay kaniadto ang iyang mama dili gusto nga maminaw sa mga leksyon. Miingon si Cynthia nako nga sa umaabut nga adlaw siya naglaum nga mosimba uban sa iyang tibuok pamilya. Nagpasalamat siya nako sa pagpaila kaniya ngadto sa Simbahan.