Kami Misubay sa Dalan

Imahe

illustration for lds voices

Sa katapusan nga dapit sa akong misyon, ang akong kompanyon ug ako nagserbisyo sa duha ka mga balangay nga nahimutang diha sa interyor sa estado sa São Paulo, Brazil. Tali sa duha ka mga balangay mao ang laktoranan agi sa kalasangan nga wala gayud namo maagii sukad tungod kay gibati namo nga makuyaw ug nga walay maistorya namo didto.

Usa ka hapon sa dihang nagpaingon mi sa laktoranan, ang Espiritu Santo mitandog sa akong kasingkasing, nagsulti nako nga kinahanglan ming mosulod sa lasang. Mitan-aw ko ni Elder Andrade ug misulti kaniya mahitungod sa impresyon nga akong nadawat. Miingon siya nako nga mao usab ang iyang gibati.

Wala madugay samtang nagsubay kami sa dili pamilyar nga agianan, nakakita kami og babaye nga naglakaw padulong kanamo. Pig-ot ang agianan, ug samtang nagkasugat mi, wala namo tuyoa nga nakamatikod kaniya nga naghilak.

Sa dihang mitan-aw siya, miimbitar siya namo sa pagsunod niya ngadto sa iyang balay, diin among nahimamat ang iyang bana. Diha-diha nagsugod mi sa pagtudlo sa magtiayon nga bukas kaayo sa ebanghelyo. Human sa pipila ka semana kami midapit kanila nga magpabunyag. Kami naghinam-hinam sa dihang midawat sila tungod kay usa na ka tuig sukad sa katapusang bunyag sa ward. Mapasalamaton kami nga misunod sa aghat sa pagsulod sa agianan nianang adlawa.

Sa hapit na ang ilang bunyag, bisan pa niana, ang asawa miingon nga kinahanglan siyang makig-istorya namo. Miingon siya nga sulod sa daghang katuigan nagbalik-balik ang iyang damgo. Sa iyang damgo iyang nakita ang iyang kaugalingon nga naghulat sa sentro sa São Paulo. Usa ka tigulang nga lalaki miduol kaniya ug miingon nga duha ka batan-ong mga lalaki moabut aron sa pag-usab sa iyang kinabuhi. Dayon makita niya ang duha ka batan-ong mga lalaki nga nagsingabut, apan ang iyang damgo kanunay natapos nianang higayona.

Usa ka adlaw sa milabay nga pipila ka semana, nanilhig siya sa salog sa iyang balay sa dihang usa ka tingog misulti kaniya nga duha ka batan-ong mga lalaki nagsingabut ug nga siya kinahanglang moadto nianang higayona sa laktoranan nga agianan, diin una namo siyang nakita. Wala makasabut sa aghat apan gusto nga masayud sa tubag sa iyang damgo, gibutang niya ang iyang silhig ug mipaingon sa agianan.

Samtang siya naglakaw, ang mga imahe sa iyang damgo misulod sa iyang hunahuna ingon sa usa ka salida nga natapos sa dihang sa katapusan iyang nakita ang mga nawong sa duha ka mga batan-ong lalaki. Nakita usab niya nga ang matag usa nagsul-ob og itom nga name tag. Sa wala madugay, miingon siya, si Elder Andrade ug ako nagpakita niya diha sa agianan. Gisanapan siya sa emosyon, ug wala siya makapugong gawas sa paghilak.

Karon, naghinumdom nianang sagrado nga kasinatian, akong gibati ang Espiritu ug nakita pag-usab sa akong hunahuna ang nawong niana nga sister nga namansahan sa luha kinsa midawat sa ebanghelyo. Mapasalamaton, nga ang akong kompanyon ug ako sensitibo ug dunay kaisug sa pagsubay sa dalan nga gusto sa Ginoo nga among subayon nianang adlawa.