Hangtud sa Sunod Natong Panagkita
Unsaon nako sa Pagkahibalo nga ang Ginoo Mipasaylo Kanako?
Gikan sa “Stand Ye in Holy Places,” Ensign, Hulyo 1973, 122.
Unsaon ninyo pagtubag sa usa ka tawo nga miduol ninyo nga nangutana niana nga pangutana?
Pipila ka tuig ang milabay si Presidente [Marion G.] Romney [1897–1988] ug ako naglingkod sa akong opisina. Miabli ang pultahan ug usa ka buotan nga batan-ong lalaki misulod ingon og may kabalaka sa iyang nawong, ug siya miingon, “Mga Kaigsoonan, mosulod ko sa templo sa unang higayon ugma. Ako nakahimo og mga sayop kaniadto, ug ako miduol sa akong bishop ug presidente sa stake, ug ako mihimo og dayag nga pagbutyag niining tanan; ug human sa usa ka panahon sa paghinulsol ug kasiguroan nga ako wala na mousab niini nga mga sayop, sila mihukom nga ako andam na nga mosulod sa templo. Apan, mga kaigsoonan, dili pa kana igo. Gusto ko nga masayud, ug unsaon nako sa pagkahibalo, nga ang Ginoo mipasaylo usab nako.”
Unsay inyong itubag sa usa ka tawo nga moduol ninyo nga mangutana niana nga pangutana? Samtang mamalandong kita sa makadiyot, mahinumdom kita sa pakigpulong ni Haring Benjamin diha sa basahon ni Mosiah. Ania ang usa ka grupo sa mga tawo kinsa karon naghangyo nga bunyagan, ug sila miingon nga ilang nakita ang ilang mga kaugalingon diha sa ilang kalibutanon nga kahimtang:
“Ug silang tanan misinggit og kusog uban usa ka tingog, nag-ingon: O kaloy-i, ug dihogi sa inula nga dugo ni Kristo nga kami mahimo nga makadawat sa kapasayloan sa among mga sala, ug ang among mga kasingkasing mahimo nga putli. …
“… Human sila makapamulong niini nga mga pulong ang Espiritu sa Ginoo midangat diha kanila, ug sila napuno sa hingpit nga kalipay, ingon nga nakadawat og usa ka kapasayloan sa ilang mga sala, ug nagbaton og kalinaw sa ilang tanlag” (Mosiah 4:2–3).
Mao kana ang tubag.
Kon ang panahon moabut nga kamo nakabuhat sa tanan nga inyong mahimo sa paghinulsol sa inyong mga sala, bisan kinsa kamo, bisan asa kamo, ug mihimo sa pagpahiuli kutob sa inyong mahimo; kon kini makaapekto sa inyong kahimtang sa Simbahan ug kamo miduol sa tukma nga awtoridad, dayon gusto ninyo ang kumpirmasyon nga tubag kon ang Ginoo midawat ba o wala kaninyo. Sa inyong pagsiksik sa kaugalingon, kon kamo nagtinguha ug inyong nakaplagan ang kalinaw sa tanlag, pinaagi niana nga timaan kamo masayud nga ang Ginoo midawat sa inyong paghinulsol. Si Satanas gusto nga sukwahi ang inyong hunahuna ug usahay moagni kaninyo nga karon nga mihimo og sayop, kamo magpadayon ug wala nay pagbalik. Mao kana ang usa sa mga dakong bakak. Ang milagro sa pagpasaylo anaa alang sa tanan niadtong kinsa mobiya sa ilang dautan nga mga buhat ug dili na mousab.