Mga Aninipot

Imahe

Illustration of a fireflies in the night sky

Paghulagway pinaagi ni Supansa Wongwiraphab

Pipila ka tuig ang milabay nagtrabaho ko sa usa ka archeological site nga gitawag og Aguateca, diin nahimutang sa matahum ug hilit nga bahin sa Guatemala nga maadto lamang sakay sa taas nga biyahe sa sakayan sa nagliko-liko nga Petexbatún River.

Usa ka gabii mibalik ko sa Aguateca uban sa pipila ka mga archeologist human sa paggahin og adlaw sa duol niining site. Samtang nagsakay mi sa sakayan subay sa sapa, nga ang hinay nga tingog sa motor ug huni sa mga insekto mao ray madungog, misandig ko sa kilid sa sakayan, nalingaw sa malinawon nga biyahe ug sa dili buwanon, dili kasagaran nga matin-aw nga kagabhion. Samtang ang sakayan misubay sa nagliko-liko nga sapa, gipaningkamutan nako nga mamintinar ang akong pagsabut sa direksyon pinaagi sa pagtimaan sa Bitoon sa Amihanan. Usahay ang Bitoon sa Amihanan masalipdan sa kangit-ngit nga mihulma sa mga kahoy nga naglinya sa daplin sa sapa, apan kini makita ra gihapon sa dili madugay.

Sa usa ka pagkurbada sa sapa, wala nako makit-i ang Bitoon sa Amihanan tungod kay nasalipdan og usab sa tumoy sa mga kahoy. Sa dihang ang sakayan mipadulong sa habagatan nga bahin, dali-dali ko kining nakit-an, mibati nga sama sa karaang marinero, mapasigarbuhon sa akong abilidad nga dili masaag. Human sa usa ka minuto nga nagtan-aw niini, hinoon, nakaamgo ko nga nasayop ko: wala ko magtan-aw sa North Star o gani sa usa ka bitoon. Nagtan-aw ko og usa ka aninipot.

Diha lang nako nasayran nga ang daghang “mga bitoon” ibabaw kanako sa tinuoray mga aninipot nga hilom nga naglupad sa mainitong hangin sa kagabhion. Makapatingala, ang kasanag sa dinosenang mga aninipot sa ibabaw hapit pareho gyud kasanag sa lagyong mga bitoon ug galaxy, ug ang pagliko-liko sa sakayan diha sa sapa nakapadali nga malibgan ang duha.

“Sa unsang paagi nga nasayop ko sa pag-ila sa gamay nga aninipot para sa bitoon nga hapit walay kinutuban ang kasanag?” Natingala ko. Ang tubag klaro: kabahin lang kini sa panglantaw. Ang makompara nga hinay ug temporaryong kahayag sa mga aninipot ingon og sama sa mga bitoon tungod kay ang aninipot pipila lang ka pye ibabaw kanako ug ang mga bitoon layo kaayo. Gikan sa akong panglantaw, makita nga ang duha daw magkapareha.

Sama sa mga aninipot, ang mga pagtintal ug pagsulay makita nga dako tungod kay kini duol nimo. Sa laing bahin, ang gisaad nga mga panalangin, sama sa mga bitoon, mahimong makita nga layo kaayo.

Ang atong kakulangan sa espirituhanong panglantaw mahimong adunay daghang mga sangputanan. Kon mas layo nga makita ang ganti, mas matintal kita sa paghunahuna nga atong ilangay ang adlaw sa atong paghinulsol ug makabalik ra gihapon sa Langitnong Amahan aron sa pag-angkon sa atong mahangturong kabilin (tan-awa sa Alma 34:33–34). Mahimong magsugod kita sa pagduha-duha sa mahangturong ganti o modesisyon nga mas makalingaw nga mahimong kinaiyanhon nga tawo karon kay sa maghulat sa mga panalangin nga dugay pa nga moabut. Tingali nahadlok kita sa dili mapugngan, tibuok kinabuhi nga pakigbisog batok sa sala o kakulang sa pagtuo nga ang atong Manluluwas motabang kanato sa pagbuntog ni Satanas.

Panagsa kitang tanan mawala sa atong mahangturong panglantaw; ang hagit mao ang pag-angkon niini og balik sa labing madali nga panahon. Bisan tuod ang kalibutan motanyag og madanihon, malinglahon nga mga ganti, kita makalantaw kang Jesukristo samtang atong gimaniubra ang mga liko-liko sa kinabuhi ug mosalig nga sa tinud-anay Siya “magabalus ra sa mga mangapangita kaniya” (Mga Hebreohanon 11:6).

Mga tuig na ang milabay sukad niining pagsakay sa sakayan diha sa sapa, apan hangtud karon mohunong ko og kadiyot kon mosagubang og tintasyon ug pahinumduman ang akong kaugalingon, “Usa lang kini ka aninipot.”