Pagserbisyo uban sa Inyong Tibuok Kalag
Sama sa atong makat-unan sa tema sa Mutual alang sa 2015, usa ka sagradong pribilehiyo ang pagserbisyo sa Dios. Kami naglaum nga karong tuiga kitang tanan makakat-on sa pagserbisyo nga may mas dakong pasalig sumala sa sugo sa Manluluwas—uban sa tibuok natong kasingkasing, gahum, hunahuna, ug kusog. Unsaon nato pagbuhat niini? Ania ang pipila ka ideya.
Una, kita moserbisyo uban sa atong tibuok kasingkasing. Alang kanato kini nagpasabut nga ang inyong pagserbisyo sa Dios kinahanglang dinasig sa inyong gugma alang Kaniya ug sa Iyang mga anak. “Ang atong gugma sa Dios modumala sa mga pagpahayag sa atong pagbati, sa mga panginahanglan sa atong panahon, sa mga interes nga atong gitinguha, ug sa han-ay sa atong mga prayoridad.”1 Inyong gipakita sa Dios ang inyong gugma kon inyong sundon ang Iyang mga sugo (tan-awa sa D&P 42:29). Kamo moserbisyo sa inyong panimalay ug molig-on sa inyong pamilya. Kamo mopalambo sa inyong calling ug motabang niadtong nanginahanglan og higala. Kamo mangita og mga ngalan sa pamilya nga dalhon ngadto sa templo.
Ikaduha, kita moserbisyo uban sa atong tibuok gahum. Pisikal nga pagtrabaho ug pagkugi gikinahanglan. Ang misyonaryo nga buhat nagkinahanglan og kusog ug paglahutay. Kamo moserbisyo uban sa gahum kon inyong atimanon ang mga panginahanglan sa uban, “ingon sa pagpakaon sa gigutom, pagsinina sa hubo, pagduaw sa mga masakiton ug pag-alagad sa ilang kahupayan, sa espirituhanon ug lawasnon” (Mosiah 4:26).
Sunod, kita moserbisyo uban sa atong tibuok hunahuna. Ang inyong mga hunahuna kinahanglan nga limpyo ug putli, nasentro sa Manluluwas. Kamo nakigsaad nga kanunay mohinumdom Kaniya. Kamo nagtinguha sa giya sa Espiritu Santo pinaagi sa pagtuon sa kasulatan ug pag-ampo. Samtang inyong ihan-ay ang inyong mga hunahuna, pulong, ug mga aksyon uban sa hunahuna ug kabubut-on sa Dios, inyong giila ang panginahanglan sa uban ug takus ug andam nga moserbisyo.
Sa katapusan, kita moserbisyo sa Dios uban sa atong tibuok kusog. Usa sa paagi sa pag-angkon og kalig-on mao ang pagbansay og hugot nga pagtuo sa Pag-ula sa Manluluwas. Kamo mohinulsol ug magbalaan sa inyong kaugalingon pinaagi sa pagkamasulundon sa Iyang mga sugo. Inyong mabati ang makaabag nga gahum sa Manluluwas ug makasaksi og mga milagro samtang nagserbisyo mo diha sa kalig-on sa Ginoo (tan-awa sa Alma 26:12).
Samtang kamo moserbisyo sa Dios uban sa inyong tibuok kalag, Siya nagsaad nga kamo malimpyohan sa sala ug maandam nga mobarug sa atubangan Kaniya ug makadawat sa Iyang mahangturong himaya.