Unsaon sa Pagkab-ot sa Mahangturong mga Tumong
Ni Elder Robert D. Hales
Sa Korum sa Napulog Duha ka mga Apostoles
Gikan sa pakigpulong nga gihatag sa gradwasyon sa Brigham Young University-Idaho niadtong Disyembre 11, 2004.
Gusto kong mosugyot og pipila sa labing importante nga mga tumong sa kinabuhi nga mohatag kaninyo og kalipay samtang nagtuman mo sa inyong misyon dinhi sa yuta—mahangturong mga tumong nga makatabang ninyo nga makabalik nga madungganon ngadto sa inyong Amahan sa Langit. Kini naglakip sa:
-
Magminyo sa templo ug mag-ugmad og mahangturong relasyon sa pamilya pinaagi sa mainampoong pagbalanse sa daghang mga aspeto sa kinabuhi, sama sa pamilya, trabaho, padayun nga edukasyon, mga hilig, ug kalingawan.
-
Magmatinud-anon ug magmasulundon sa pagsunod sa inyong relihiyon ug magmatinuoron sa inyong mga pakigsaad sa bunyag ug templo, kanunay ibahandi ang maayong mga butang sa kinabuhi
-
Mosalig sa mahangturong panglantaw, maghinumdom nga ang mga butang sa gingharian mahangturon ug ang mga butang sa kalibutan temporal o temporaryo.
-
Maghinumdom sa paghatag og mapahinungurong pagserbisyo sa inyong tibuok nga kinabuhi ug sa kanunay moatiman sa mga kabus kinsa nanginahanglan sa inyong gugma ug uban pa nga suporta.
Kini mga tumong sa tibuok kinabuhi nga kinahanglang tutukan ug gahinan og panahon aron makab-ut. Ang paghimo niini nga mga tumong dili paigo; kita kinahanglang maghimo og plano aron matuman kini.
Karong gabhiona o ugma, pamalandong unsay inyong gusto nga makab-ut sa inyong kinabuhi ug unsay inyong mga tumong. Gahini og panahon nga isulat kini ug ribyuha kini sa umaabut nga katuigan. Dayon paggahin og panahon sa pagpangutana sa inyong kaugalingon kon unsay inyong buhaton aron makab-ut kining mga tumong karon, ugma, sunod semana, ug sa sunod nga mga bulan.
Unsaon ninyo pagpili ug paglatid niining importante, mahangturon nga mga tumong? Ug, sama kaimportante, unsaon ninyo pagplano aron makab-ut kini? Hinumdumi: ang panahon mao ang mahinungdanon—gani kritikal—nga elemento sa inyong mga pagbana-bana. Kon asa mo karon, ingon og kamo adunay daghan kaayong panahon sa pagkab-ut niining mahangturong mga butang.
Ang tanan adunay panahon; tinuod kini. Apan tungod ang panahon milabay wala magpasabut nga kita miuswag.
“Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton” (Alma 34:32).
Ang sekreto mao ang pagpili sa maalamong paagi niadtong mga kalihokan nga makatabang nato nga makab-ot ang atong balaanong dinasig nga mga tumong ug dayon pagbaton og lig-ong kinaiya ug konbiksyon sa pagbaliwala sa unsay makabalda o makapugong nato sa pagkab-ut sa atong mahangturon nga destinasyon.
Mopamatuod ko nga ang inyong panahon dinhi sa yuta igo gyud aron matuman ang inyong pagpangandam ug paghimo sa mga buluhaton sa misyon sa inyong kinabuhi—kon inyong gamiton sa maalamong paagi ang inyong panahon. Ug wala nay laing mas maayo nga panahon kaysa buhaton kini karon, sa inyong pagkabatan-on (tan-awa sa Alma 37:35).